ХОТИРА ВА ҚАДРЛАШ КУНИДА АМУДАРЁЛИК МЕҲНАТ ФРОНТИ ФАХРИЙЛАРИГА СОВҒАЛАР ТОПШИРИЛДИ

Юртимизда 9 май умумхалқ байрами – Хотира ва қадрлаш куни сифатида кенг нишонланади. Иккинчи жаҳон урушида ҳалок бўлган аждодлар хотирасига чуқур ҳурмат бажо келтириб, фашизмга қарши жангларда, меҳнат фронтида жонбозлик кўрсатган фахрийларга алоҳида эътибор ва эҳтиром кўрсатилади. Шу муносабат билан амударёлик бир гуруҳ мутасаддилар туманимизнинг барча овул ва маҳаллаларида бўлиб, меҳнат фронти фахрийлари ҳолидан хабар олдилар.

9 май куни туман ҳокими Султонбой Йўлдашев ҳам туман ҳудудидаги меҳнат фахрийлари хонадонларига ташриф буюрди.

Туманимизда 50 нафарга яқин меҳнат фронти фахрийлари яшаб келмоқда. Туман ҳокими Султонбой Йўлдашев ҳудудларга бориб бугунги замонамиз қаҳрамонлари ҳолидан хабар олди ва улар билан машъум уруш йилларидаги хотиралари ҳақида суҳбатлашди. Байрам муносабати билан совғалар бериб, ўша йиллардаги залворли меҳнатлар эвазига бунёд бўлган бугунги тинч ва осойишта ҳаёт учун уларга миннатдорчилик билдирди. Ташриф давомида мактаб ўқувчилари уруш йилларидаги қўшиқларни куйлаб, тинчлик ҳақида шеърлар айтиб, нуронийлар кўнглини хушнуд этдилар.

Маълумки, Президентимизнинг 1 майдаги тегишли Фармонида 9 май арафасида уруш қатнашчилари, концлагерлар маҳбуслари ва Ленинград қамалида бўлган фуқароларга 15 миллион сўмдан бериш кўзда тутилган эди. Шунингдек, эҳтиёжманд аҳолининг ижтимоий ҳимоясини янада кучайтириш чора-тадбирлари юзасидан ўтказилган видеоселектор йиғилишида мутасаддиларга ёлғиз яшаётган ва ўзгалар парваришига муҳтож одамлардан шахсан хабар олиб, уларга совға-саломларни етказиш, уруш қатнашчилари, концлагерлар маҳбуслари ва Ленинград қамалида бўлган фуқароларнинг ҳар бирининг хонадонига шахсан бориб, пул мукофоти ва қимматбаҳо совғаларни  тантанали равишда топшириш, 10 минг нафар фронт ортида меҳнат қилган фахрийлар билан шахсан учрашиб, ҳолидан хабар олиш ва совға-саломлар етказиш топширилди.

Шунга кўра, Қорақалпоғистон Республикаси Вазирлар Кенгаши раисининг ўринбосари — Оила ва хотин-қизлар қўмитаси бошлиғи Марям Аҳмедова ҳам Амударё тумани ҳокими ўринбосари — оила ва хотин-қизлар бўлими бошлиғи Гўзал Сабурова билан биргаликда амударёлик юз ёшдан ошган онахонлар ҳолидан хабар олишди.

Хизр эли маҳалласида истиқомат қилувчи 107 ёшли онахон Парда Бекниёзова ҳамда Чойкўл овулида яшовчи 105 ёшли Катча Бекановаларга эсдалик  совғаларини топширишди. Меҳмонлар онахонларни 9 май — Хотира ва қадрлаш куни байрами билан муборакбод этиб, уруш даврида ва урушдан кейинги йилларда меҳнат фронтида қилган машаққатли хизматларини эътироф этишди. Халқимизнинг бугунги тинч ва осойишта замонларга етиб келишига ўзларининг муносиб ҳиссаларини қўшган меҳнат фронти фахрийларига эсдалик совғаларини топширишди.

Шунингдек, туман прокурори Азиз Рўзметов ҳам туман ҳудудидаги фронт орти меҳнат фахрийлари ҳолидан хабар олиш учун уларнинг хонадонларига ташриф буюрди. Прокурор фахрийлар билан суҳбатлашиб, байрам билан табриклади. Уларга Ватан тинчлиги йўлидаги хизмати ва фидокорона меҳнатлари учун миннатдорчилик билдириб, совғалар топширди.

Шу куни Миллий гвардиянинг тумандаги Қўриқлаш бўлими, туман Ички ишлар бўлими, давлат хавфсизлик хизмати чегара қўшинлари ҳарбийлари ва фуқаролар йиғини масъуллари Дўрман овулида яшовчи 90 ёшдан ошган Йўлдош бобо Матмуродовнинг хонадонига ташриф буюрдилар.

Урушда мардларча қаҳрамонлик кўрсатган фахрийларимизнинг юртимиз тинчлиги учун чеккан заҳмати, уруш орти меҳнат фронтида жонбозлик кўрсатиб, ҳаёт қийинчиликларини сабот билан енгган ота-боболаримизнинг машаққатли ҳаёти биз учун ҳақиқий ибрат мактабидир.

Озода Худойберганова