ЙИҒИМ-ТЕРИМ МАВСУМИ – ЭНГ МАСЪУЛИЯТЛИ ПАЛЛА

Кузнинг илк  кунлариданоқ йил бўйи қилган фидокорона меҳнатлари маҳсулини кўришга ошиққан деҳқон аҳли борки, дала-ю боғига кўчиб чиқади. Имконларини чамалаб, ҳосил хирмонларини бунёд этишга киришадилар. Кузнинг ҳар бир дақиқаси, айниқса, пахтакорлар учун йил сарҳисобининг залворли рақамлари қайд этиладиган палла. Чунки  ана шу фаслда етиштирилган пахта ҳосили йиғиштириб олинади, кўзланган режалар, лафзлар юксак ҳосил хирмонларида намоён бўлади.

Мамлакатимиз мустақиллигининг 30 йиллиги тантана қилинган жорий йилда амударёлик пахтакорлар ўз олдиларига улкан марраларни қўйдилар. МЧЖ шаклидаги “Аmdurayotex” хорижий корхонаси кластери билан 350 та  пахтачилик фермер хўжаликлари ўртасида  шартномалар тузилиб, 15030 гектар ерга туманимиз иқлим шароитига мос серҳосил навли чигит экилди.

Ҳосилдорликни ҳар гектар ҳисобига 27,2 центнерга, ялпи ҳосил хирмонини 45750 тоннага етказишни режалаштирган фермер хўжаликлари раҳбарлари жорий қишлоқ  хўжалиги йилининг барча мавсум юмушларини агротехника қоидаларига мувофиқ ташкил этдилар.

Юксак Амударё пахта хирмонини бунёд этиш учун, сентябрь ойининг илк кунлариданоқ уюшқоқлик билан бошланган терим суръати туфайли ҳосил хирмонлари қад ростлай бошлади.

Мавсум давомида 12430 гектар майдонда дефолиация ишлари сифатли олиб борилди. Пахта йиғим-теримини кўтаринки руҳда, уюшқоқлик ва жипслик билан амалга ошириш, теримчилар ва кўнгилли ҳашарчилар учун зарур шарт-шароитлар яратиш кабиларига алоҳида эътибор қаратилди. Шуни алоҳида эътироф этиш керакки, ғўза вегетацияси даврида бажариладиган ишлар учун “Аmdurayotex” хорижий корхонаси кластери томонидан  меҳнаткашларнинг иш ҳақларини ўз вақтида ҳисоб-китоб қилиб боришлари учун фермер хўжаликларига 100 млрд. 148 млн. 954 сўм пул маблағлари имтиёзли кредит ҳисобидан амалга оширилгани бугунги йиғим-терим суръатининг юқори бўлишини таъминлади.

Бундан ташқари, етиштирилган пахта ҳосилини кузнинг изғиринли кунларига қолдирмасдан йиғиштириб олиш учун теримчиларнинг иш ҳақлари босқичма-босқич ошириб бориш тартибида ҳисоб-китоб қилиниши белгилангани, қолаверса, йиғим-терим отрядлари раҳбарлари ишни  тўғри ташкил қилганлиги, кунлик терим пуллари кечиктирмасдан бериб борилиши муваффақиятли ютуқларнинг гарови бўлмоқда.

Айни пайтда пахта йиғим-теримининг сифатли ва самарали олиб борилишида туманда ташкил этилган 290 та терим отрядлари ва уларнинг тажрибали раҳбарлари саъй-ҳаракатлари билан фермер хўжаликлари далаларида 23266 нафар теримчи юксак унум билан меҳнат қилишмоқда.

Хусусан, 1-сектор ҳудудидаги фермер хўжаликларидаги 78 та отряд таркибида 5442 нафар, 2-сектор ҳудудидаги фермер хўжаликларида 7826 нафар, 3-секторда 7269, 4-секторда эса 2729 нафар кластер ва фермер хўжаликлари ишчилари ҳамда уюшмаган аҳоли вакилларидан иборат кўнгилли ҳашарчилар туманнинг умумий хирмонига кунига 200 тоннадан ортиқ пахта териб топширишмоқда.

Юксак уюшқоқлик ва жипслик асосида ташкил этилган “Пахта – 2021” йиғим-терим мавсумининг самараси эса залворли рақамларда ўз ифодасини топмоқда.

Деҳқон ва фермерлар учун энг масъулиятли палла – кузги сарҳисоб онлари яқин қолди. Ана шундай масъулиятли даврда белига этак боғлаб, далага чиққан ҳар бир кўнгилли ҳашарчига, деҳқон ва фермерларга: “Ҳорманг, лафзи ҳалол, фидойи ва азиз пахтакорлар” – деймиз.

Робия ЙЎЛДОШЕВА.