ТИББИЁТДАГИ ИСЛОҲОТЛАР ИНСОН ҚАДРИНИ УЛУҒЛАШГА ХИЗМАТ ҚИЛМОҚДА

Президентимиз жорий йил 18 март кунги соғлиқни сақлаш соҳаси вакиллари билан ўтказган “Тиббиётдаги ислоҳотлар – инсон қадри учун” мавзусидаги очиқ мулоқотида аҳоли соғлиғини сақлаш, тиббий хизмат сифатини яхшилаш бўйича кўпгина вазифалар белгиланган эди.

Ушбу топшириқлар ижросини таъминлаш мақсадида қабул қилинган “Бирламчи тиббий-санитария ёрдамини аҳолига яқинлаштириш ва тиббий хизматлар самарадорлигини ошириш бўйича қўшимча чора-тадбирлар тўғрисида”ги Президент қарорида бирламчи тиббий-санитария ёрдами муассасаларидан узоқ масофада жойлашган маҳаллаларда контейнер маҳалла тиббиёт пунктларини ташкил этиш белгиланган эди.

Қарор ижросини юзасидан Амударё туманида ҳам амалий саъй-ҳаракатлар олиб борилмоқда. Шу кунгача туманимизда 11 та контейнер типидаги маҳалла тиббиёт пунктлари, уларда фаолият юритувчи тиббий бригадалар ташкил этилди.

Боғ маҳалласидаги маҳалла тиббиёт пункти айни кунда 2005 нафар аҳолига тиббий хизмат кўрсатмоқда. Умумий амалиёт шифокори Гулбаҳор Тўраева раҳбарлик қилаётган маҳалла тиббиёт пункти тиббий бригадасида Малика Абдуллаева, Меҳрибон Норбоевалар ҳамшира, Умида Собирова эса доя бўлиб меҳнат қилишади.

Ҳудудда 555 нафар туғиш ёшидаги аёллардан, 37 нафар турли ёшдаги ногиронлиги бўлган фуқаролардан, болалар аҳволидан хабар олиш, зарурат туғилганларини стационар даволанишга жалб этиш, нуронийлар, кексайиб, эркин ҳаракат қила олмай қолганларнинг соғлиғини назорат қилиш уларнинг зиммасида.

Шунингдек, аҳоли турли гуруҳлари орасида соғлом ҳаёт кечириш афзалликларини тарғиб этиш, соғлом авлодни тарбиялаш, касалликлар профилактикаси бўйича оммавий ва индувидуал тарғибот тадбирларини олиб бориш, профилактик иммунопрофилактик, диагностик ва даволаш муолажаларини амалга ошириш каби тиббий хизматлар учун энди Боғ маҳалласи аҳолисида неча чақирим йўл босиб, Манғитга қатнаб юрмайдиган бўлди. Маҳалла тиббиёт пункти тиббий бригадаси аъзолари чақирувга биноан уйларига бориб ҳам кўрикдан ўтказаётгани, зарур ҳолларда муолажа қилиб, керакли дори-дармонларни бераётгани аҳолининг орзулари рўёби бўлаётир.

Маҳаллада соғлом турмуш барқарор бўлишида маҳалла фуқаролар йиғини масъуллари, профилактика инспектори ҳамкорлиги йўлга қўйилгани кутилган самарани бераяпти.

Маҳаллада истиқомат қилувчи 1993 йилда туғилган Муҳайё Адамова бир ҳафта муқаддам жарроҳлиқ операциясини бошидан ўтказди.

Уни эндиликда нафас етишмовчилиги, умумий ҳолсизлик ва баданининг кесилган жойларида сурункали оғриқ безвота қилаётгани учун тиббиёт пунктига кўрикка келди. Олий тоифали, малакали шифокор Гулбаҳор Тўраева уни синчиклаб текшириб, даво муолажаларини буюриб, зурар дорилар берди ва уларни қай тарзда қабул қилиш йўл-йўриқларини тушунтирди. Қон босими ошишидан шикоят қилиб келган фуқарога ҳам зарур дори-дармонлар пункт ҳисобидан бепул берилди.

Тиббиёт пункти фаолиятини кузатган киши бу ерга ташриф буюраётганлар йўл босиб туман марказига бориб юрмай, ўз ҳудудларида малакали тиббий хизматдан фойдаланаётганликларидан мамнун бўлиб кетаётганига гувоҳ бўлади. Бу эса тиббиётдаги ислоҳотлар инсон қадри учун эканлигининг амалдаги ифодасидир.

Ойгул РАЖАБОВА.