САЙЁР ҚАБУЛЛАР – АҲОЛИ МУРОЖААТЛАРИ БИЛАН ИШЛАШДА САМАРАЛИ УСУЛ

Аҳоли мурожаатлари билан ишлаш, фуқароларни қийнаб келаётган муаммоларни аниқлаш ва тезкор ечим топишда республикамизнинг барча ҳудудларида ўтказилаётган сайёр қабулларнинг аҳамияти катта. Ушбу самарали усулнинг йўлга қўйилгани, давлатимиз раҳбари ташаббуси билан халқ давлат идораларига эмас, давлат идоралари халқимизга хизмат қилаётгани аҳолининг эртаги кунга ишончини мустаҳкамламоқда.

Амударё туманида ҳам Президент Қабулхонаси, секторлар раҳбарлари иштирокида режа асосида барча ҳудудларда сайёр қабуллар ташкил этилиб, аҳоли билан юзма-юз мулоқотлар ўтказилаётир.

10 сентябрь куни Манғит шаҳридаги Олмазор, Гулзор, Ойбек номли маҳаллалар аҳолиси ҳаёти билан танишиш, уларни қийнаётган муаммоларга ечим топиш мақсадида 1-сектор масъуллари ва тумандаги Президент қабулхонаси мудири Эркин Ражабовнинг сайёр қабули бўлиб ўтди.

Тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова, тумандаги Халқ қабулхонаси мудири Эркин Ражабов, Олмазор, Гулзор, Ойбек номли маҳаллалар фуқаролар йиғинлари раислари, ҳоким ёрдамчилари, хотин-қизлар фаоллари, ёшлар етакчилари, профилактика инспекторлари, тумандаги корхоналар, ташкилотлар раҳбарлари, банклар бошқарувчилари ва маҳаллалардан 30 нафардан зиёд фуқаролар иштирок этдилар.

Тадбирда дастлаб маҳаллаларда ҳоким ёрдамчилари, ёшлар етакчиси, хотин-қизлар фаоли лавозимлари жорий этилганлиги аҳоли билан ишлаш, мавжуд муаммоларни аниқлашда ва бартараф этишда жуда муҳим аҳамият касб этаётгани таъкидланди.

Жорий йилнинг ўзида янги иш ўринларини яратиш, аҳолини тадбиркорликка жалб қилиш ва доимий даромадга эга бўлишлари учун мазкур маҳаллаларда ҳам ўндан зиёд тадбиркорлик субъектлари ташкил этилди, кам таъминланган эҳтиёжманд оилалар қўллаб-қувватланди, айрим ишсиз ёшлар тадбиркорликка, касб-ҳунарга ўқитилиб, фаолиятини бошлашлари учун кредитлар ажратилди.

Шу куни сайёр қабул давомида 10 нафар фуқаролар турли муаммолар юзасидан мурожаат қилдилар. 10та мурожаатнинг 2таси яъни Ойбек номли маҳаллада истиқомат қилувчи фуқаронинг яшаш ҳовлиси олдидаги электр линияси ўтган ёғоч устун чириб, атрофдагиларга хавф солаётгани хусусидаги, Гулзор маҳаллада яшовчи фуқаронинг ҳовлиси олдидаги яшил ҳудудга экилган дарахтлар электр симига тегиб, хавфли вазият юзага келгани хусусидаги мурожаатлари бўйича соҳа масъулларига муаммоларни ҳал этиш топширилди.

Қолган 8та – банкдан кредит олиш, кўчаларнинг ички йўлларини таъмирлаш ва болалар майдончаси қуриш каби мурожаатлар ҳам ҳал этиш учун назоратга олинди. Шунингдек, масъуллар томонидан аҳолини қизиқтирган саволларга ҳам батафсил жавоблар берилди.

Ойгул РАЖАБОВА.