1-сектор ҳудудида “Огоҳлик−давр талаби” мавзусида йиғилиш бўлиб ўтди

12 август куни Амударё тумани Дарёбўйи маҳалла фуқаролар йиғини ҳудудида жойлашган 21-сонли Болалар мусиқа ва санъат мактаби биносида “Огоҳлик – давр талаби” мавзусида йиғилиш бўлиб ўтди.

Унда туман ҳокими, 1-сектор раҳбари − Султонбой Йўлдашев, Давлат хафвсизлик хизмати Амударё туман бўлими бошлиғи Санжар Назаров, ҳоким ўринбосари Гўзал Сабурова ҳамда 1-сектор ҳудудидаги 12 та овул ва маҳалла фуқаролар йиғини профилактика инспекторлари, фуқаролар йиғинлари раислари, ҳоким ёрдамчилари, хотин-қизлар фаоллари ва ёшлар етакчилари иштирок этишди.

Учрашувда туман ҳокими Султонбой Йўлдашев шу йилнинг 1-2 июль кунлари Нукус шаҳрида бўлиб ўтган оммавий тартибсизликларнинг келиб чиқиш сабаблари ва оқибатлари ҳақида ўз фикр- мулоҳазаларини билдириб, маҳаллалар кесимида ёшлар, аёл-қизлар билан ишлаш тизимини янада такомиллаштириш зарурлигини таъкидлади.

Шунингдек, йиғилишда сўзга чиққанлар жаҳон миқёсида инсон онги ва қалби учун кураш шиддат билан давом этаётганлигини, терроризм ва диний ақидапарастлик оқими ҳар қандай давлатнинг ривожига салбий таъсир кўрсатишини айтиб ўтишди.

Қолаверса, ёшларнинг ахборот асрида ижтимоий тармоқларда тарқалаётган турли хабарларларга кўр-кўрона ишониб кетмасликлари ва бунинг учун албатта, маҳаллаларда фаолият олиб бораётган ёшлар етакчилари, хотин-қизлар фаоллари тарғибот-тушунтириш ишларини янада кучайтиришлари зарурлиги, айниқса, ёшлар етакчилари ёшларнинг бўш вақтини мазмунли ташкил этишларида яқиндан кўмак бериши лозимлиги айтиб ўтилди.

Давлат хафвсизлик хизмати Амударё туман бўлими бошлиғи Санжар Назаров ҳар бир ёш эътибор марказида бўлса ҳуқуқбузарлик ва жиноятлар содир этилишининг олди олиниши ҳамда юртимиздаги тинчлик ва барқарорлик олий неъмат экани, ҳар бир миллатнинг маънавиятини унинг тарихи, урф-одатлари, анъаналари, барҳаёт қадриятлари ташкил этишини ёшларимиз онг шуурига сингдириш лозимлигини айтиб ўтди.

Шунингдек, ёт унсурларнинг турли ваъдаларига ишониб алданиб қолмасдан, балки, юртимизда амалга оширилаётган ислоҳотларга ўз хиссасини қўшиш, ҳалол маҳнат қилишга одатланиш, келгусида малакали мутахассис бўлиб етишишга ҳаракат қилиш бугунги ёшларнинг асосий вазифаларидан бири эканлигини таъкидлади.

Дарҳақиқат, бугунги глобаллашув ва тараққиёт асри ҳар кимдан кучли билим ва тафаккур эгаси бўлишни, замонавий ахборот технологияларидан унумли ва мақсадли фойдаланишни, содир бўлаётган воқеа-ҳодисаларга мустаҳкам инсонийлик позицияси билан ёндашишни талаб этади.

Ёшларни диний экстремизм ва тероризм, “оммавий маданият” ҳамда маънавий таҳдидлар каби салбий иллатлар ва уларнинг зарарли оқибатларидан асраш ҳар бир фуқаронинг бурчидир.

Йиғилиш якунида туман ҳокими томонидан маҳаллаларда ёшлар билан ишлаш борасида аҳамият қаратилиши лозим бўлган тавсиялар ҳамда топшириқлар берилди.

Туман ҳокимлигининг Ахборот хизмати