Зулфия — тонг куйчиси

Зулфия Исроилова таниқли ва иқтидорли ўзбек шоираси, инсон қалбини ўткир ҳис қилган-меҳнаткаш, шарқ аёлининг жамиятдаги тенг ҳуқуқи учун мардонавор курашган аёл. Зулфия шеъриятининг нуфузи бизнинг бугунги мураккаб давримизнинг ҳаққоний ифодаси, замондошларимизнинг қалби ва ҳаракатларининг ёрқин тасвиридир. У халқимизнинг атоқли ва ардоқли вакили, таниқли жамоат арбоби, халқаро тинчлик учун кураш жарчиси, халқаро “Нилуфар”, Жавоҳарлал Неру номидаги Давлат мукофоти соҳибаси эди.

Зулфияхоним ўзбек шеъриятида ўзига хос ўринга эга шоира бўлиши билан бирга инсон сифатида ҳам шу халқнинг барча олийжаноб хислатларига эга аёл бўлган. Шоиранинг ҳаёти ва ижоди барча хотин-қизлар учун ибрат. Негаки, унинг ҳаётдаги меҳнатсеварлиги, доимо олға интилиши, севги бобида садоқати, бадиий ижод борасида тинимсиз изланувчанлиги ҳамда ҳаёт қийинчиликларидан эсанкирамаслиги, эришилган ютуқлар олдида ўзини йўқотмаслиги ҳар қандай қиз ёки аёл қалбида ҳавас уйғотади.

Мамлакатимизда баҳорни шоира Зулфия Исроилова таваллуд топган кунни нишонлаш билан кутиб олиш анъанага айланган. Шу муносабат билан мактабимизда “Зулфия тонг куйчиси” номли маънавий-маърифий  тадбир ўтказилди. Тадбирда она тили ва адабиёт фани ўқитувчиси З.Сапарова Зулфия ҳаёти ва ижоди ҳақида маъруза қилди. Тадбирда 7-, 8-, 9-синфлар қизлари фаол қатнашиб, Зулфияхоним шеърларидан ифодали айтдилар ҳамда куй, қўшиқ ва рақс ижро қилдилар. Зулфия ҳаётидан саҳна кўриниш намойиш қилинди. Тадбир сўнггида фаол иштирокчилар Фахрий ёрлиқ ва эсталик совғалар билан тақдирланди.

Дилдора Холбаева, 82-сонли мактаб ижодий-маданий ишлар бўйича тарғиботчиси.