Ғаллачилик соҳасига сув тежовчи технологиялар жорий қилинмоқда
Деҳқонлар йил давомида меҳнат қилиб, тақир ердан мўл ҳосил ундириб, эл-дастурхонини бойитишга қодир инсонлардир.
Амударё туманида ҳам буғдой, пахта ва бошқа экинларидан юқори ҳосил олиб, халқимиз фаровонлигига ҳисса қўшаётган миришкор-деҳқонлар ва уларнинг издошлари жуда кўплаб топилади. Туманимиздаги Бобур номли овул ҳудудида бўлганимизда деҳқончилик турларининг барча йўналишларида олиб борилаётган ижобий ишларнинг гувоҳи бўлдик. Ҳудудда 22 фермер хўжалиги бўлиб улар кўп тармоқли фаолият юритади. Уларга “Зарбдор” муқобил машина-трактор парки хизмат кўрсатади. Фермер хўжаликлари пилла, буғдой, пахта ҳосилидан ташқари кўплаб донли экинларни, сабзавот турларини экиб, ўстириб, тарбиялаб мўл ҳосил етиштириб келмоқдалар.
Ҳудуддаги “Абдулла” фермер хўжалиги ҳам шулар жумласидан. Мазкур хўжалик ҳам кўп тармоқли хўжаликларидан ҳисобланади. Фермер хўжалигига Пўлат Абдуллаев раҳбарлик қилиб келмоқда. Деҳқончилик сирларини элга машҳур боболаридан мерос қилиб олган Пўлат ўз вазифасига астойдил меҳр қўйиб, хўжаликнинг йилдан йилга ривожланиб боришига эришди. Аниқ режа, мақсадли қўйилган қадамлар ўзининг самарасини бериб, хўжаликнинг моддий техника базаси ҳам мустаҳкамланиб борди. Ҳозирги кунда хўжаликда 4 та замонавий сурим трактори, қудратли дон комбайни, барча зарур қишлоқ хўжалиги ускуналари мавжуд.
Хўжалик аъзолари ўтган йили дастлабки ҳосил 17 қути ипак қурти боқиб-ўстириб 53 килограмм пилла ҳосили етиштирдилар. Дастлабки ҳосил олиш бўйича давлат режасининг муваффақиятли адо этилиши хўжалик аъзоларини янги марралар сари етаклади. Хўжаликда давлатга буғдой, пахта ҳосили етиштириб бериш режалари ҳам ортиғи билан бажарилди. Фермер хўжалиги йил охирига келиб 1 миллиард сўмга яқин даромад олишга эришди. Бу маблағ қишлоқ хўжалиги учун сарф қилинган харажатларни қоплаш билан бирга келаси йил учун минерал ўғитлар, ёнилғи-мойлаш маҳсулотлари, эҳтиёж қисмлар заҳирасини яратишга ҳам имконият яратди.
Хўжаликда ўтган йили кузда бу йилги ҳосил учун 36 гектар майдонга “Гром” навли уруғлик буғдой экилди. Шу майдоннинг 10 гектарида ёмғирлатиб суғориш йўлга қўйилган. Бу янгича усул сувни тежашга, шу билан бирга ерни суғоришга кетадиган харажатни тежашга қаратилгани билан аҳамиятлидир. Сув тақчилиги кузатилаётган шароитда бу усул ўз самарасини бериши кўзда тутилмоқда. Юксак агротехника қоидалари асосида тарбияланаётган буғдой майсалари келгусидаги мўл ҳосилдан дарак бериб турибди. Хўжалик аъзолари ҳар бир гектар буғдой майдонидан камида 45-50 центнердан ҳосил олиш учун астойдил меҳнат қилмоқдалар.
Шу билан бир қаторда баҳорги экиш ишлари олдидан чигит экиладиган майдонларнинг ҳам шўри ювилиб, қондириб суғорилган.
Хўжалик аъзолари 51 гектар майдонга “Султон” навли чигит экиб, гектаридан ўртага 40 центнердан пахта ҳосили ундиришга бел боғлаганлар. Хўжаликда 29 нафар ижарачи баракали меҳнат қилмоқда.
Фермер хўжалиги раҳбарияти ва ишчиларининг олдига қўйган мақсадлари улуғ. Шундай экан, улуғ мақсадларни кўзлаб олға интилаётган юртдошларимизнинг келгуси ишларида омадлар тилаймиз.
Ўрозали РЕЙИМОВ.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
