Ҳоким ёрдамчиси: Асосий мақсадимиз − халқни рози қилиш

Туркманистон Республикасига чегарадош ҳудудлардан бири – Амударё туманининг чекка ҳудудларидан ҳисобланган Дўрман овулида ҳаёт қайнамоқда. Бу ерда истиқомат қилувчи фуқаролар ўтаётган ҳар бир кунидан рози бўлиб, эртанги кунга умид билан яшаётгани юзларида акс этиб турибди.

Дўрман овулида аҳоли бандлигини таъминлаш ҳамда камбағалликни қисқартириш масалалари бўйича ҳоким ёрдамчиси Маҳмуджон Нарбаев ҳам бу борада ўз вазифасини сидқидилдан бажариб, овулда тадбиркорлар сафини кенгайтириш, оилаларнинг даромад манбаларига эга бўлишларини таъминлаш мақсадида тизимли равишда иш олиб бормоқда.

Ҳоким ёрдамчиси ушбу лавозимга тайинланган кунидан эътиборан аҳолини хатловдан ўтказиб, 4 тоифага ажратиб олди. Биринчи тоифага кирувчи яъни, даромади кам, лекин даромад топишга ҳаракат қилаётган хонадон эгаларидан бири, Комил Ҳожибоевнинг фарзандларига 25 сотихдан ер олишида амалий ёрдам берилди. Бугунги кунда Ҳожибоевлар оиласи ўз оилавий тадбиркорлигини йўлга қўйиб қовун, тарвуз, сабзи, пиёз каби полиз маҳсулотларини етиштирмоқда.

Шунингдек, олинган ҳосил бозор расталарига етиб бормасданоқ, харидоргир бўлиб, дала бошида сотилмоқда. Хонадон эгалари етиштирилган полиз маҳсулотларининг биринчи теримида 15-20 млн. сўм атрофида соф даромад кўриш орқали оилавий бюджетининг барқарорлашувига, қолаверса ишсиз ёшларнинг бандлиги таъминланишига ҳам ҳисса қўшди.

 Айтиш керакки, маҳаллаларда иш бошлаган ҳоким ёрдамчилари “хонадонбай” ишлаш орқали аҳоли муаммоларини ўрганиб бевосита ҳал қилмоқдалар.

Дўрман овулида хатловдан ўтказилган 501 хонадонда истиқомат қилувчи 2 минг 661 нафар фуқароларнинг ижтимоий аҳволи ўрганиб чиқилиб, ёрдамга муҳтож фуқароларга амалий ёрдамлар кўрсатилмоқда. Жумладан, ҳоким ёрдамчисининг саъй-ҳаракатлари билан 32 нафар фуқаро доимий иш билан таъминланган бўлса, 34 нафар фуқаро касб-ҳунарга ўқишга йўналтирилди. Шунингдек, 49 нафар фуқарога деҳқончилик билан шуғулланишлари учун ер майдонлари узоқ муддатга ижарага берилди.

Бундан ташқари, ўз тадбиркорлигини чорвачилик йўналиши бўйича йўлга қўйишни истаган 9 нафар фуқарога 221 млн. сўмлик имтиёзли кредит эвазига зотдор сигир ва қўй-эчкилар олиб берилган бўлса, 6 нафар фуқарога 187 млн. сўмлик имтиёли кредит эвазига техника ва асбоб-ускуналар олиб берилиб, бандлиги таъминланди.

Овул аҳолиси орасида тадбиркорликнинг балиқчилик, тикувчилик ва бошқа турлари билан шуғулланиш мақсадида имтиёзли кредит олиб, юқори даромад манбаига эга бўлаётган фуқаролар ҳам анчагина.

Ҳоким ёрдамчисининг бевосита аралашуви ҳамда ёрдами билан бугун ушбу фуқароларнинг бандлиги таъминланиб, оилавий шароити яхшиланмоқда. Энг муҳими, улар ўтаётган ҳар кунидан рози, эранги кунга ишонч билан меҳнат қилмоқдалар.

Туман ҳокимлигининг Ахборот хизмати.