Сенатор Баҳодир Тожиев иштирокида туманда боғдорчилик ва узумчиликни ривожлантириш масалаларига бағишланган йиғилиш бўлиб ўтди
Жорий йилнинг 27 октябрь куни Амударё тумани ҳокимлигининг мажлислар залида туманда қишлоқ хўжалигининг асосий тармоқларидан бўлган боғдорчилик ва узумчилик соҳаларини янада ривожлантириш масалаларига бағишланган йиғилиш бўлиб ўтди.
Йиғилишда Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси раиси Баҳодир Тожиев, соҳа бўйича олимлар, туман ҳокими Султонбой Йўлдашев, тумандаги қишлоқ хўжалиги соҳаси масъуллари, фермерлар, деҳқонлари, томорқа ер эгалари ҳамда тадбиркорлар иштирок этдилар.
Йиғилишда туман ҳокими Султонбой Йўлдашев сўзга чиқиб, сўнгги йилларда мамлакатимизда давлатимиз раҳбари ташаббуси билан қишлоқ хўжалигининг барча тармоқларини, айниқса, узумчилик тармоғини янада ривожлантиришга алоҳида эътибор қаратилаётгани, бу борада янгича тизим яратилгани ҳамда қатор устувор вазифалар белгилаб берилгани хусусида сўз юритди.
Таъкидланганидек, мамлакатимизда узумчиликни янада ривожлантириш, узум етиштириш, уни қайта ишлаш, тайёр маҳсулот ишлаб чиқариш бўйича кластер тизимини йўлга қўйиш, алкоголь бозорини тартибга солишнинг самарали механизмларини кенг жорий этган ҳолда республикани сифатли маҳсулотлар билан таъминлаш, соҳанинг экспорт салоҳиятини кучайтириш, инвестицион жозибадорлигини ошириш, шунингдек, виночилик туризмини (энотуризм) ривожлантиришга катта эътибор қаратилиб, бу борада янги имкониятлар яратилмоқда.
Шу мақсадда жорий йилнинг 28 июль куни имзоланган Ўзбекистон Республикаси Президентининг "Узумчиликни ривожлантиришда кластер тизимини жорий этиш, соҳага илғор технологияларни жалб қилишни давлат томонидан қўллаб-қувватлашнинг қўшимча чора-тадбирлари тўғрисида”ги қарори муҳим дастуруламал бўлмоқда.
Сенатор Баҳодир Тожиев Президент узумчиликни ривожлантиришнинг қатор асосий йўналишларини белгилаб бергани хусусида тўхталди. Хусусан, узум етиштиришга ихтисослаштириш учун қулай ҳудудларда энг мақбул майдонларни белгилаш, халқимизнинг асрлар давомида шаклланган миллий деҳқончилик маданияти, қадриятларидан келиб чиқиб, узум етиштиришни миллий маданият сифатида ривожлантириш, узумчиликни йирик майдонларда, кластер ва кооперация усулида етиштириш орқали соҳада қўшилган қиймат занжирини яратиш, узумни сақлаш, саралаш ва қайта ишлашни рағбатлантириш, илмий асосланган ҳолда узум етиштириш, унинг янги ҳосилдор, данаксиз навларини яратиш мақсадида узумчилик илмий мактабини ривожлантириш ҳамда илм-фан ва ишлаб чиқаришнинг узвий интеграциясини йўлга қўйиш каби устувор йўналишлар бўйича амалга оширилиши лозим бўлган вазифалар белгилаб берилганини қайд этиб ўтди.
Йиғилишда таъкидланганидек, 2021 йил 1 августдан бошлаб қишлоқ хўжалигига мўлжалланган ер участкалари (суғориладиган ва суғорилмайдиган (лалми) ерлар) токзорлар барпо этиш ва узумчиликни ривожлантириш учун очиқ танлов асосида ижарага берилиши бошланган бўлиб, ер участкалари очиқ танлов натижаларига кўра 30 йил муддатга ижарага берилиши белгиланган.
Очиқ танлов асосида ижарага олинган ер участкаларидан фақат токзорлар барпо этиш ва узумчиликни ривожлантириш мақсадида фойдаланилиши, очиқ танловга ер участкалари деҳқон хўжаликлари ташкил этган ҳолда токзорлар барпо этиш учун 6 сотихдан 1 гектаргача бўлган ўлчамларда, яхлит контурда йирик токзорлар барпо этиш учун эса 1 гектардан 30 гектаргача бўлган ўлчамларда ижара ҳуқуқи асосида берилиши қайд этилган.
Йиғилиш кун тартибидаги масала юзасидан иштирокчиларнинг қатор саволларига жавоблар берилди ҳамда уларнинг бу борадаги фикр-мулоҳазалари тингланди. Шунингдек, йиғилишда иштирок этаётган қишлоқ хўжалиги соҳаси масъуллари, тадбиркорлар, фермерлар ўз фаолиятлари мобайнида эришаётган ютуқлари, муаммо ва камчиликлари билан ўртоқлашдилар.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
