ЎЗБЕКИСТОН РЕСПУБЛИКАСИНИНГ ИТАЛИЯДАГИ ФАВҚУЛОДДА ВА МУХТОР ЭЛЧИСИ ТУМАНИМИЗГА ТАШРИФ БУЮРДИ

Жорий йилнинг 14 декабрь куни Ўзбекистон Республикасининг Италиядаги Фавқулодда ва Мухтор элчиси Отабек Акбаров Амударё туманига ташриф буюрди. 

Элчи Амударё тумани ҳокими Султонбой Йўлдашев томонидан кутиб олинди ва Амударё устига қурилаётган кўприк ва темир йўл қурилиши ишларининг бориши билан танишди. Шунингдек, элчи туманда инвестиция дастури доирасида амалга оширилаётган лойиҳалар билан танишиш мақсадида “Амударё томорқа хизмати” МЧЖ томонидан ташкил этилган томорқачилик кластери ва “MANGIT XOLODILNIK” МЧЖнинг музлатгичли омборхона лойиҳаларини кўздан кечирди.

Шу куни туман ҳокимлиги мажлислар залида томонлар ва салоҳиятли тадбиркорлар иштирокида учрашув ўтказилди. Унда туманнинг асосий иқтисодий кўрсаткичлари, инвестицион салоҳияти, амалга оширилаётган ҳамда истиқболли лойиҳалар тўғрисида тақдимот ўтказилди.

Тақдимотда туман ҳокими ўринбосари, инвестциялар ва ташқи савдо бўлими раҳбари Рашид Салаев лойиҳалар ҳақида батафсил маълумот берди. Шунингдек, томонлар туманда интенсив боғлар ташкил қилиш, мева-сабзавотни қайта ишлаш каби лойиҳаларни амалга ошириш учун мавжуд шароитларни инобатга олиб, инвесторларни жалб қилиш масаласини ҳам муҳокама қилдилар.

Ташриф давомида элчи тумандаги тадбиркорлик субъектлари билан қишлоқ хўжалиги маҳсулотларини қайта ишлаш орқали джем, пьюре, шарбат ишлаб чиқариш каби лойиҳаларни амалга ошириш бўйича оғзаки келишувларга эришилди.

Ҳозирда ушбу лойиҳаларни амалга оширишда хорижий инвесторлар аниқланмоқда.

Шуни алоҳида таъкидлаш керакки, ўтган йилнинг 23 декабрь куни ҳам Президентимиз Шавкат Мирзиёев ташаббуси билан ҳудудларнинг инвестиция ва экспорт салоҳиятини ошириш, янги экспорт бозорларини топиш бўйича амалий ёрдам кўрсатиш мақсадида Ўзбекистон Республикасининг Сингапурдаги Фавқулодда ва Мухтор элчиси Қахрамон Шакиров, Ўзбекистон Республикасининг Италиядаги Фавқулодда ва Мухтор элчиси Отабек Акбаров, Ўзбекистон Республикасининг Хитой Халқ Республикасидаги Фавқулодда ва Мухтор элчиси  Бахтиёр Саидовлар ташриф буюрган эди.

Учрашув давомида Элчилар билан туманнинг инвестицион салоҳиятини ва экспорт кўрсаткичларини ошириш, аҳолига ижтимоий гуманитар ёрдамлар кўрсатиш ва турмуш сифатини ошириш бўйича музокаралар олиб борилган эди.

Натижада жорий йилнинг март ойида Ўзбекистон Республикасининг Хитой Халқ Республикасидаги элчихонаси томонидан тумандаги ишсиз аёллар бандлигини таъминлаш ва ижтимоий ёрдам кўрсатиш мақсадида замонавий тикув машиналари етказиб берилди.

Ушбу тикув машиналардан фойдаланган ҳолда тумандаги “Темир дафтар” ва “Аёллар дафтари”га киритилган 10 нафардан ортиқ ишсиз хотин-қизлар касбга ўргатилиб, бандлиги таъминланди.

Ўйлаймизки, Ўзбекистоннинг Италиядаги Фавқулодда ва Мухтор элчиси Отабек Акбаровнинг ташрифи ҳам туманимиз инвестиция ва экспорт салоҳиятини оширишда муҳим ўзгаришларга асос бўлади.

Ойгул РАЖАБОВА.