Томорқа − юқори даромад манбаи

Бугунги кунда томорқа қишлоқ аҳолисининг асосий даромад манбаига айланиб бормоқда. Аслида ҳам, томорқа – ризқ-рўз, қўшимча даромад манбаи, бандликни, арзончиликни таъминлашнинг самарали усулидир. Меҳнатга иштиёқ, ҳавас бўлса, инсон нафақат ўз ҳаётини балки оила аъзоларини турмушини ҳам фаровон қила олади. Буни яхши англаган Амударё тумани аҳолисининг асосий қисми ўз томорқаларида иссиқхоналар ташкил қилиб, яхшигина даромад манбаига эга бўлишмоқда.

Ўз томорқаларидан унумли фойдаланаётган фуқаролар билан суҳбатлашиш ҳамда зарурий тавсиялар бериш мақсадида Ўзбекистон фермер, деҳқон хўжаликлари ва томорқа ер эгалари Кенгашининг Амударё туманига бириктирилган вакили Умрзоқ Раҳматов масъуллар билан биргаликда Қорамон маҳалласида учрашув ўтказди.

Учрашув давомида давлатимиз раҳбари томонидан 2021 йил  1 апрель санасида имзоланган “Деҳқон хўжалиги тўғрисида”ги қонуннинг мазмун-моҳияти хақида кенг тушунчалар бериб ўтилди.

Таъкидланганидек, “Деҳқон хўжалиги тўғрисида”ги қонунга кўра, 18 ёшга тўлган, муомалага лаёқатли бўлган, ўзига деҳқон хўжалигини юритиш учун ер участкаси мерос қилиб қолдириладиган умрбод эгалик қилиш ёки ижара ҳуқуқи асосида берилган Ўзбекистон фуқароси ёки Ўзбекистон ҳудудида доимий яшовчи фуқаролиги бўлмаган шахс деҳқон хўжалиги бошлиғи бўлиши мумкин.

Шунингдек, қонун билан белгиланганидек, деҳқон хўжаликларидан давлат божи ва йиғим ундирилмайди, деҳқон хўжалигини юритиш учун 6 сотихдан 1 гектаргача бўлган ўлчамда ер участкалари берилади. Қишлоқ хўжалигига мўлжалланган ерларнинг асосий экиндан бўшаган қисми 6 сотихдан 10 гектаргача бўлган ўлчамда бир йилгача бўлган муддатга иккиламчи ижарага берилиши мумкин. Берилган ер участкасидан фақат қишлоқ хўжалиги маҳсулотлари етиштириш учун фойдаланилиши керак.

Масъуллар маҳалланинг фаол аъзоси, ўз томорқасида бир неча йиллардан буён иссиқхона ташкил қилиб, юқори даромад манбаига эга бўлиб келаётган Янгибой Султоновнинг хонадонида бўлишди. Меҳмонлар Янгибой Султоновнинг иссиқхонасида помидор ва бодрингнинг бир неча хил навлари, булғор қалампири ва эртаги тарвуз ниҳоллари барқ уриб ривожланаётганлигига ҳамда оиланинг ўз чорваси, паррандаси борлиги даромадига яна даромад қўшаётганига гувоҳ бўлишди.

Дарҳақиқат, Президентимиз томонидан пухта ўйланган режалар асосида узоқни кўзлаб қабул қилинаётган фармон ва қарорлар аввало аҳолининг энг муҳим озиқ-овқат маҳсулотларига бўлган талабини тўлақонли таъминлашга, олтинга тенг бўлган суғориладиган ер майдонларимиздан самарали фойдаланиш орқали кўпроқ маҳсулот етиштириш ва ички бозорда озиқ-овқат маҳсулотлари нарх-навосининг барқарорлигини таъминлашга хизмат қилмоқда.

Зеро, деҳқон хўжаликларига ва томорқа ер эгаларига кўрсатилаётган ғамхўрликлар замирида қишлоқ жойларда яшовчи оилаларни қўллаб-қувватлаш, уларнинг даромадларини кўпайтириш, турмуш тарзини янада яхшилашга қаратилган олийжаноб мақсад мужассамдир.

Туман ҳокимлигининг Ахборот хизмати