ХАЛҚАРО ХОТИН-ҚИЗЛАР КУНИГА БАҒИШЛАБ “АЁЛЛАР СПОРТ ҲАФТАЛИГИ” ЎТКАЗИЛДИ

Мамлакатимизда хотин-қизларнинг ижтимоий фаоллигини ошириш, уларнинг ўзлари қизиққан йўналишлар бўйича иқтидорларини намоён этишлари учун зарур шарт-шароитлар яратиш, айниқса спорт-соғломлаштириш ишларини манзилли ривожлантириш, аёл-қизлар ўртасида турли спорт мусобақаларини ташкил этишга алоҳида эътибор қаратилмоқда. Ўзбекистон Республикаси Президентининг 2022 йил 7 мартдаги “Оила ва хотин-қизларни тизимли қўллаб-қувватлашга доир ишларни янада жадаллаштириш тўғрисида”ги 87-сонли Фармони мазмун-моҳияти ҳам айнан ана шу мақсадларга қаратилгани билан муҳим аҳамият касб этмоқда.

Бу борада Амударё тумани Оила ва хотин-қизларни қўллаб-қувватлаш бўлими, Ёшлар агентлиги туман бўлими ва болалар-ўсмирлар спорт мактаби спорт мураббийлари ташаббуси билан амалга оширилаётган ишлар эътиборга муносиб. Айниқса, маҳаллаларда, ўқув муассасаларида аёл-қизларнинг бўш вақтларини мазмунли ўтказишга қаратилган спорт мусобақалари тобора оммавийлашиб бормоқда.

Юқоридаги Президент Фармони ижросини таъминлаш мақсадида жорий йилнинг 1-7 март саналари оралиғида 8 март – Халқаро хотин-қизлар куни байрами муносабати билан Амударё туман Оила ва хотин-қизлар бўлими, Ёшлар агентлиги туман бўлими ҳамда БЎСМ ҳамкорлигида бўлиб ўтган “Аёл-қизлар спорт ҳафталиги” ҳам муросасиз курашларга бой ва қизиқарли ўтди.

Спортнинг 7 та тури, хусусан, шахмат-шашка, стол тенниси, волейбол, енгил атлетика ва стритбол, миллий кураш ва гимнастрада ҳамда минифутбол бўйича ўтказилган мусобақалар ҳар бир иштирокчига завқ-шавқ бағишлади.

Спорт ҳафталигининг илк мусобақалари 1 март куни стол тенниси бўйича бошланиб, унда 10 та маҳаллада бўлиб ўтган стол тенниси мусобақаларида ғолибликни қўлга киритган спортчи қизлар иштирок этишди.

Бири-биридан қизиқарли баҳсларга бой тарзда ўтган беллашувларда Манғит шаҳрининг Бўстон маҳалласида истиқомат қилувчи стол тенниси спорти ишқибози Моҳирахон Имомқулова барча ракеткачилардан ўзининг яққол устунлигини намоён этиб, фахрли 1-ўринни эгаллади. Иккинчи ўрин Ўрта қалъа овул фуқаролар йиғинида яшовчи ёш спортчи Фотима Шомуродовага насиб этди. Ўртақалъалик яна бир спортчи Зуҳра Шомуродова ҳамда Манғит шаҳрининг Бойовул маҳалласидан Мавлуда Ражабовалар учинчи ўринни эгалладилар.

“Аёл-қизлар спорт ҳафталиги” доирасидаги тадбирлар 2 март санасида спортнинг шахмат-шашка турлари бўйича давом этди. Шунингдек, 3 март куни волейбол спорти мусобақалари, 4 март санасида спортнинг енгил атлетика ва стритбол, 6 март куни миллий кураш ва гимнастрада, ҳафталикнинг охири куни, 7 март санасида эса минифутбол бўйича мусобақалар ўтказилди.

Шуни алоҳида таъкидлаш керакки, 8 март – Халқаро хотин-қизлар кунига бағишлаб, мазкур байрам арафасида бўлиб ўтган “Аёллар спорти ҳафталиги” хотин-қизларнинг ижтимоий фаоллигини ошириш, уларни спорт соғломлаштириш иншоотларига кенг қамраб олиш, азиз ва муҳтарама опа-сингилларимиз, гўзал қизларга байрамона, жўшқин кайфият бахш этиш мақсадида ташкиллаштирилган ҳафталик доирасидаги барча тадбирлар ғоятда уюшқоқлик ва жипслик асосида, дўстона кайфиятда ўтди.

Спорт ҳафталиги якунида ғолиб спортчилар муносиб тақдирланди. Хусусан, шахмат йўналишида Дўстлик маҳалласидан 1-ўринни эгаллаган Дурдона Раҳимова, 28-сонли мактабгача таълим ташкилоти ходимаси, 2-ўрин соҳибаси Нилуфар Тоҳирова, 3-ўринни эгаллаган Дурунки маҳалласидан Дилноза Тўраева, шашка тури бўйича 1-ўрин соҳибаси, 5-сонли мактабгача таълим ташкилотидан Умида Бозорбоева, 2-ўринни эгаллаган 28-сонли мактабгача таълим ташкилотидан Насиба Абдуллаева, 3-ўринга муносиб кўрилган 19-сонли мактабгача таълим ташкилотидан Гулноза Бекишовалар мусобақанинг ҳамкор ташкилотлари томонидан муносиб тақдирландилар.

Шунингдек, волейбол мусобақалари ҳам ҳаяжонли дақиқаларга бой бўлди. Унда Оқ олтин овули волейболчи қизлар жамоаси 1-ўринни эгаллашди. Тошёплик волейболчи қизларга 2-ўрин, Жумуровулликларга эса 3-ўрин насиб этди.

Ҳафталик доирасида, 4 март куни 25 нафар ўсмир қизлар иштирок этган спортнинг енгил атлетика тури бўйича қизғин баҳслар давом этди. Унга кўра, 1-2-ўринлар куюккўпирлик Мухлиса Тўлибоева ва Роза Мадатоваларга насиб этди. Дўстлик маҳалласи енгил атлети Назира Раҳимбоева эса фахрли 3-ўринни эгаллади.

Шу куни катта ёшдаги аёл-қизлар ўртасидаги енгил атлетика спорт тури бўйича мусобақаларда ҳам 25 нафар спортчи қатнашиб, 1-ўринни Навоий маҳалласидан Умида Бозорбоева, 2-ўринни Фотима Шомуродова ва 3-ўринни Ўрта қалъа овулидан келган спортчи Зуҳра Шомуродовалар эгалладилар.

Спортнинг стритбол тури бўйича мусобақаларда эса 19-сонли мактаб жамоаси 1-ўринни, 2-3-ўринларни спорт мактаби жамоалари эгаллашди.

Спортнинг гимнастрада турида 6 та жамоа иштирок этиб, мусобақа якунида 1-ўрин 1- мактабгача таълим ташкилоти жамоасига, 2-ўрин 42-сонли ва 3-ўрин 13- мактабгача таълим ташкилотлари жамоаларига насиб этди.

7 март куни қизғин баҳсларга бой ўтган мини-футбол мусобақаларида жами 9 та жамоа қатнашди. Унда спорт мактаби жамоаси 1-ўринни, 35-сонли мактаб жамоаси 2-ўринни, 41-сонли мактаб жамоаси эса 3-ўринни эгалладилар.

16 ёшли ўсмир қизлар иштирокидаги спортнинг миллий кураш тури бўйича 52 кг. вазн тоифасида Дурдона Байрамгулиева 1-ўринни, Гулойим Сафарбоева 2-ўринни, Дилфуза Хидирбоева ва Моҳира Гурбангулиевалар 3-ўринни эгаллашди.

Шунингдек, 63 кг. вазн тоифасида 1-ўрин Ирода Ибрагимовага, 2-ўрин Дилнура Раҳимбоевага насиб этди, Зебо Давлетова ва Умида Абдуллаевалар 3-ўрин соҳибалари бўлишди.

“Аёллар спорт ҳафталиги” якунида ғолиб жамоалар ва спортчилар ҳамкор ташкилотлар томонидан муносиб тақдирландилар.

Робия ЙЎЛДОШЕВА