16-сонли мактабда «Конституция – бахтимиз қомуси» мавзусида маънавий-маърифий тадбир ўтказилди

Конституция – ҳар бир давлатнинг, халқнинг хоҳиш-иродаси, ҳуқуқ ва эркинликларини ўзида мужассам этган муҳим қомусий ҳужжат – инсонпарварлик, адолатпарварликнинг олий Қонунидир. Унинг ҳар бир боби, моддаси инсоннинг бахтли, тинч-тотув яшашини кафолатлайди ва ҳар қандай ҳолатда юксак ҳуқуқий тамойиллар тантанаси учун хизмат қилади.

Айни кунларда мамлакатимизнинг барча ҳудудларида, таълим-тарбия муассасалари ва турли жамоат ташкилотларида Ўзбекистон Республикаси Конституциясининг 30 йиллигига бағишланган маънавий-маърифий тадбирлар ўтказилиб, кўп миллатли халқимиз томонидан бу қутлуғ сана муносиб нишонланмоқда.

Амударё туман Халқ таълими бўлимига қарашли 16-сонли ихтисослаштирилган давлат умумтаълим мактабида декабрь – тарих, ҳуқуқ ва тарбия фанлари ойлиги доирасида “Конституция – бахтимиз Қомуси” мавзусида маънавий-маърифий, адабий-мусиқий кеча ташкил этилди.

8 декабрь – Ўзбекистон Республикаси Конституцияси қабул қилинганининг 30 йиллик байрами арафасида мактабнинг ҳуқуқ ва тарбия фани ўқитувчиси Адолат Давекова томонидан ташкил этилган мазкур тадбирда 8-9-синфлар ҳамда 4-А синф ўқувчилари фаол иштирок этишди.

Мустақиллик йилларида мамлакатимиз халқларининг конституциявий ҳақ-ҳуқуқарини таъминлаш мақсадида қабул қилинган муҳим ҳуқуқий ҳужжатлар, Ўзбекистон Республикаси Конституцияси ҳар бир моддасининг халқимиз ҳаётидаги амалий ифодасини ўзида мужассам этган суратли лавҳалар, мустақиллик даври тарихи, тараққиёт босқичлари хусусидаги расмлар, турли хил тарихий жараёнлар ва давлатимизнинг одилона сиёсатини акс эттирувчи шиорлар билан безатилган мактаб саҳнаси тадбир иштирокчилари қалбида Конституциямизнинг халқчиллиги, тарихимизнинг теран илдизларига ҳурмат ва эҳтиром туйғусини уйғотди.

Тарих, ҳуқуқ ва тарбия фанлари ойлиги доирасида ташкиллаштирилган тадбир давомида ўқувчи-ёшлар тарих, ҳуқуқ ва тарбия фанларидан олган билимларини маҳорат билан намойиш этдилар. Бир-бирларига саволлар йўллаш орқали Конституциямизнинг ҳар бир моддаси ҳақида аниқ ва пухта жавоб бердилар. Шунингдек, ўтган тарихий 30 йил давомида Конституциямизнинг мамлакатимиз халқлари ҳаётида тутган ўрни, она Ватанга чексиз меҳр-муҳаббат туйғуларини акс эттирувчи саҳна кўринишларини намойиш этишиб, тинчлик, миллатлараро тотувлик, бағрикенглик, ўзаро меҳр-оқибат ва мустақилликни мадҳ этувчи шеърлар айтдилар.

Тарих, ҳуқуқ ва тарбия фанлари ойлиги доирасида 8 декабрь – Ўзбекистон Республикаси Конституцияси қабул қилинганининг 30 йиллиги муносабати билан ташкиллаштирилган мазкур тадбирда 4-А синф раҳбари Барно Йўлдошева, Ибодат Кенжаева, Маърифат Ражабова ҳамда Зокиржон Илҳомовлар ўзаро ҳамкорликда иш юритганлари учун тадбир маънавий-маърифий жиҳатдан юқори савияда ўтказилди. Унда ўқувчи-ёшларнинг тарих, ҳуқуқ ва тарбия фанларидан олган билимлари синовдан ўтказилиб, янада мустаҳкамланди. Шу билан бирга уларнинг қалбларида Бош Қомусимиз – Конституциямизни янада чуқурроқ ўрганишга бўлган иштиёқ янада ортди.

Робия ЙЎЛДОШЕВА.