ЭЛЕКТР ТАЪМИНОТИДАГИ МУАММОЛАР БАРТАРАФ ЭТИЛИБ, АҲОЛИГА ҚУЛАЙЛИК ЯРАТИЛМОҚДА
Ҳудудий электр тармоқлари корхоналари етказиб берилган электр энергиясини истеъмолчиларга тақсимлаб беради. Шу кунларда мамлакатимизда кузатилаётган аномал иссиқ ҳарорат туфайли электр энергиясидан фойдаланиш ҳам кескин ортиб, электр энергияси тақсимотида муаммолар юзага келмоқда.
Аҳоли хонадонлари, ташкилот ва муассасаларда қўшимча совутиш ускуналаридан фойдаланиш ҳамда қишлоқ хўжалиги экин майдонларини суғориш насослари тўла қувватда ишлаётганлиги, электр энергияга бўлган талаб кескин ошиб кетиши ҳисобига, электр энергия ишлаб чиқаришда қувват ва электр энергия танқислиги юзага келмоқда. Бу эса тизим фаолиятини куну тун ташкил этиш, авариялар ва носозликларни тезкорлик билан бартараф этиш бўйича зарур чоралар кўришга ундамоқда.
Амударё туманидаги Электр таъминоти корхонаси томонидан ҳам бу борада тегишли ишлар амалга оширилмоқда. Соҳа вакиллари кузатилаётган носозликларни қисқа муддатларда бартараф этиш, электр тармоқларида белгиланган режа асосида модернизация ва реконструкция ишларини амалга ошириш орқали аҳоли турмуш фаровонлигини оширишга ўз ҳиссаларини қўшмоқда.
Мазкур йилда, айниқса, “Обод қишлоқ” дастурига киритилган Хитой овули ва Жумуртов шаҳарчаларида аҳолига қулайлик яратиш, электр таъминотини яхшилаш мақсадида қатор ишлар амалга оширилди. Бугунги кунгача Хитой овулига 1 дона янгидан трансформатор пункти ўрнатилди. Шунингдек, кучланиши 0,4 киловольт 3,2 км. ҳаво электр узатиш тармоғи тортилиб, янгидан 70 дона темир-бетон устунлар ўрнатиш ишлари бажарилди. Жумуртов шаҳарчаси ҳудудида ҳам кучланиши 0,4 киловольтли ҳаво электр узатиш тармоғи янгиланиб, 1 дона трансформатор пункти ўрнатилди. Бундан ташқари, ушбу ҳудудлардаги электр узатиш ҳаво тармоқларида, мавжуд трансформатор пунктларида жорий таъмирлаш ишлари ҳам давом эттирилмоқда.
Президентимизнинг 2016 йил 23 ноябрдаги «2017-2021 йилларда паст кучланишли электр тармоқларини янада модернизация қилиш ва янгилаш дастури тўғрисида»ги Қарори ижросини таъминлаш мақсадида туман Электр таъминоти корхонаси ишчи-ходимлари томонидан бошқа ҳудудлардаги трансформатор подстанциялари таъмирланиб, эскилари янги, юқори кучланишли трансформаторга алмаштирилиши натижасида аҳоли яшаш хонадонлари ҳамда тадбиркорлик субъектларининг электр таъминоти янада яхшиланишига эришилди.
Бундан ташқари, паст кучланишли электр узатиш ҳаво тармоқлари тўлиқ кўрикдан ўтказилиб, ҳаво тармоқларини дарахт шохларидан тозалаш, симларни тортиш, носоз ҳолатга келиб колган қурилмаларни янгисига алмаштириш ишлари амалга оширилмоқда. Шунингдек, туман ҳудудидаги ер остидан ўтган электр узатиш кабель тармоқларини таъмирлаш ишлари ҳам жадаллик билан олиб борилмоқда.
Шу пайтга қадар туман ҳудудида 16 дона трансформатор пунктлари ва электр тармоқлари мукаммал таъмирланди. Ундан ташқари, Чордара, Намуна маҳаллалари, Қипчоқ шаҳарчасида 1 донадан янги трансформатор ўрнатилиб, электр таъминоти яхшиланди. Шунингдек, Гулзор маҳалласи ҳудудида жойлашган кўп қаватли уйларга ҳам қўшимча равишда янгидан трансформатор ўрнатиб берилди.
Йил охиригача яна 19 та трансформатор пунктларида мукаммал таъмирлаш ишлари олиб борилиши режалаштирилган. Шунингдек, Дўрман, Қиличбой ва Ўртақалъа овулларида ҳамда Ойбек номли ва Бештом маҳаллаларида қўшимча янгидан трансформатор пунктлари ўрнатилиб, туман аҳолисининг электр таъминоти яхшиланади.
Электр таъминотининг мавсумда барқарор ишлашини таъминлаш, аҳолига қулай шароит яратишга қаратилган бундай саъй-ҳаракатлар халқ ҳаёти, турмуш тарзини яхшилаш, фаровонлигини оширишда муҳим аҳамият касб этмоқда.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
