Туманимизда чорвачилик ва паррандачилик соҳалари янада ривожланмоқда

Мамлакатимизда чорвачилик тармоғини жадал ривожлантириш, замонавий ва инновацион услубларни жорий этиш, маҳсулотлар ишлаб чиқариш ҳажмини ошириш ва турларини кенгайтириш, шунингдек, аҳолини маҳаллий шароитда ишлаб чиқарилган сифатли ва арзон чорва маҳсулотлари билан узлуксиз таъминлаш ҳамда чорвачиликка ихтисослашган корхоналарни давлат томонидан қўллаб-қувватлаш борасида кенг қамровли ишлар олиб борилмоқда. Шу мақсадда қабул қилинган Ўзбекистон Республикаси Президентининг “Чорвачилик тармоғини давлат томонидан кўллаб-қувватлашнинг қўшимча чора-тадбирлари тўғрисида” қарори бу борадаги тизимли ишларни ташкил этишда муҳим дастуруламал бўлиб хизмат қилмоқда.

Жорий йилнинг 10 август санасида Ўзбекистон Республикаси Вазирлар маҳкамаси ҳузуридаги Агросаноат мажмуйи устидан назорат қилиш инспекцияси Қорақалпоғистон Республикаси бошқармаси чорвачилик ва наслчилик устидан назорат қилиш шўбаси катта инспектори Сарвар Матякубов, Инспекциянинг туман бўлими катта инспектори Жаҳонгир Ҳайдаров туманимизда фаолият юритаётган чорвачилик комплекслари фаолияти билан танишдилар ҳамда соҳада қабул қилинаётган қонун ҳужжатлари мазмун-моҳияти юзасидан тушунтиришлар олиб бордилар.

Хусусан, масъуллар Тўлқин овулидаги наслчилик йўналишидаги “Полвонбой овули” масъулияти чекланган жамиятининг фаолияти билан танишдилар. Мазкур масъулияти чекланган жамиятида жами 245 бош қорамоллар мавжуд бўлиб, чорвачиликни янада ривожлантириш мақсадида Белорусия давлатидан 33 бош наслли қорамоллар олиб келиниши учун давлат томонидан 66 млн сўм субсидия ажратилган.  “Полвонбой овули” масъулияти чекланган жамиятида бир кунда 700 литрга яқин сут маҳсулоти етиштирилади. Аҳолини арзон озиқ-овқат билан таъминлаш, гўшт ва сут маҳсулотларини етказиш мақсадида бозорларда ярмарка ташкил қилинган.

Айтиш керакки, туманда ҳозирги кунда жами 143 та чорвачилик йўналишида фаолият юритаётган тадбиркорлик субьектлари мавжуд. Жумладан, қорамолчилик йўналишида 52 та фермер хўжалиги фаолият олиб бормоқда, шундан 13 таси наслчилик йўналишида, қўй-эчкичилик йўналишида 3 та фермер хўжалиги, балиқчилик йўналишида 75 та фермер хўжалиги, асаларичилик йшналишида 3 та фермер хўжалиги, паррандачилик йўналишида 10 та фермер хўжалиги фаолият олиб бормоқда.

Туманимизда ҳозирги кунда жами 3803 бош қорамоллар мавжуд бўлиб, жорий йил ҳисобига кўра туманга чет давлатларидан жами 165 бош наслли қорамоллар олиб келинган. Ўзбекистон Республикаси Вазирлар Маҳкамасининг “Чорвачилик тармоғига давлат томонидан субсидия ажратишни тартибга солувчи норматив-ҳуқуқий ҳужжатларни тасдиқлаш тўғрисида”ги қарорига биноан 330 млн сум субсидиялар ажратилиб, чет давлатларидан йил якунига қадар туманга яна 655 бош наслли қорамоллар олиб келиш режалаштирилган.

Шунингдек, туманда 10 та паррандачилик субьектлари фаолият олиб бораётган бўлиб, уларда жами 61 минг 900 бош паррандалар етиштирилмоқда. Мазкур паррандачилик субьектларида йилига 250 мингдан ортиқ туҳум ва 650 тоннага яқин гўшт маҳсулотлари ишлаб чиқарилмоқда.

Туманда паррандачиликни янада ривожлантириш борасида “Ўрта қала чорвадори” агрофирмаси самарали фаолият юритиб келмоқда. Янги замоанавий бинода фаолият юритаётган агрофирма янги технологиялар билан таъминланган. Агрофирмада жами 30 минг бош парранда парвариш қилиниб келинмоқда. “Ўрта қала чорвадори” агрофирмаси томонидан бир ой давомида 80-90 тонна парранда гўшти тайёрланиб, аҳолига арзон ва сифатли гўшт маҳсулотлари етказиб келинмоқда.

Туман ҳокимлигининг Ахборот хизмати.