Президент фармони ижросини таъминлаш борасида амалга оширилиши лозим бўлган муҳим вазифалар муҳокама этилди

Сўнгги йилларда мамлакатимизнинг ижтимоий-иқтисодий ҳаётида мисли кўрилмаган ислоҳотлар амалга оширилди. Ушбу янгиланишлар ва ўзгаришлар халқимиз ҳаётида ҳам ўз аксини топмоқда. Охирги 6 йил ичида биргина Қорақалпоғистон Республикасини комплекс ривожлантиришга доир 31 та фармон ва қарорлар қабул қилинди. Ҳудудда тадбиркорлик субъектлари сони 2 баробарга ортди, қарийб 4,5 мингта инвестиция лойиҳалари ишга туширилди.

Муҳтарам Президентимиз томонидан жорий йилнинг 31 август куни имзоланган “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги Фармони ушбу ислоҳотларнинг узвий давоми сифатида қорақалпоғистонликлар ҳаётида янги саҳифа очди.

29 сентябрь куни туман ҳокимлиги биносида бўлиб ўтган йиғилишда мазкур фармон ижросини таъминлаш борасида амалга оширилиши лозим бўлган муҳим вазифалар муҳокама қилинди.

Йиғилишда Қорақалпоғистон Республикаси Жўқорғи Кенгеси Раиси ўринбосари Атабек Давлетов, туман ҳокими Султонбой Йўлдашев, Қорақалпоғистон Республикаси Иқтисодий тараққиёт ва камбағалликни қисқартириш вазири ўринбосари Атамурат Шамуратов, секторлар раҳбарлари, ҳоким ўринбосарлари, ҳокимлик масъул ходимлари, ҳудудлардаги ҳоким ёрдамчилари иштирок этишди.

Йиғилишда Атамурат Шамуратов фармоннинг мазмун-моҳияти ҳақида кенг турда маълумотлар берди.

Келтирилшича, ёш тадбиркорларга ишлаб чиқариш ва хизмат кўрсатиш учун зарур асбоб-ускуналарни ҳарид қилиш мақсадида ёш тадбиркорларни қўллаб-қувватлаш жамғармаси орқали 7 йил муддатга қарз маблағлари тақдим этилади. Шунингдек, оилавий тадбиркорликни ривожлантириш дастурлари доирасидаги лойиҳаларни молиялаштириш учун 2022 йил якунига қадар қўшимча равишда 200 млрд.сўм кредит маблағлари ажратилади.

Йиғилиш давомида туман Давлат солиқ инспекцияси бошлиғи Айдос Сейитов Республика фармон билан берилган солиқ имтиёзлари ҳақида батафсил маълумот бериб, аниқ мисоллар билан тушунтириб берди.

Таъкидланганидек, 2023 йил 1 январдан 2028 йилнинг 1 январигача бўлган даврда фойда солиғи ставкаси 15 фоиздан 7,5 фоизга, айланма солиқ ставкаси эса Нукус шаҳрида 4 фоиздан 2 фоизга, туманларда 2 фоиздан 1 фоизга, олис ҳудудларда эса 1 фоиздан 0,5 фоизга камайтирилади. Ундан ташқари, мол-мулк ва ер солиғи бўйича солиқ ставкалари 2 баробарга камайтирилади.

Якка тартибдаги тадбиркорлар учун солиқ миқдори йилига 300 минг сўмни ташкил этгани тадбиркорлар учун катта енгиллик бўлди.

Йиғилишда Қорақалпоғистон Республикаси Жўқорғи Кенгеси Раиси ўринбосари Атабек Давлетов Фармон ижросини таъминлаш мақсадида ҳар бир депутат ўзининг йиллик дастурини ишлаб чиқиши, йил давомида ўз сайлов округида фармонга мувофиқ амалга оширилган ишларни қайд қилиб бориши, қолаверса тадбиркорларга амалий кўмак бериши лозимлигини айтиб ўтди.

Шунингдек, ҳар бир депутат ўз сайлов округида фармоннинг мазмун-моҳиятини кенг ташвиқот қилиши кераклиги, бунда буклетлар, тарқатма материаллардан фойдаланган ҳолда иш олиб бориш яхши самара бериши таъкидланди. Жўқорғи Кенгеснинг тумандан сайланган депутатлари ва туман Кенгаши депутатлари бу борада депутатлик назоратини ўрнитиши лозимлиги, депутатлик мақомидан фойдаланиб фармон ижросини таъминлашда сусткашлик ва лоқайдликка йўл қўйган корхона-ташкилот масъуллари устидан шикоят қилиши мумкинлиги эслатиб ўтилди.

 Айтиш керакки, мазкур фармон халқимиз ҳаётига кўплаб енгилликлар, ижобий ўзгаришларни олиб келади. Галдаги вазифа эса аҳоли орасида, жумладан туманнинг олис қишлоқларида яшовчи фуқароларга тушунтириш-тарғибот ишларини олиб боришдир.

Йиғилиш давомида депутатлар Жўқорғи Кенгес Раиси ўринбосарига ўзларини қизиқтирган саволлар билан мурожаат қилиб, тегишли жавоблар олдилар.

Туман ҳокимлигининг Ахборот хизмати