ЭЛ-ЮРТГА БАХШИДА УМР

Ҳаёт қанча тотли бўлмасин, интиҳоси бор, кимдир узоқ, кимдир қисқа умр кўради. Шу масофа оралиғида қилган ишлари, эзгу амаллари умрини безайди, мангуликка дахлдор қилади.

Муҳтарам Президентимиз И.Каримов вафотидан чуқур қайғуга ботган туманимиз халқини 2016 йилнинг 8 сентябрь тонгида яна бир мудҳиш хабар қарши олди: туманимиз ҳокими, Аму элининг фидойи ва жонкуяр фарзанди, ғамхўр раҳбар, талабчан устозимиз Ражапбай ака Йўлдашев оғир касалликдан вафот этди. Ушбу қайғули дамларда мен устозимизнинг оила аъзоларига, барча қариндош-уруғларига ва бутун туманимиз халқига ўз ҳамдардлигимни билдираман.

Мен Ражапбай Йўлдашев билан узоқ йиллар, аввал "Амударё ҳақиқати” газетаси муҳаррири, кейинчалик ҳоким муовини сифатида бирга ишлашга, у кишининг маслаҳатларини, йўл-йўриқларини олишга ва ўз фаолиятим давомида улардан фойдаланишга мушарраф бўлганимдан фахрланаман.

Худди ҳозиргидай эсимда, у киши ҳокимлик масъул ходимлари билан ё корхона, ташкилотлар раҳбарлари билан қандай масалада йиғилиш ўтказмасин, бир гапни кўп такрорлардилар: "Бизга туманимиз халқи суянади, умид билан қарайди, халқ газсиз, электр энергиясисиз ё сувсиз ўтирса, ё бошқа муаммолар гирдобида қолиб кетса... унда бизнинг нима керагимиз бор, биз кимман деб бош кўтариб юрамиз?”

Ражапбай Йўлдашев туманга раҳбарлик қилган йилларида халқимизни қанчалик фаровон, турмушини обод кўришни истаган бўлса, фидойи меҳнатлари туфайли, одамларни ҳам шу ниятлари йўлидан бошлаб, мақсадларига эришдилар, деб айта оламан. Туманимиздаги барча соҳаларда эришилган ютуқлар, юксалишлар, дастурхонларимиз тўкинлиги, турмушимизнинг ободонлиги замирида у кишининг машаққатли меҳнатлари мужассамдир.

Ҳеч эсимдан чиқмайди: 2005 йилнинг изғиринли куз кунларида Амударёнинг остидан туманимизга газ тармоғи тортилган дамларда чарчаганига, совуқ еганига ҳам қарамай, Ражапбай ака жараённинг  бошида турди. Тезроқ халқимизнинг табиий газ билан таъминланишига ошиқди.

Ўша ҳудуд аҳолиси, туманимиздаги корхона, ташкилотлар раҳбарлари, фермерлар ишловчиларга навбатма-навбат овқат, чой ташиб турганини кўриб:

- Шундай аҳил, борини эл билан баҳам кўрадиган одамларимиз учун ҳар қанча хизмат қилсак оз, - дегандилар қувониб.

Туманимиз халқи ўз раҳбарини, жонкуярини, фидойи ўғлонини қанчалик  севмасин, Яратганнинг ҳукми олдида  ожиз. Катта-ю кичик чексиз қайғу билан, аламли ёшлари билан Ражапбай Йўлдашевни сўнгги йўлга кузатди. Унинг хотираси қалбларимизда абадий сақланиб қолади.

Хонимжон РАЖАБОВА,

"Баркамол авлод” болалар маркази директори, Қорақалпоғистон Республикасида хизмат кўрсатган маданият ходими.

***

Неча ойларки, туманимиз меҳнаткашлари  туманимиз раҳбари, талабчан ва айни пайтда ғамхўр, қатъиятли устозимизнинг соғ-саломат сафга қайтишини тилаб, у кишининг йўқлигини билдирмай, сидқидилдан меҳнат қилиб, барча соҳаларда ютуқларга эришиб, у кишининг дардини енгиллатишга ҳаракат қилишмоқда эди.

Афсус, Қорақалпоғистон Республикаси Жўқорғи Кенгеси ва туман Кенгаши депутати, "Шуҳрат” медали, "Меҳнат шуҳрати” ордени соҳиби, Қорақалпоғистон Республикасида хизмат кўрсатган иқтисодчи, иқтисод фанлари номзоди Ражапбай Йўлдашев орамиздан жуда эрта кетди.

Мен ўзим раҳбарлик қилаётган "Амирхон” фермер хўжалигимизнинг йиллик пахта топшириш режасини бажарганимни у кишига қувониб айтишга чоғланган вақтимда шу машъум хабарни эшитдим. Ражапбай акага кичкина бўлса-да хушхабар айтсак, ўзида йўқ қувонар, ҳали сизларнинг  қўлингиздан кўп ишлар  келади, дея яна ҳам ишга шўнғиб кетишга руҳлантирар эдилар.

У кишининг йўл-йўриқлари, маслаҳатларини олиб ишлаб, кам бўлмадим. 2008 йилда "Қиличбой” ММТП раислигини, 2012 йилда туман фермерлар Кенгаши раислигини менга ишониб топширган бўлсалар, бу вазифаларни сидқидилдан адо этишга ҳаракат қилдим. Умуман, Ражапбай ака барча раҳбарларни  ҳам қўллар, керак пайтда муаммоларини тинглаб, ечим топишига кўмаклашарди. Дала кезиб юрган ё  туман ҳаётига оид бошқа муаммолар билан шуғулланаётган бўлса-да, оддий халқнинг ҳаётини ҳеч назардан қочирмас, ҳудуд раҳбарларига доим ана шу одамлар учун ишлаётганингизни унутманг, деб уқдирарди.

Ражапбай ака Йўлдашев ўзининг ишчанлиги, билимдонлиги, туманимизда барча жабҳаларнинг тараққиёти учун бирдай қайғурадиган фидойи ва жонкуярлиги билан барчага намуна эди.

Азиз устозимизнинг хотираси қалбларимизда абадий сақланиб қолади.

Отахон ҚУРБОНИЁЗОВ,

"Амирхон” фермер хўжалиги раиси, Қорақалпоғистон Республикасида хизмат кўрсатган қишлоқ хўжалиги ходими.