ҲАР ҚАНДАЙ ДАВЛАТНИНГ ТАРАҚҚИЁТИНИ ТАЪЛИМ СИФАТИ БЕЛГИЛАЙДИ

Жонажон юртимизда ҳар бир фуқаро жинси, ирқи, миллати, тили, дини, ва ижтимоий мавқеидан қатъий назар, таълим олиш ҳуқуқига эгадир. Бу бош Қомусимизда кафолатлаб қўйилган. Таълим тизими ягона ва узлуксиз бўлиб, улар бири-бирини тўлдириб туради.

Жумладан, таълимнинг пойдевори бўлган мактабгача таълим ва тарбия болаларни ўқитиш ва тарбиялашга, уларни интеллектуал, маънавий-ахлоқий, эстетик ва жисмоний жиҳатдан ривожлантиришга, шунингдек, умумий ўрта таълимга тайёрлашга хизмат қилади.

Амударё туманида 128 та мактабгача таълим ташкилоти мавжуд бўлиб, шундан 51 таси давлат, 4 таси давлат-хусусий шерикчилик асосидаги ҳамда 73 таси оилавий нодавлат МТТларидир.

Туманда болаларни мактабгача таълим тизимига қамров даражасини янада ошириш, мактабгача таълим муассасаларини янгидан барпо этиш, эскиларини реконструкция қилишга алоҳида аҳамият берилмоқда. 2022 йил давомида 5 та, яъни 8-, 18-, 33-, 44-, 47-сонли МТТларида жорий таъмирлаш ишлари амалга оширилди.

 Шунингдек, тадбиркорларни жалб қилган ҳолда 11 та оилавий нодавлат МТТлари ташкил қилинди.

Туманимизда 3 ёшдан 7 ёшгача бўлган болалар 16 841 нафар бўлиб, уларнинг 11 949 нафари, яъни 71 фоизи МТТларга қамраб олинган.

Йил якунига қадар инвестиция дастури асосида Юқори қишлоқ маҳалласида реконструкция қилинаётган 28-сонли МТТ филиалига 120 нафар, Чойкўл овули ҳудудидаги ҳамда Ойбек номли маҳалладаги оилавий нодавлат МТТларга 75 нафар болаларни қамраб олиш режалаштирилган.

 2022 йил давомида туманда мактабгача таълимнинг узвий давоми бўлган умумий ўрта таълимни юқори босқичга олиб чиқиш, таълим сифатини юксалтириш, ўқитувчилар малакасини ошириш, таъмирталаб мактабларни реконструкция қилиш борасида кўплаб самарали ишлар амалга оширилди.

Жумладан, йил давомида инвестиция дастури доирасида Қипчоқ овули ҳудудидаги 18-сонли мактаб биноси, Чордара маҳалласи ҳудудидаги 36-сонли мактаб биноси, Бой овул маҳалласи ҳудудидаги 56-сонли мактаб, биноси реконструкция қилиниб, фойдаланишга топширилди.

Мазкур йилда инвестиция дастури доирасида 3 та мактаб қайта таъмирланган бўлса, Президентининг 2022 йил 23-24 февраль кунлари Қорақалпоғистон Республикасига ташрифи давомида берилган топшириқлар ижросини таъминлаш мақсадида яна 3 та мактаб жорий таъмирдан чиқарилди.

Шунингдек, “Обод қишлоқ” дастури доирасида Аёқчи маҳалласи ҳудудидаги 69-сонли мактаб биноси мукаммал таъмирланди.

2022 йилда Президент таълим муассасалари агентлиги тизимидаги Амударё туман ихтисослаштирилган мактабининг иш бошлаши қувончли воқеа бўлди.  Ушбу таълим масканида аниқ ва табиий фанлар йўналишларида 16 синфда 384 нафар ўқувчи таълим олмоқда. Уларга олий тоифали, юқори малакали 34 нафар педагоглар таълим-тарбия беришмоқда.

Умумтаълим мактабларининг 9-синф битирувчиларини касбга ўргатиш, уларнинг бандлигини таъминлаш масаласига ҳам алоҳида эътибор бериб келинмоқда.

Бугунги кунда Қипчоқ овули ҳудудидаги 1-сонли касб-ҳунар мактабида 304 нафар ўқувчи 11 та касб мутахассисликлари бўйича таълим-тарбия олмоқдалар. 2021-2022-ўқув йилида касб-ҳунар мактабини 4 та мутахассислик бўйича 118 нафар ўқувчилар битказишди. Шундан 16 нафар ўқувчи олий таълим муассасаси талабаси бўлди. Қолган ўқувчилар ўз касби бўйича тадбиркорлик фаолиятини йўлга қўйдилар.

Манғит шаҳрининг Дўстлик маҳалласи ҳудудидаги 2-сонли касб-ҳунар мактабида 424 нафар ўқувчи таълим-тарбия олмоқда. Уларга 24 нафар малакали ўқитувчи ва 13 нафар ишлаб чиқариш таълими усталари таълим-тарбия бериб келишмоқда.

Касб-ҳунар мактабида автомобилларга техник хизмат кўрсатиш ва таъмирлаш, йўл ҳаракати қоидалари, пайвaндловчи, газ ва сув тизимларини таъмирлаш, тикувчилик, электротехника жиҳозларини таъмирлаш, ошпаз ва қандолатчилик, устахоналари мавжуд бўлиб, ўқувчи-ёшлар малакали устозларидан олган билим ва кўникмаларини устахоналарда амалиётда қўллаб, ўз тажрибаларини оширмоқдалар. Тумандаги умумтаълим ва касб-ҳунар мактабларида ўқувчиларнинг билим олиши, касб-ҳунар эгаллашлари учун барча шароит ва имкониятлар яратилган.

Туман Халқ таълими бўлими тизимидаги умумтаълим мактабларида 4064 нафар ўқитувчи 38 476 нафар ўқувчига ўзларининг бор билимларини бериб келишмоқда. Ўқитувчиларнинг 185 нафари олий, 642 нафари биринчи, 1239 нафари иккинчи тоифали ҳамда 1790 нафари олий маълумотли мутахассислардир. Устозлардан олинган билим ва кўникмалар асосида 2021-2022 ўқув йилида 2 572 нафар битирувчининг 589 нафари олий таълим муассасаларига ўқишга киришди.

Таълимга берилаётган эътибор натижасида тумандаги Халқ таълими бўлимига қарашли умумтаълим мактаблари Ўзбекистон Республикаси бўйича миллий рейтингда 200 та  туман ичида 110-ўринни, Қорақалпоғистон Республикасидаги барча туманлар ичида 5-ўринни эгаллади. 

Мактабдан ташқари таълим самарадорлигини ошириш мақсадида ташкил қилинган “Баркамол авлод” болалар мактаби ҳам самарали тарзда фаолият юритиб келмоқда. Мактабга 1 668 нафар ўқувчи қамраб олинган. Мактабда “Маданият ва санъат”, “Техника, конструкторлик ва моделлаштириш”, “Жисмоний  тарбия ва  спорт”, “Ҳунармандчилик ва қўл мехнати”, “Туризм ва экология” ҳамда “Олий таълим муассасалари ва мактабга тайёрлов” йўналишлари бўйича 66 тўгарак фаолияти йўлга қўйилган. Ўқувчилар мазкур тўгаракларда мактабдан ташқари бўш вақтларини мазмунли ўтказмоқдалар.

Бугунги кунда кўплаб ривожланган давлатларнинг тараққиётини ўша мамлакат ўқувчиларига берилаётган таълим сифатига боғлашади. Юқори савияга, сифатли билимга эга бўлган инсонлар жамиятнинг иқтисодий, ижтимоий ва сиёсий ўсиши, ривожланишини таъминлайдиган ислоҳотларни амалга ошириб, жамият тараққиётига ҳисса қўшадилар.

Туманимизда якунланаётган йилда амалга оширилган таълим соҳасидаги самарали ишлар юқоридаги эзгу мақсадларни амалга оширишга хизмат қилиши шубҳасиз. 

Ф.ЭШИМБЕТОВА.