ТАДБИР ЎҚУВЧИЛАРНИНГ РУС ТИЛИНИ ЎРГАНИШГА ҚИЗИҚИШИНИ ОШИРДИ
Мамлакатимизда хорижий тилларни ўрганишга эътибор кучаймоқда. Чунки ёшларнинг халқаро тилларни билиши – дунё илм-фани ютуқларидан баҳраманд бўлишига имкон яратиши билан бирга турли давлатлар ёш вакилларининг ўзаро мулоқотга киришига ва дўстлик алоқаларини йўлга қўйишига асос бўлади.
Шу боисдан ҳам ҳар йили ноябрь ойида мамлакатимизнинг барча умумий ўрта таълим мактабларида рус тили ва адабиёти фан ойлиги уюшқоқлик билан ўтказилади. Фан ойлиги муносабати билан ўтказиладиган очиқ дарслар, суҳбатлар, викториналар ўқувчиларнинг фанга бўлган қизиқишини оширади.
Туманимиздаги 60-сонли мактабда ҳам фан ойлиги доирасида тадбир ўтказилди. Тадбирда мактаб директори Сардор Ражабов, маънавий-маърифий ишлар бўйича ўринбосари Бўтакўз Худойберганова, тиллар бўйича услуббирлашма раиси Феруза Ғаниевалар иштирок этиб, ўқувчиларнинг рус тилини қандай ўзлаштираётганликларига гувоҳ бўлдилар.
Тадбир давомида ўқувчилар рус тилида шеърларни ифодали ўқидилар. Эртаклар қаҳрамонлари суратларини чизиб, бу ҳақда рус тилида равон гапиришлари болаларнинг иқтидорини яққол кўрсатиб берди. “Кимнинг ёзуви энг чиройли”, “”Ким энг кўп китоб ўқиган?” баҳсларидан сўнг, ўқувчилар кроссворд ечиш, тез айтиш, топишмоқ, мақол айтиш бўйича ҳам беллашиб, ғолиблар аниқланди.
Тадбирнинг бадиий қисмида ўқувчилар рус ёзувчилари ижодидан саҳна кўриниши, шеър, қўшиқлар ижро этдилар.
Тадбирда фаол қатнашган ўқувчиларга Фахрий ёрлиқлар, қизиқарли китоблар топширилди.
Фан ойлиги иш режасига мувофиқ ўтказилган кеча ўқувчиларнинг рус тилини ўрганишга қизиқишларини яна ҳам оширгани билан аҳамиятли бўлди.
Тозагул САФАРНИЁЗОВА, шу мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
