Одам савдоси, мажбурий меҳнат ҳамда коррупцияга қарши курашиш масалаларига бағишланган йиғилиш бўлиб ўтди

Бугунги кунга келиб асримизнинг жиддий муаммосига айланган одам савдосига қарши кураш халқаро, минтақавий, кўп ва икки томонлама муносабатларни талаб этмоқда. Ҳозирга қадар жиноятчиликнинг ушбу турига қарши курашиш ва унинг олдини олиш мақсадида Бирлашган Миллатлар Ташкилотининг бир қатор халқаро тавсиявий ва мажбурий характерга эга ҳужжатлари қабул қилинган бўлиб, улар доирасида ушбу хавфга қарши дунё миқёсида тегишли чора-тадбирлар кўрилмоқда.

Амударё туманида ҳам ушбу иллатларга қарши курашиш ҳамда жамоатчилик назоратини кучайтириш бўйича кўплаб самарали ишлар амалга оширилмоқда.

13 май куни Амударё тумани ҳокимлигининг мажлислар залида одам савдоси,  мажбурий меҳнат ва коррупцияга қарши курашишга бағишланган йиғилиш бўлиб ўтди.

Йиғилишда Амударё тумани ҳокими, Одам савдосига ва мажбурий меҳнатга қарши курашиш бўйича Амударё тумани комиссияси раиси Султонбой Йўлдашев, Қорақалпоғистон Республикаси Одам савдосига ва мажбурий меҳнатга қарши курашиш бўйича ҳудудий комиссияси масъул котиби, Қорақалпоғистон Республикаси Жўқорғи Кенгаси депутати Зуҳра Реимова, ҳудудий комиссия аъзолари ҳамда туман комиссия аъзолари, ҳокимлик масъул ходимлари иштирок этишди. Йиғилишни туман ҳокими Султонбой Йўлдашев очди ва олиб борди.

Йиғилишда Одам савдосига ва мажбурий меҳнатга қарши курашиш бўйича Амударё тумани комиссияси томонидан амалга оширилаётган ишлар ҳамда Коррупцияга қарши курашиш ҳудудий Кенгашининг 2022 йил биринчи ярим йиллик иш режасига асосан туманда амалга оширилган ишлар муҳокама қилинди.

Йиғилишда таъкидланганидек, коррупцияга қарши курашиш Ўзбекистонда давлат сиёсатининг энг устувор йўналишига айланиб улгурди. Буни сўнгги йиллларда соҳага оид қабул қилинган норматив-ҳуқуқий ҳужжатлар, коррупцияни олдини олишга қаратилган маъмурий ислоҳотлар мисолида ҳам кўриш мумкин.

Йиғилиш давомида ҳудудий комиссия раиси Зуҳра Реимова кун тартибидаги масалалар юзасидан ўз фикрларини билдириб ўтди. Шунингдек, йиғилиш иштирокчиларига Коррупцияга қарши курашиш ҳудудий Кенгашининг 2022 йил биринчи ярим йиллик иш режасига асосан амалга оширилган ишлар тўғрисида маълумотлар берди.

Жумладан, Коррупцияга қарши курашиш бўйича ҳудудий Кенгашлар ўз ҳудудида коррупцияга қарши курашиш бўйича фаолиятни амалга оширувчи, соҳага оид давлат дастурларининг амалга оширилишини таъминловчи ва унда иштирок этувчи органлар ҳамда ташкилотлар фаолиятини мувофиқлаштирувчи тузилма ҳисобланиши, тузилма вазифасига коррупцияга қарши курашиш соҳасидаги давлат дастурларининг амалга оширилишини таъминлаш, соҳадаги ташкилотлар фаолиятини мувофиқлаштириш, аҳолининг ҳуқуқий онгини юксалтириш, коррупция ҳолати ва тенденцияларига доир ахборотни йиғиш ва таҳлил қилиш, аксилкоррупция чоралари бўйича мониторинг ҳамда соҳадаги қонун ҳужжатларини такомиллаштириш бўйича таклифлар бериш каби бир қанча вазифалар юклатилгани, ҳамда ушбу режаларга мувофиқ  туманларда қандай ишлар ташкил қилинганлиги тўғрисида батафсил маълумотлар бериб ўтди.

Йиғилиш якунида кун тартибида кўриб чиқилган масалалар юзасидан тегишли қарорлар қабул қилинди.

Туман ҳокимлигининг Ахборот хизмати