ЮРТИМ ҚИЗЛАРИНИНГ ЙЎЛЛАРИ ОЙДИН, КЕЛАЖАГИ ПОРЛОҚ

Аждодларимиз асрлар давомида орзу қилиб келган мустақиллик халқимизга миллий ўзлигини, ор-номус ва ғурурини, ўз юртига беклигини қайтариб берди, ўз фарзандлари тақдири ҳақида ғамхўрлик қилиш, асрлар оша аждодларимизнинг ҳаётидан муҳим ўрин тутган миллий урф-одатларимиз, анъаналаримиз ва қадриятларимизнинг тарбиявий аҳамиятидан фойдаланиш имконини берди Янги тарихий шароитда мамлакатнинг оёққа туриб, қудратли давлатга айланишида ҳал қилувчи куч сифатида ёшларга улкан ишонч билдирилди.

Мамлакатимизда айни кунда амалга оширилаётган улкан ўзгаришлар ва янгиланишларда ёшлар, айниқса аёл-қизлар манфаатлари устуворлик касб этмоқда. Ёш қизлар, аёллар масаласи, уларнинг саломатлигини яхшилаш, таълим олишига шарт-шароит яратиш, ижтимоий муаммоларини ҳал этишга кўмаклашиш давлат сиёсати даражасига кўтарилди. Айниқса, миллат давомчиси бўлмиш қизларни маърифатли, зиёли ва оналик мақомига муносиб юксак ахлоқли қилиб вояга етказишга алоҳида эътибор берилаётир.

Шунинг учун ҳам 11 октябрь – Халқаро қизлар куни мамлакат миқёсида кенг байрам қилинмоқда. Бу ҳақда маълумот беришдан олдин эътиборингизни дунё миқёсидаги қизларга қандай муносабат ҳукмронлигига қаратмоқчиман: бугунги кунда дунёда 1,1 миллиард қиз яшайди. Бу қизлар келажагимизни юксалтиришда муҳим восита бўлар эди – агар бутун дунёда қизларга бизнинг мамлакатимиздагидай эътибор, имкониятлар мавжуд бўлганида. Таасуфки, улар турли ҳудудларда турлича шароитларда яшашади. Фикрим исботи сифатида ЮНИСЕФ халқаро ташкилоти маълумотларига тўхталаман: айни кунда жаҳон бўйича 31 миллион нафар мактаб ёшидаги қиз таълим олмайди, 17 миллион нафар қиз эса умуман мактабга бормайди. Айрим мамлакатларда оилаларнинг иқтисодий ночорлиги туфайли тўйиб овқат емаслиги, ёмон шароитда яшаши кўп сонли қизларнинг болаликдан ногирон бўлиб қолишига ё нобуд бўлишига олиб келаяпти.

Шунинг учун ҳам 2011 йил, 11 октябрдан бери БМТ Бош ассамблияси ташаббуси билан мазкур сана Халқаро қизлар куни сифатида қизларнинг ижтимоий муаммоларига эътибор қаратиш, камситилишининг олдини олиш мақсадида нишонланиб келинаётир. Халқаро қизлар куни жаҳонда 2012 йилда эрта никоҳга қарши, 2013 йилда таълим олиш муаммолари, 2014 йилда қизларга зўравонликка барҳам бериш, 2015 йилда 2030 йилга қадар ўсмир қизлар учун етарли шароитлар яратишга, 2016 йилда қизларни камситишга, ижтимоий муаммоларига қарши кураш, 2017 йилда эса жаҳон инқирозигача, инқироз пайтида ва инқироздан кейинги даврда қизларга имкониятлар, улар дуч келаётган қарама-қаршиликларга глобал эътибор қаратишни кучайтириш масалаларига бағишлаб ўтказилди.

Ушбу маълумотларнинг ўзиёқ йил ўн икки ойи ҳам ўзига хос файзли, тинч-осойишта юртимизда давлатимиз ва оиласи ардоғида улғаяётган қизларимизнинг нақадар толеи баланд эканлигидан далолат беради.

Ҳа, ана шундай жаннатмакон юртда туғилишнинг ўзи ҳам бахт. Бахтки ҳар бир гўдак, қизнинг соғлом бўлиб дунёга келиши, соғлом улғайиши учун ғамхўрлик қилинади. Мактабгача таълим муассасалари, умумтаълим мактаблари, кенг жамоатчилик уларнинг маънавиятли, маданиятли, иқтидорли бўлиб вояга етишлари учун хизмат қилади. Ҳар бир қиз хоҳишига кўра мактабни тугатганидан сўнг олий таълим олиши, ишлаши, бирор касб-ҳунар ўрганиши ўз ихтиёридадир. Мамлакатимизда ёшларга оид норматив ҳуқуқий ҳужатларга асосланиб, “2017-2021 йилларда Ўзбекистон хотин-қизлар қўмитасининг ёш оилалар ва қизлар билан ишлаш бўйича стратегияси” ишлаб чиқилиб, амалга оширилмоқда.

Ўзбекистон Республикаси Хотин-қизлар қўмитасининг ташаббуси билан 11 октябрь – Халқаро қизлар кунга бағишлаб ўтказилаётган Республика қизлар фестивалидан кўзланган мақсад ҳам ёшларга оид давлат сиёсатининг мазмун-моҳиятини халқимиз, айниқса, ёшларга етказиш, қизларга бўлган эътиборни янада юксак поғонага кўтариш, қизларнинг билим олишга, касб-ҳунарга қизиқишларини оширишга қаратилган.

Сана муносабати билан туманимизда ҳам қизлар фестивали бўлиб ўтди. Қизларнинг билим олишига, китоб ўқишига бўлган қизиқишини, ижтимоий-сиёсий фаоллигини ошириш, иқтидорли қизлар сафини кенгайтириш билан бир қаторда уюшмаган қизларни ҳар томонлама қўллаб-қувватлаш, уларнинг кийиниш ва муомала маданиятини ошириш, амалга оширилаётган ислоҳотларга фаол муносабатини шакллантириш мақсадида туман Маданият бўлими томошалар залида ўтказилган фестивалга туманимизнинг барча ҳудудларидан турли касб, мутахассислик эгалари бўлган, шунингдек, вақтинча ишсиз қизлар иштирок этдилар.

Тадбир элимизнинг қўли гул, иқтидорли қизларининг турли соҳалардаги ижод намуналари кўргазмаси билан бошланди.

Турли соҳаларда, хусусан, ноёб ва инновацион ихтиро соҳиблари, ижодкор қизлар, тенгдошларига энг кўп иш ўринлари яратган ҳунарманд ва тадбиркор қизлар, илм-фанда юксак муваффақиятларга эришган қизлар, энг кўп хорижий тилларни ўзлаштирган қизлар, спорт соҳасида юксак марраларни эгаллаган чемпион қизлар, санъат соҳасида муваффақиятларга эришган қизларнинг чиқишлари иштирокчиларда улкан таассуротлар қолдирди.

Ҳур ва озод юртимизни, бахтиёр турмуш тарзини ва қизлар шаънини улуғловчи куй-қўшиқлар, моҳирона ижро этилган рақслар барчага манзур бўлди.

Бутун мамлакатимиз бўйлаб ўтказилган 11 Республика қизлар фестивали, фестивал доирасида ҳудудларда ўтказилган тадбирлар юртимизнинг йўллари ойдин, келажаги порлоқ қизларига ҳурмати-эҳтироми, эъзози намунасидир.

Ойгул РАЖАБОВА.