“Маймун чечаги” касаллигини аҳоли ўртасида эпидемик тарзда тарқалиб кетишини олдини олиш чора – тадбирлари тўғрисида семинар бўлиб ўтди

Бугунги кунда оммавий ахборот воситалари ва ижтимоий тармоқлар орқали дунёнинг бир қатор давлатларида, жумладан АҚШ, Канада, Австралия, Испания Португалия, Буюк Британия ва бошқа давлатларда кўплаб ҳолатларда “маймун чечаги” касаллиги қайд этилганлиги тўғрисида маълумотлар тарқалмоқда.

Амударё тумани тиббиёт бирлашмаси ходимларининг хушёрлигини ошириш мақсадида Қорақалпоғистон Республикаси Санитария – эпидемиологик осойишталик ва жамоат саломатлиги бошқармасининг кўрсатмаси асосида тиббиёт ходимлари ўртасида “Маймун чечаги” касаллиги ва аҳоли ўртасида эпидемиявий тарқалиб кетишининг олдини олишга қаратилган семинар ўтказилди.

Семинарда туман тиббиёт бирлашмаси ходимлари иштирок этишди. Йиғилишда туман Санитария – эпидемиологик осойишталик ва жамоат саломатлиги бўлими эпидемиология ва иммунопрофилактика бўлими мудираси Гулшод Тажибоева давлатимизга касаллик кириб келишини олдини олишга қаратилган чоралар тўғрисида сўз юритди.

Мутахассисларнинг айтишига кўра, “Маймун чечаги” касаллиги табиий ўчоқли, зооноз касаллик бўлиб, Марказий ва Ғарбий Африканинг айрим ҳудудларига хос ҳисобланади. Касаллик биринчи навбатда Африканинг эпидемик нохуш бўлган ҳудудларига борган фуқаролар ўртасида қайд этилиб, кейинчалик бемор одамдан соғлом одамга юқиш ҳолатлари аниқланган. Хасталик иситма ва танада тошмалар пайдо бўлиши билан намоён бўлаяпти.

Семинар давомида касаллик 99 фоиз ҳолатда енгил кечиши, ҳамда касалликнинг клиник белгилари сифатида эти увишиш, қалтираш, тана ҳароратининг кўтарилиши, лимфа безларининг катталашиши ва терида тошмалар тошмалар тошиши айтиб ўтилди. Шунингдек, ушбу касалликнинг аҳоли ўртасида тарқалиб кетишининг олдини олиш мақсадида ташкил этилган семинарда шифокорлар томонидан ўзларини қийнаётган муаммолари ўртага ташланди ва уни қандай ечимини топпиш масалалари тушунтириб ўтилди.

Маълумот ўрнида шуни айтиб ўтиш жоизки, Жаҳон соғлиқни сақлаш ташкилотининг ижтимоий тармоқлар орқали берган маълумотларига кўра, тиббиёт тарихида маймун чечаги касаллигининг одамга юққанлиги 1970 йилда аниқланган. Касалик бўйича кузатув чоралари ва янги ҳолатларни тезда аниқлаш касалликни назорат қилиш муҳим аҳамиятга эга ҳисобланади.

Шунингдек, ушбу семинар касалликнинг кириб келиши ва тарқалишининг олдини олиш, касаллик бўйича шифокор ва тиббиёт ҳодимларига замонавий билим, кўникмаларни ўргатиш ҳамда унинг эпидемиологик назорати, даволаш усуллари, профилактикаси сифатини яхшилаш ҳамда ушбу касалликнинг одамларга бўлган хавфини камайтириш мақсадида ташкил этилди.

Йиғилиш давомида ушбу касалликнинг белгилари, унга қарши кўриладиган чора – тадбирлар тўғрисида маълумот ва тавсиялар берилди. Семинар иштирокчилари ўзлари қизиқтирган саволларга мутахассислардан жавоб олишди.

 Севара ИСМОИЛОВА, ҚДУ талабаси