“ЁШ ЧЕГАРАЧИЛАР” ҲАРБИЙ-СПОРТ МУСОБАҚАСИ БЎЛИБ ЎТДИ

Ёшларни ватанпарварлик руҳида тарбиялаш, уларни жисмонан соғлом ва маънавий етук инсон сифатида камол топтириш, соғлом турмуш тарзини тарғиб қилиш, ўз юрти ва халқи тақдири учун юксак масъулият ва жавобгарлик туйғуларини шакллантириш мақсадида барча ҳудудлардаги умумтаълим мактаблари ўқувчи-ёшлари ўртасида “Ёш чегарачилар” ҳарбий-спорт мусобақаси ўтказилиб келинмоқда. Туманимизда ҳам Халқ таълими, Мудофаа ишлари, Жисмоний тарбия ва спорт бўлими ҳамкорлигида умумтаълим мактабларининг 10-11-синф ўқувчилари ўртасида ушбу мусобақа ташкил этилиб, ёшлар қалбида Ватан тақдирига дахлдорлик, юртга муҳаббат ва садоқат каби эзгу ҳислар янада мустаҳкамланмоқда.

Шу йил 30 март куни туманимизда ҳам ушбу мусобақанинг ҳудудий босқичи 8 та, яъни Манғит шаҳри, шаҳар атрофи, Қиличбой, Дўрман, Хитой, Жумуртов, Тўлқин, Қипчоқ овулларида ўтказилди. Барча ҳудудларда қизғин тарзда ўтказилган мусобақаларда шартларни чаққонлик, абжирлик, билимдонлик билан бажариб, ғолиб бўлишга эришган жамоалар сараланиб, туман босқичида қатнашишга муваффақ бўлдилар.

31 март куни мудофаага кўмаклашувчи Ватанпарвар ташкилотида юқори савияда ўтказилган мазкур мусобақанинг туман босқичида ҳудудий босқич ғолиблари куч синашдилар. Мусобақага жами  умумтаьлим мактабларидан 8 та жамоа, 80 нафар ўқувчи-ёшлар иштирок этишди.

Мусобақада иштирок этган масъуллар мамлакатимизда амалга оширилаётган ёшларга оид давлат сиёсати негизида ҳам жисмоний, ҳам маънавий жиҳатдан соғлом, ҳеч кимдан кам бўлмасдан, бошини баланд кўтариб  яшайдиган, Ватанимизнинг тақдири ва истиқболи учун масъулиятни ўз зиммасига олишга қодир бўлган баркамол авлодни тарбиялашдек устувор мақсад мужассамлиги тўғрисида сўзладилар. Ёш авлод қалбида Ватан сарҳадлари муқаддас эканлиги ҳақидаги тушунчани шакллантириш, давлат чегарасининг ҳимояси шарафли бурч эканлигини тарғиб қилиш, чақириққача тайёргарлик ёшидаги ўсмирларни чегара қўшинлари сафларида хизмат қилишга тайёрлаб бориш мақсадида ҳар йили анъанавий ўтказилиб келинаётган ушбу мусобақанинг бу галги иштирокчиларига муваффақият тиладилар.

Жамоалар томонидан қизғин кутиб олинган мусобақада иштирокчилар сафда ҳарбийча юриш, тўсиқлардан сакраб ўташ, белгиланган масофага югуриш, турникка тортиниш, автоматни қисмларга ажратиш ва йиғиш, жароҳатланганда биринчи тиббий ёрдам кўрсатиш каби шартлар бўйича ўз маҳоратларини кўрсатдилар. Жамоаларнинг барча аъзолари фаол иштирок этиб, ўз билим ва маҳоратини, чаққонлик ва абжирликларини, биринчи тиббий ёрдам кўрсатиш кўникмаларини кенг намойиш этдилар. Мусобақа давомида ўқувчи-ёшлар билим ва маҳоратларини синовдан ўтказдилар. Шунингдек, Ватанпарвар ташкилотининг ўқув-спорт техника клубида яратилган шароитлар, мавжуд техникалар билан яқиндан танишишди.

Мусобақа якунига кўра, барча шартларни моҳирлик билан бажариб, устунликни қўлга киритган 6-сонли умумтаьлим мактаби жамоаси 1-ўринни, 48-сонли умумтаьлим мактаби жамоаси 2-ўринни, 3-ўринни 22-сонли умумтаьлим мактаби жамоаси 3-ўринни эгаллади. Ғолиб жамоалар ташкилотчилар томонидан фахрий ёрлиқ ва совғалар билан тақдирландилар.

Бу каби мусобақалар ёшларнинг ҳарбий соҳага қизиқишини янада кучайтириб, ҳаётини Ватан тинчлиги, сарҳадлар осойишталиги, эл-юрт хотиржамлиги учун бағишлашга даъват этаётгани билан ҳам аҳамиятлидир.

О.Худойберганова.