ЭЛИГА ТАЯНЧ БЎЛАЁТГАН ҲОКИМ ЁРДАМЧИСИ

Юртимизнинг барча ҳудудларида Президентимиз ташаббуси билан жорий этилиб, фаолият кўрсатаётган ҳоким ёрдамчилари уйма-уй юрган ҳолда ҳар бир хонадоннинг ҳолатини ўрганмоқда ва фуқароларнинг иқтисодий аҳволи яхшиланишига кўмак бермоқда. Бунинг натижасида ҳақиқий эҳтиёжманд ва боқувчисини йўқотган оилалар, ишсизларга тадбиркорликни йўлга қўйишларига кўмаклашилиб, бандлигини таъминлашга эришилмоқда. Амударё туманида ҳам ҳоким ёрдамчилари томонидан аҳолининг ижтимоий-иқтисодий муаммоларини ҳал этиш, тадбиркорликни ривожлантириш, ишсиз фуқаролар бандлигини таъминлаш, камбағалликни қисқартириш борасида амалга оширилаётган ишлар ўз самарасини бермоқда.

Тумандаги Дўстлик маҳалласи ҳоким ёрдамчиси Рашид Ўрозимбетовнинг мутахассислиги иқтисодчи. У тумандаги тижорат банки “Микрокредитбанк” туман филиали бошқарувчиси ўринбосари лавозимида ишлаб келаётган бўлиб, меҳнат фаолиятига 13 йил тўлган эди.

У Дўстлик маҳалласига ҳоким ёрдамчиси қилиб тайинланганидан кейин дастлаб ишни аҳолини ўрганиш ва маҳалланинг “ўсиш нуқталари” ва “драйвер” лойиҳаларни аниқлашдан бошлади. Аҳоли бандлигини таъминлаш ва тадбиркорликка жалб этиш, маҳалла ҳудудида давлат-хусусий шериклик асосида тадбиркорликни ривожлантириш, маҳаллабай ишлаш тизимини янги босқичга олиб чиқиш орқали камбағалликни қисқартириш кабилар борасида тегишли чора-тадбирлар белгилаб олиб, шунга кўра ишларни ташкил этишга ҳаракат қилди.

Дўстлик маҳалласида 3 минг 804 нафар аҳоли яшайди. Ҳудуддаги 590 та хонадон хатловдан ўтказилганида 917 та оила яшаши аниқланди. Маҳаллада 22 та хизмат кўрсатиш объектлари, 1 та МТТ, 1 та мактаб мавжуд. Ҳоким ёрдамчиси томонидан хатлов ўтказилганидан сўнг, хонадонлар 4 тоифага ажратилди.

Ўтган йил давомида ҳоким ёрдамчисининг кўмаги билан маҳаллада яшовчи 175 нафар фуқаро доимий ишга жойлаштирилиб, 25 нафари мавсумий ва жамоат ишларига жалб этилди. Шунингдек, ўзини-ўзи банд қилган аҳоли сони 101 нафар, ижара асосида ер ажратиш ҳисобига бандлиги таъминланганлар 5 нафарга етказилди.

Маҳалла ҳудудида ҳоким ёрдамчисининг тавсияномаси асосида тумандаги тижорат банки томонидан 33 млн. сўм имтиёзли кредит ажратилиб, “Жасур Дилрабо гилам ювиш” оилавий корхонаси ташкил этилди. Ҳозирги кунда ушбу оилавий корхона аҳолига автомобилларни ювиш ва гилам ювиш хизматларини кўрсатиб келмоқда. Корхонада маҳалла фуқароларидан 2 нафарининг бандлиги таъминланиб, 25 нафари мавсумий ва жамоат ишларига жалб этилди.

Ундан ташқари, якка тадбиркор Шаҳноза Ёқубовага ҳоким ёрдамчиси томонидан 33 млн. сўм миқдорида имтиёзли кредит олишига тавсиянома берилди. Тадбиркор ушбу маблағлар эвазига ёшларнинг бўш вақтларини мазмунли ўтказишларини таъминлаш мақсадида компьютер ўйинлари, интернет кафе ва киберспорт йўналишларида фаолият ташкил этди.

Шунингдек, яна бир тадбиркор Жонибек Йўлдошев ҳам ҳоким ёрдамчиси кўмаги билан 33 млн. сўм кредит маблағларини олди ва оилавий мактабгача таълим ташкилоти фаолиятини йўлга қўйди. Бунинг натижасида 2 нафар фуқаронинг бандлиги таъминланди. Шу билан бирга касб-ҳунар ва тадбиркорликка 31 нафар фуқаро ўқитилиб, 65 та лойиҳага кўра кредит маблағлари, 9 нафар ишсиз фуқарога субсидия ажартилишига ҳам ёрдам берди.

Маҳаллада аҳолига қийинчилик туғдириб келаётган мавжуд муаммолардан бири бўлган 1 та эски трансформатор янгисига алмаштирилди. Ҳудуддаги Шўрчи кўчасининг 1,8 км. қисмига тош ётқизилди. Айни пайтда пиёдалар йўлакчаси ва болалар майдончасини қуриш ишлари амалга оширилмоқда.

Ҳоким ёрдамчиси Рашид Ўрозимбетовнинг бу йилги ниятлари, режалари ҳам катта. У фуқаролар йиғини масъуллари билан бамаслаҳат ҳолда яна 190 нафар аҳолининг бандлигини таъминлашга, 126 нафар фуқаронинг ўзини ўзи банд қилишига кўмаклашишни мақсад қилган. Ундан ташқари, маҳалла ихтисослашувидан келиб чиққан ҳолда “драйвер” лойиҳаларни ҳамда инвестиция дастурларига киритилмаган “микролойиҳа”лар амалга оширилишида кўмаклашиш, аҳолини тадбиркорликка жалб этиш орқали даромадга эга бўлишини таъминлаш бўйича ҳам саъй-ҳаракатлар олиб бормоқда.

Маҳалланинг суянчи ва элнинг таянчига айланган ҳоким ёрдамчиси Рашиджон Ўрозимбетов ҳудуд аҳолисининг ҳақиқий кўмакчисига айланмоқда. Давлат раҳбарига ва юртдошларига камарбаста бўлаётган Дўстлик маҳалласи ҳоким ёрдамчисига биз ҳам куч-қувват тилаймиз.

О.Худойберганова.