БЕПУЛ УМУМИЙ ТАЪЛИМ ОЛИШ ДАВЛАТ ТОМОНИДАН КАФОЛАТЛАНАДИ

Конституциянинг 41-моддасида “Ҳар ким билим олиш ҳуқуқига эга. Бепул умумий таълим олиш давлат томонидан кафолатланади. Мактаб ишлари давлат назоратидадир” деб белгилаб қўйилган.

Мамлакатимиздаги ҳар бир фуқаронинг бепул умумий таълим олиши қонуний тарзда белгилаб қўйилгани эртанги кун эгаларининг ҳуқуқий манфаатлари кафолатидир. Шунингдек, мактабларда берилаётган таълим ва тарбия сифати доимо давлат назоратидадир. 

Куюк кўпир овулидаги 14-сонли мактабнинг педагоглари ушбу ҳаётий ҳақиқатни тўлақонли ўз иш фаолиятларига тадбиқ қилган ҳолда ўқувчиларга таълим-тарбия бериб келмоқдалар.

 Мазкур мактаб биноси 1970 йилда 120 ўқувчи ўрнига мўлжаллаб қурилган бўлиб, ундан кўплаб билимли ва истеъдодли ўқувчилар учирма бўлишган.

Давлатимиз раҳбарининг 2022 йил 23-24 февраль кунлари Қорақалпоғистон Республикасига ташрифи давомида тумандаги 55-, 76- сонли мактаблар қаторида 14-сонли мактаб биносига ҳам 180 ўринли қўшимча бино қурилиши белгиланди.

Мазкур топшириқнинг ижросини таъминлаш мақсадида “Жумуртов тех таъмир сервис” МЧЖ томонидан қиймати 2 млрд. 360 млн. сўм миқдоридаги қурилиш ишлари  олиб борилиб, тўлиқ якунланди.

Бугунги кунда мактабда  3 нафар олий, 6 нафар биринчи, ҳамда 10 нафар иккинчи тоифали ўқитувчилар 294 нафар ўқувчига ўзларидаги бор билим ва кўникмаларни бериб келмоқдалар.

Мазкур мактабда дарслар ўзбек, қозоқ тилида ўқитилади. Қувонарлиси, бир-бирига қон-қариндош икки элнинг фарзандлари биргаликда аҳил-иноқ таълим оладилар.

Ўқувчилар устозларининг берган билимларини, ишончларини оқлашга доимо ҳаракат қилишади. 2021 йилда қозоқ тили фани бўйича ўтказилган олимпиадада 10-синф ўқувчиси Б.Рейимбаева Ўзбекистон Республикасида фахрли биринчи ўринни қўлга киритди. Унинг бу муваффақиятидан нафақат устозлари, ота-онаси, синфдошлари балки, бутун ҳамқишлоқлари қувонишди.

Мактаб – бу ҳаёт-мамот масаласи, келажак масаласи. Уни давлат, ҳукумат ва ҳокимларнинг ўзи ҳал қилолмайди. Бу бутун жамиятнинг иши, бурчига айланиши лозим.

Фотима Эшимбетова.