75-сонли мактабда “Саводхонлик байрами” ўтказилди
Мактабга илк қадам қўйган болажонларнинг ҳаяжонини, қувончларини тасвирлаш қийин. Ўқитувчининг ҳар бир сабоғи улар учун мўъжизалар сирини очади. Алифбодаги барча ҳарфларни ўқиш-ёзишни ўрганиб, “Алифбе” китоби билан хайрлашуви – “Саводхонлик байрами” жажжи ўғил-қизларнинг хотирасида бир умр сақланиб қолади.
Жорий ўқув йилида Амударё туманидаги 75-сонли мактабнинг 1-синфига қадам қўйган 30 нафар болажонлар учун шу йилнинг 27 декабрида ўтказилган “Саводлик байрами” тадбири ҳам унутилмас таассуротлар ҳадя этди.
Аввало тадбирга олдиндан тайёрларлик кўрилганини таъкидлаш жоиз. Тантана ўтказиладиган кунгача синфхона ўқувчиларнинг биринчи ёзувлари, чизган расмлари, пластилин ва қоғоздан ясалган қўл меҳнати намуналари, Янги йил байрами безаклари, шарлар билан безатилди. Энг чиройли ёзувли дафтарлар намуна қилиб қўйилди. Болажонлар устози Ардақ Саймаханова кўмагида синфхонани безашдан ташқари, тадбир учун шеър, қўшиқлар ёдлаб, рақслар ҳам ўргандилар.
Ниҳоят болажонлар орзиқиб кутган дамлар келди. Тадбирда мактаб директори Солий Авазмуродов, маънавий-маърифий ишлар бўйича ўринбосари Асқар Матмуродовлар алифбе дарслигидаги ҳарфларни ўзлаштириб, саводхон бўлган болаларни қизғин қутладилар. Саҳнага ўқувчиларнинг устози ҳамроҳлигида турли ҳарфлар тимсоли сифатидаги чиқишларини барча ўқитувчилар, ўқувчиларнинг ота-оналари қарсаклар билан олқишлашди. Ўқувчилар она тилимиз алифбосидаги барча ҳарфлар билан бошланадиган, шу ҳарф таърифига бағишланган шеърлар ижро этиб бўлганларидан сўнг, қўшиқ, рақслар ижро этиб, иқтидорларини намойиш этдилар.
Фарзандларининг илк ўқув йили ярмида эришган ютуқларини, салоҳиятини кузатиб ўтирган ота-оналар концерт дастурини ҳам қарсаклар билан олқишлаб турдилар. Улар шу элнинг болаларини ўз боласидай ардоқлаб меҳр билан таълим-тарбия бераётган муаллима Ардақ Саймахоновага, мактабнинг бутун ўқитувчилар жамоасига миннатдорчилик билдирдилар.
“Алифбе” китобини муваффақиятли ўзлаштирган ўқувчилар ҳам бошланғич таълимнинг илк ярим йилида эгаллаган билимларини интеллектуал ўйинлар, қизиқарли савол-жавоблар, қўшиқ, рақслар орқали ота-оналарига, устозларига намойиш этиб берганларидан жуда хурсанд бўлишди.
Бахтиёр болажонларни Қорбобо ва Қорқиз ҳам самимий қутлаб, ўқишларида муваффақиятлар тилади. Совғалар билан тақдирладилар. Бу жажжи болажонларнинг қувончига қувонч қўшди. Биргаликда ўйин-кулгу давом эттирилди.
“Саводхонлик байрам” тадбири уларга жуда манзур бўлди.
Севара ИСМОИЛОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
