“Куйдирги касаллигининг табиий ўчоқлардан тарқалишининг олдини олишда ФВДқТ хизматларининг ҳаракатлари” мавзусида тактик-ўқув машқи ўтказилди

Шу йилнинг 15 августида Амударё туманининг Оқ олтин овулида Ўзбекистон Республикаси Бош вазири – Фуқаро муҳофазаси бошлиғининг 2022 йил 14 январдаги 1-сонли буйруғи билан тасдиқланган режага кўра “Куйдирги касаллигининг табиий ўчоқлардан тарқалишининг олдини олишда Фавқулодда вазиятлар давлат қуйи тузилмалари хизматларининг ҳаракатлари” мавзусида махсус тактик-ўқув машқи ўтказилди. Унда фавқулодда вазиятларда уларнинг олдини олиш ва ҳаракат қилишда Давлат тизими ҳудудий қуйи тизими хизматларининг ҳамкорликдаги ҳаракатлари кўргазмали махсус-тактик ўқув машқи тарзида кўрсатиб берилди.

Кўргазмали махсус тактик-ўқув машқига мутасадди мутахассислар,ўзини ўзи бошқариш органлари раҳбарлари, овул фуқаролари, тиббиёт ходимлари иштирок этдилар.

Ўқув машқлари назарий семинар ва амалий қисмларда ўтказилди.       

Тадбирнинг дастлабки қисми – овул ҳудудидаги 71-сонли мактабда бўлиб ўтган назарий семинарда “Куйдирги касаллигининг табиий ўчоқлардан тарқалишининг олдини олишда Фавқулодда вазиятлар қуйи тузилмалари хизматларининг ҳаракатлари” мавзусида Амударё тумани Фавқулодда вазиятлар бўлими бўлинма бошлиғи капитан Беҳзод Тажибаев маъруза қилди.

Тактик-ўқув машқининг назарий қисмида эса туман Санитария-эпидемиологик осойишталик ва жамоат саломатлиги бўлими эпидемиолог врачи Мирзабек Аманқулов “Куйдирги касаллигининг эпидемиологияси ва профилактикаси бўйича олиб борилаётган тадбирлар”, туман Тиббиёт бирлашмаси юқумли касалликлар бўлими шифокори Фарҳод Қўшманов “Куйдирги касаллиги диагностикаси, клиникаси ва даволаш усуллари” ҳамда туман Ветеринария ва чоравачиликни ривожлантириш бўлими бошлиғи ўринбосари Баҳодир Бекчанов “Куйдирги касаллиги эпизотологияси, касалликнинг ҳайвонлардаги клиникаси ва олдини олиш бўйича ўчоқда олиб бориладиган эпизоотияга қарши курашишни ташкил этиш чора-тадбирлари” тўғрисидаги мавзуларда маърузалар қилдилар.

Тактик-ўқув машқининг амалий қисми Амударё тумани Оқ-олтин овулидаги аҳоли уйларида 3 та босқичда ўтказилди.

1-боскичда Оқ-олтин овули ҳудудидаги аҳоли яшаш уйларида куйдирги касаллигига гумон қилинган беморни аниқлаш, раҳбарлар ва хизматларга хабар бериш, беморни алоҳидалаш, ташҳис қўйиш ва шифохонага ётқизиш тартиби кўргазмали тарзда намойиш қилинди.

2-босқичда эса туман Санитария-эпидемиологик осойишталик ва жамоат саломатлиги бўлими ва Тиббиёт бирлашмаси ходимларининг эпидемиологик ва эпизоотологик суриштирув ишларини ўтказиши ва касалликнинг тарқалишининг олдини олиш борасида аҳоли орасида тарғибот-ташвиқот тадбирлари ҳамда тушунтириш ишларини олиб бориш тартиби тушунтирилди.

3-босқичда туман Ветеринария ва чорвачиликни ривожлантириш бўлими томонидан ўчоқда олиб бориладиган профилактик чора-тадбирларни ўтказиш тартиби ва уни бартараф этиш ҳаракатлари амалда синовдан ўтказилди.

Ўқув машқига жами 110 нафар фуқаролар ва 7 та махсус техника жалб этилди.

Ўқув машқи якунида Амударё тумани Фавқулодда вазиятларнинг олдини олиш ва бундай вазиятларда ҳаракат қилиш давлат қуйи тизими хизматлари фавқулодда вазиятлар юзага келганда уларни бартараф этишга тайёр деб баҳоланди.

Ҳамро Матякубов, Амударё туман ФВБ бошлиғи, подполковник.