“ЗЎРАВОНЛИКСИЗ ҲАЁТНИ БИРГА ҚУРАМИЗ!” ТАДБИРИ ЎҚУВЧИ-ЁШЛАР ВА ОТА-ОНАЛАР ҚАЛБИДАГИ МЕҲР-МУҲАББАТ ТУЙҒУСИНИ МУСТАҲКАМЛАДИ

Жорий йилнинг 25 ноябридан 10 декабрь санасига қадар Республика Ташхис Маркази томонидан  “Биз зўравонликка қаршимиз” мавзусида семинар-тренинглар ташкил қилиш бўйича аксия эълон қилинди. Бу акцияда мактаб ўқувчилари, педагоглар, ота-оналар жамоаси иштирок этиб, мактаб психологлари томонидан турли мавзуларда давра суҳбатлари, учрашувлар, семинар-тренинглар ўтказилди. Жумладан, 70-сонли мактабда ҳам “Зўравонликсиз ҳаётни бирга қурамиз” мавзусида очиқ эшиклар куни ташкил қилинди. Тадбирда ҳудуддаги ота-оналар, маҳалла фаоллари, педагоглар ва мактаб ўқувчилари иштирок этдилар.

“Очиқ эшиклар куни” тадбири 4-синф ўқувчилари ташкил этган “Болаларга беринг дунёни!” мавзусидаги кўргазма билан танишишдан бошланди. Кўргазма ўқувчиларнинг қўл меҳнатларини, айниқса табиатга бўлган муносабатини кенг ёритиб берди. Ўқувчилар кўргазмада ўзлари ясаган турли хилдаги қушлар учун уялар, уй ҳайвонларига уйчалар,  ақлли роботлар ва бошқа буюмларни намойиш этдилар.

Ушбу кўргазмани ташкил этишдан мақсад, ўсиб келаётган ёш авлодни табиатга, она Ватанга, ота-онага меҳр-муҳаббат руҳида тарбиялашдан иборат.

Шундан сўнг, инглиз тили фани ўқитувчиси Ўғилжон Гаипова хорижий тиллар тўгараги фаоллари билан очиқ дарс ташкил қилди. очиқ дарсда ўқувчилар дунё халқлари ҳаёти, турли мамлакатлардаги болалар ҳуқуқларини ҳимоя қилиш бўйича маълумотлар билан танишдилар.

Сўнгра “Зўравонликсиз ҳаётни бирга қурамиз!” шиори остида кенгайтирилган тадбир ҳам ташкил қилинди. Тадбирни мактабнинг маънавий-маърифий ишлар бўйича директор ўринбосари Гулимбой Юсупов очиб берди. Маҳалла фаолларидан Сайёра Ражабова сўзга чиқиб, “Биз зўравонликка қаршимиз” аксияси доирасидаги тадбир учун яхши мавзу танланганлиги, асосан ота-оналарнинг таклиф қилиниб, бундай тадбирда иштирок этиши фарзандлари билан ота-оналар ўртасидаги меҳр-муҳаббатнинг яна ҳам мустаҳкамлашини таъкидлади.

Тадбирда 1-синф ўқувчилари саҳналаштирган “Шолғом” эртаги намойиш этилиб, куч бирликда эканлигини тадбир иштирокчиларига ўз ижролари орқали саҳнада кўрсатиб бердилар.

Шундан сўнг, мактаб психологи томонидан “Қаламлар” эртаги ифодали ўқиб эшиттирилди. Тадбир сўнггида “Ибрат” ҳикояси ҳам ўқиб эшиттирилди ва иккала ҳикоя юзасидан ўқувчиларнинг ва ота-оналарнинг фикрлари тингланди.

Тадбирни ташкил қилишдан мақсад - ҳар қандай ёмон иллатларнинг олдини олиш, ўқувчиларга меҳр-туйғусини сингдириш, кечиримли бўлишни ўргатишдан иборат. Шундай экан, азизлар, келинг, зўравонликка йўл бермайлик, бир-биримиздан меҳр-муҳаббатимизни аямайлик!

М.ХАЛИЛЛАЕВА.