Юридик хизмат кўрсатиш маркази фаолияти кенгаймоқда

Мамлакатимизда давлат органлари ва ташкилотларига юридик хизмат кўрсатиш фаолиятини янада такомиллаштириш, улар фаолиятини, айниқса, қуйи бўғинда ҳуқуқий жиҳатдан таъминлаш, сифатли ва профессионал юридик хизмат кўрсатишга қаратилган ислоҳотлар босқичма-босқич амалга ошириб келинмоқда. Соҳага тажрибали  кадрларнинг жалб қилинмаганлиги ҳужжатлар лойиҳаларининг иқтисодий, молиявий ва ҳуқуқий экспертизадан ўтказилиши сифатига салбий таъсир кўрсатаётган эди. Бу ўз навбатида қабул қилинаётган ҳужжатлар юзасидан жойларда жисмоний ва юридик шахсларнинг эътирозига сабаб бўлаётган эди.

Президентимизнинг тегишли қарорига кўра, 2021 йил 1 октябрдан бошлаб, Қорақалпоғистон Республикаси Адлия вазирилиги, вилоятлар ва Тошкент шаҳар Адлия бошқармалари ҳузурида мамлакатимизнинг барча туман ва шаҳарларида юридик хизмат кўрсатиш марказлари фаолияти йўлга қўйилди.

Ушбу марказлар зиммасига юридик хизмат кўрсатиладиган давлат органлари ва ташкилотлари фаолиятини  ҳуқуқий жиҳатдан таъминлаш, уларга малакали юридик ёрдам кўрсатиш, давлат ташкилотлари ходимларининг ҳуқуқий саводхонлиги ва ҳуқуқий маданиятини ошириш, давлат ташкилотларининг мулкий ҳамда бошқа ҳуқуқлари ва қонуний манфаатлари ўз вақтида самарали ҳимоя қилинишини таъминлаш, давлат ташкилотлари томонидан қабул қилинаётган ҳужжатларнинг қонуний ҳамда  ҳар томонлама пухта ва сифатли бўлишини таъминлаш каби кўплаб масъулиятли вазифалар юкланган.

Шунингдек 2021 йил 1 октябрдан бошлаб давлат ташкилотларига юридик хизмат кўрсатиш билан боғлиқ  барча маълумот ва жараёнларни тўлиқ электрон равишда йиғиш, қайта ишлаш, таҳлил қилиш имконини берувчи “Е-huquqshunos” электрон тизимини яратиш ва унга барча маълумотларни жойлаб бориш юклатилди. Қорақалпоғистон Республикаси Адлия вазирлиги ҳузурида ташкил этилган  Амударё туман Юридик хизмат кўрсатиш марказида ҳам қарор ижросини таъминлаш, белгилаб берилган масъулиятли вазифаларни адо этиш юзасидан тизимли ишлар олиб борилаяпти.

Марказ томонидан тумандаги  мавжуд 12 та давлат органлари ва ташкилотларига сифатли юридик хизмат кўрсатилмоқда. Бунда давлат органлари ва ташкилотлари билан марказ ўртасида ҳужжатлар маълумотлар алмашинуви “Е-huquqshunos” тизими орқали амалга оширилаётир. Ўтган давр мобайнида  12 та давлат органлари ва ташкилотларида юридик аҳамиятга эга бўлган ҳужжатлар лойиҳаларини ҳуқуқий экспертизадан ўтказиш жараёнида 166 та ҳужжат қонунга зид эканлиги аниқланиб, мувофиқлаштирилди. 17 ҳужжат умуман қонунларимизга мос келмаганлиги учун ҳуқуқий экспертизадан ўтказиш рад этилди, туман Тиббиёт бирлашмасида 12 нафар ходимнинг ишдан бўшалатилишининг олди олинди.

Шунингдек, аҳолидан тушган 2 та мурожаат ҳам кўриб чиқилиб, ҳуқуқий ёрдам берилди.

Келгуси 2022 йилда марказ ҳуқуқий хизмат кўрсатадиган давлат органлари ва ташкилотлари сони яна 6 тага кўпаймоқда. Бу марказда фаолият кўрсатаётган 6 нафар ходимларга яна ҳам улкан масъулият юклайди.

Ойгул РАЖАБОВА.