МАКТАБЛАР РЕЙТИНГИ МЕЗОНЛАРИНИ ТУШУНТИРИШГА БАҒИШЛАНГАН ЎҚУВ-АМАЛИЙ СЕМИНАР ЎТКАЗИЛДИ
“Миллий рейтинг натижалари ва педагог кадрлар аттестациясини ташкил қилишда таълим ташкилотлари раҳбарларининг роли” мавзусида ўқув-амалий семинар ташкил қилинди.
23 декабрь куни Амударё туманидаги 38-сонли мактабда туман Халқ таълими бўлимининг Таълим сифати мониторинги бўлими томонидан ташкил этилган семинарда бўлим масъуллари, мутахассислари ва тумандаги барча умумтаълим мактабларининг ўқув ишлари бўйича директор ўринбосарлари иштирок этишди.
Ўқув-амалий семинарни туман Халқ таълими бўлими мудири ўринбосари Ибрагим Ражабов кириш сўзи билан очиб берди ва амалий семинарда ўрганиладиган мавзулар бугунги кунда таълим сифатини оширишда жуда долзарблигини айтиб, фикрларини билдирди.
Шундан сўнг, Таълим сифати мониторинги бўлими бош инспектор-методисти Райҳон Якубова сўзга чиқиб, маъруза қилди. У ўз маърузасида бугунги кунда педагог кадрларнинг салоҳиятини оширишга қаратилган тадбирлар, уларнинг аҳамияти тўғрисида батафсил сўз юритди. Шунингдек, таълим-тарбия ва илм-фан соҳаларини ривожлантиришга доир Президент фармонлари ва ҳукумат қарорлари мазмун-моҳиятини ҳам тушунтириб ўтди.
Таъкидланганидек, эндиликда умумий ўрта таълим муассасалари рейтингини аниқлаш тартибга кўра амалга оширилади. Рейтинг аниқлашнинг асосий мақсади – умумий ўрта таълим муассасалари ўртасида соғлом рақобат муҳитини шакллантириш, муассасаларининг раҳбарлари ва педагогларининг жамиятдаги ўрни ва мақомини ошириш, меҳнатини муносиб қадрлаш, фаолият самарадорлигига қараб, моддий рағбатлантириш, маҳаллий бошқарув органларининг ўз ҳудудларида таълим сифатини оширишга қаратилган фаолиятини кучайтиришдан иборатдир. Хорижий тажрибага кўра мактаблар рейтингида асосий бош мезон – бу ўқувчиларнинг билим даражасидир. Шу сабабли умумий ўрта таълим муассасалари рейтинги Финляндия, АҚШ, Жанубий Корея, Россия, Япония, Эстония, Сингапур, Голландия каби давлатларининг илғор тажрибасига мувофиқ, тўртта муҳим йўналишда 8 та индикатор асосида аниқланади.
Семинар иштирокчиларига мазкур йўналиш ва индикаторлар ҳақида кенг тушунчалар берилиб, эндиликда шу асосда таълим сифатига баҳо берилиши маълум қилинди. Шу билан бирга тумандаги умумтаълим муассасаларининг ўтган ўқув йилидаги фаолияти самарадорлиги бўйича “Миллий рейтинг – 2022” натижалари таҳлил этилди.
Таълим сифати мониторинги бўлими инспектор-методисти Фарҳод Авезов ҳам “Мактабгача, умумий ўрта, ўрта-махсус, профессионал ва мактабдан ташқари таълим ташкилотлари педагог кадрларини аттестациядан ўтказиш тўғрисида”ги низомга киритилган ўзгартириш ва қўшимчалар тўғрисида маълумот бериб ўтди. Ундан ташқари, Вазирлар Маҳкамасининг “Мактабгача, умумий ўрта, ўрта махсус, профессионал ва мактабдан ташқари таълим ташкилотлари педагог кадрларини аттестациядан ўтказиш тартибини такомиллаштириш чора-тадбирлари тўғрисида»ги, “Нодавлат секторда профессионал таълимни ривожлантиришга шарт-шароитлар яратилиши ҳамда педагог кадрларни аттестациядан ўтказиш тизими такомиллаштирилиши муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида”ги қарорлари мазмун-моҳиятини тушунтириб ўтди. Шу билан бирга, ўқитувчиларнинг педагогик маҳорати ва психологик тайёргарлигини одилона баҳолаш бўйича муҳим тавсиялар берди.
Ўқув-амалий семинардаги маърузалар қизғин муҳокама этилди. Таълим сифати мониторинги бўлими бош инспектор-методисти Райхон Якубова ҳамда инспектор-методист Фарҳод Авезовлар семинар иштирокчиларини қизиқтирган саволларга тўлиқ ва батафсил жавоблар беришди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
