38-сонли мактабда “Онажонлар байрами” деб номланган маданий тадбир ўтказилди

Чақалоқларнинг тили “Она” сўзи билан чиқиши ҳеч кимга сир эмас. Бу аввал ҳомилани жисмида, сўнг қўлида кўтариб, оёққа қўйгунича не бир заҳматларга ҳам  чидаб, ҳеч оғринмай фарзанд тарбиялайдиган буюк зот – оналарнинг фидойилиги учунмикан? Она наинки боласи ўзини тутиб, юриб кетгунича, балки, то умрининг охиригача оилам, болам деб яшайди, фарзандлари меҳри, камолидан куч олиб яшайди.

Ана шундай сабри чексиз, меҳри уммон аёлларни эъзозлаш, ҳурматини жойига қўйиш юртимизда боқий қадриятлардан ҳисобланади.

Умумий ўрта таълим масканларида ёш авлодга илм билан бирга юксак тарбия бериш, аёл-қизларга, она юртга муҳаббат, дўст-биродарлик туйғуларини шакллантиришга ҳам алоҳида эътибор қаратилади.

Амударё туманидаги кимё-биология фанларини чуқур ўқитишга ихтисослаштирилган 38-сонли мактабнинг 1-“в” синфи ўқувчилари иштирокида 8 март – Халқаро хотин-қизлар байрами муносабати билан “Онажонлар байрами” деб номланган маданий тадбир ўтказилди.

Тадбир учун мактаб фаоллар зали байрамона безатилди ва аёл-қизларни, оналарни шарафловчи улуғ мутафаккирларимизнинг ибратли сўзлари ёзилган плакатлар осилди. Ўқувчилар чизган расмлар ҳам қўйилди.

Тадбирни мактаб директори Баҳром Болтабоев очди ва барча ўқитувчини, ўқувчи аёл-қизларни 8 март – Халқаро хотин-қизлар куни билан қизғин қутлади. Жамиятимизда, оилаларда аёл-қизларнинг тутган ўрнига юксак баҳо берди ва байрам муносабати билан ташкиллаштирилган маданий-мусиқий кечани томоша қилишга чақирди.

Тадбирга ташриф буюрган ўқитувчилар, ўқувчилар, уларнинг ота-оналари  саҳнага 1-“в” синф ўқувчиларининг “Онажонимсиз” қўшиғига рақси бошланишини қарсаклар билан олқишладилар. Она, аёл, она Ватан, фарзандлик бурчи улуғланган шеърларни ижро этаётган жажжи  ўғил-қизлар мактабга қадам қўйганидан бери қай даражада саводхон бўлганлигини ҳам саҳнада намойиш этдилар.

Мазкур синф раҳбари Муҳаббат Аллаберганова кўмагида шеър ёдлаш ва ифодали ўқиш кўникмаларини эгаллаган болажонларнинг ўқиган шеърлари “Бувижон”, “Кўйлагим”, “Юлдузчалар” қўшиқлари, рақслар ҳам барчага манзур бўлди. Шуниси эътиборлики, ҳозирги кунда мамлакатимиз таълим тизимида ўқувчиларга хорижий тилларни ўргатиш илк синфдан бошланиши ўқувчиларнинг мазкур тилларни эрта ўзлаштиришларига замин бўлаётир.

Тадбирда жажжи ўқувчилар рус тилида шеърлар айтиб, қўшиқларга рақсга тушганларида бу яққол ўз ифодасини топгандай бўлди.

Тадбир охирида бутун синф ўқувчилари “Онажон, ёнимда бўлсангиз бас” номли қўшиқни жўровоз бўлиб ижро этиш баробарида ҳар бири ўз оналарига гул совға қилишгани барчани тўлқинлантирди. Ўқувчилар оналари қувончдан кўзлари порлаб, синф раҳбари Муҳаббат Аллабергановага  раҳматлар айтдилар.

Аслида онанинг фарзандларни авайлаб парваришлаб вояга етказгунича чекадиган машаққатларининг, меҳрининг қиёси йўқ. Улар доимо эъзозда, эҳтиромда яшашга лойиқдир. “Онажонлар байрами” тадбири шу мақсадга хизмат қилди десак, адашмаган бўламиз.

Ойгул РАЖАБОВА.