“Адолат” СДПдан Президентликка номзоднинг ишончли вакили амударёлик сайловчилар билан учрашди

Маълумки, жорий йилнинг 9 июль куни юртимизда муҳим сиёсий жараён − Ўзбекистон Республикаси Президенти сайлови бўлиб ўтади. Ушбу жараёнга бефарқ бўлмаган юртдошларимиз номзодларнинг сайловолди дастурлари билан яқиндан танишиб, ўзлари муносиб деб билган номзодга овоз беришни ният қилишган.

Бу борада сиёсий партиялардан кўрсатилган Президентликка номзодларнинг Ўзбекистонни ҳар томонлама ривожлантиришга мўлжалланган дастур ва мақсадларини сайловчиларга кенг тарзда тушунтириш ва тарғиб қилиш мақсадида ҳудудлар бўйлаб номзодлар ва уларнинг ишончли вакиллари билан учрашувлар ташкил этилмоқда.

Шундай учрашувлардан бири Амударё туманида “Адолат” социал-демократик партиясидан Президентликка номзод Робахон Махмудованинг ишончли вакили Нурлибой Қайипбергенов иштирокида бўлиб ўтди.

Учрашувда Президентликка номзод Робахон Махмудованинг ҳаёти ва меҳнат фаолияти тўғрисида батафсил маълумот берилди. Сайловчилар Президентликка номзоднинг халқимиз хоҳиш-иродасини ифода этувчи сайловолди дастури билан таништирилди.

Шунингдек, мамлакатимизда бўлиб ўтадиган муҳим сиёсий жараённинг келажакда давлатимиз ривожи, аҳоли фаровонлигини таъминлашдаги аҳамияти кенг тарғиб қилинди.

Номзоднинг сайловолди дастурида халқ давлат ҳокимиятининг бирдан бир манбаи эканлиги ҳақидаги конституциявий тамойил давлат сиёсатининг устувор йўналиши сифатида таъкидланиб, халқ ҳокимиятининг ёрқин тимсоли бўлмиш вакиллик демократияси институтининг роли ва аҳамиятини янада ошириш, мамлакат иқтисодиётининг барқарор ривожланишини таъминлаш, жамиятнинг инновацион, интеллектуал салоҳиятини рўёбга чиқариш ва инсон капиталини ривожлантириш каби масалаларда изчил таклифларнинг илгари сурилаётгани сайловчиларда катта қизиқиш уйғотди.

Шунингдек, номзоднинг сайловолди дастуридаги фуқароларга кўрсатилаётган тиббий хизмат сифатини янада яхшилаш, тиббиёт ходимлари ва ўқитувчи-педагогларнинг мақомини мустаҳкамлаш, уларнинг меҳнатини рағбатлантириш, замонавий технология ва даволаш усулларини кенг жорий қилиш, “Ақлли тиббиёт” тизимини шакллантириш, яхшилаш бўйича ташаббуслар янгидан янги ғоя ва аниқ чора-тадбирларга бойлиги билан аҳамиятли бўлди.

Учрашувда номзоднинг сайловолди дастури қўллаб-қувватланиб, унда халқчил ғоя бош мақсад қилиб қўйилганлиги фикр билдирувчилар томонидан алоҳида таъкидланди.

Номзоднинг ишончли вакили олдимизда турган муҳим тарихий тадбирда Робахон Махмудовага овоз беришга, сайлов куни барчани фаол иштирок этишга чақирди.

“Адолат” СДП туман Кенгаши раиси, Ўктам Йўлдашев