16-СОНЛИ МАКТАБДА “ХАЙР, БИРИНЧИ УСТОЗИМ!” НОМЛИ ТАДБИР ЎТКАЗИЛДИ
Юртимизда мураббийлик, устозлик улуғ мақом саналади. Устозларни чор-атрофни ўз нурлари ила чороғон этувчи қуёшга ўхшатишади. Чиндан-да, қуёш оламни ёритса, устоз-муаллимлар ёш авлод кўнглини илм нури ила ёритадилар, маърифат, маънавият улашадилар. Ҳазрат Абдураҳмон жомий айтганларидай:
Устоз, мураббийсиз қолганда замон,
Зулумотдан қора бўларди жаҳон.
Муаллим сўзи “илм берувчи”, “ўргатувчи” деган маъноларни англатиши ҳам бежиз эмас. Шу боисдан ҳам улар доимо барчанинг эъзозида, ардоғида. Айниқса мактабга илк қадам қўйган бола қўлидан тутиб, ҳарфларни ёзишни, ўқишни ўргатган илк устозини ҳеч қачон унутмайди.
Мустақил юртимиздаги барча умумтаълим мактабларга бундан тўрт йил олдин оламча ҳайрат билан 1-синфга ўқишга қабул қилинган жажжи болакайлар айни кунларда 4-синфни якунламоқдалар, бошланғич таълимни тугатмоқдалар.
16-сонли умумтаълим мактабининг 4-A синф ўқувчилари ҳам бошланғич таълимни якунлаб, биринчи ўқитувчиси билан хайрлашиб, катта синфларга қадам қўйиш арафасида туришибди. Уларга бошланғич синф ўқитувчиси Барно Йўлдошова 4 йил давомида таълим тарбия бериб келган ва ўз фарзандидай қадрдон бўлиб қолган ўқувчилари билан хайрлашди ва шу муносабат билан “Хайр, биринчи устозим!” номли адабий-бадиий кеча ўтказилди.
Дарҳақиқат, ҳар бир инсон қаерда ишламасин, қандай касб эгаси бўлмасин, унга билим ва тарбия бериб, мустақил ҳаётга йўллаган устозларини ҳурмат билан эсга олади. Бугун мана шу синфхонада ўтирган жажжи ўқувчилар қўлига қалам тутқазган, уларга ёзишни-ўқишни ўргатган биринчи устози Барно Йўлдошовадан бир умр миннатдор бўлиб яшасалар ажаб эмас.
Тадбирда улар устозига миннатдорчилиги сифатида ёд олган шеърларини ифодали ўқиб бердилар.
Тадбирда 4-“A” синф ўқувчилари 20 йиллик педагогик иш тажрибасига эга Барно Йўлдошовадан 4 йил давомида ўрганган билимларини, она Ватан, мактаб ва устозларига атаб шеър ва қўшиқлар айтиб, тарбиявий мазмунга эга саҳна кўринишларини ҳамда миллий рақсларни намойиш қилдилар. Ушбу тадбирда иштирок қилаётган ота-оналар фарзандларига илк сабоқ берган синф раҳбари ишларига муваффақиятлар тилаб, ўз миннатдорчиликларини билдириб ўтишди.
Тадбирда жажжи битирувчилар тилидан ажойиб қўшиқлар янгради. Айниқса улар тайёрлаган рақсларни мактаб педагоглар жамоаси ва ўқувчиларнинг ота-оналари олқишлар билан кузатдилар. Бир сўз билан айтганда, мактабларда 4-синфлар учун ўтказиладиган бундай тадбирлар келажак сари дадил қадам ташлаётган, эртамиз эгаларини аждодларимизга муносиб фарзанд бўлиб вояга етишга руҳлантиради.
Саҳнада тизилишиб туриб “Хайр, биринчи устозим” дея қалб ҳарорати ила куйлаётган болажонларнинг юз-кўзларида устозига чексиз меҳр, миннатдорлик акс этади. Энди бу ўқувчилар келгуси 2023-2024 ўқув йилини янги шароитларда, янги устозлар билан давом эттиришади. Бошланғич таълим улар учун бунда муҳим пойдевор бўлиб хизмат қилади. Шу боисдан ҳам улар келгусида ҳам аъло баҳоларга ўқишга, илк устози ишончини оқлашга интилишади.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
