107 ЁШНИНГ ОСТОНАСИДА ЭЛ-У ХАЛҚ КЕЛАЖАГИ УЧУН ОВОЗ БЕРАМАН!
Парда Бекниёзова, 1915 йилда туғилган, туманимиздаги энг кекса, 106 ёшли сайловчи: - Мен ўз ҳаётим давомида жуда кўп сайловларда иштирок этдим. Бир пайтлар “Сайлов бўлади, сайлов бўлади”, дейишарди-ю, сайлов қачон бўлади, қандай сайлов, депутатни сайлаймизми ёки ҳукумат одаминими, билмасдик. Билганимиз, сайловнинг бўлиши ва сайловнинг ўтиши эди. Сайловдан сўнг “фалончи депутат ё фалончи ҳукуматга бошлиқ бўлибди”, - деган хабарни эшитардик. Советнинг сайловлари шунақа эди. Сайлов участкаси бор-йўқлигини ҳам халқ билавермасди. Халқда эрк, ҳуқуқ бўлмаган-да, дейман ҳозирги сайловларни кўриб.
Мустақиллик халқимизнинг қадр-қимматини, ҳақ-ҳуқуқи, эркини жойига қўйди. Яқинда 106 ёшга тўламан. Ўзбекистон Республикаси Президентини сайлашга мен ҳам тайёргарлик кўрдим. Ҳар куни телевизорда президентликка номзодларнинг “мен сайлансам, ундай қиламан, бундай қиламан”, деган ваъдаларини эшитиб, кўравериб, аллақачон бир хулосага келиб бўлдим. Қолаверса, қишлоғимиздаги сайлов участкасидан йигит-қизлар келишиб, тушунчалар беришаётганининг ўзи аниқ тўхтамга келишим учун катта аҳамият касб этди. Яна, сайлов куни овора бўлиб юришимга ҳам ҳожат йўқ.
“Момо, уйингизга сайлов қутисини олиб келамиз, сизни уринтирмаймиз”, дейишяпти барака топгурлар. Ана шундай имконият яратиб берилаётгани, эмин-эркин ўзи танлаган номзодга овоз беришим учун уйимга кўчма сайлов қутисини олиб келишни ташкил этишаётганидан мамнунман.
24 октябрь – мен учун ҳақиқий байрам. 107 ёшнинг остонасида халқимиз, невара-чевараларим келажаги учун ўзим энг муносиб деб билган номзодга овоз бераман!
Робия ЙЎЛДОШЕВА ёзиб олди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
