Халқ депутатлари Амударё туман Кенгашининг 22-сессияси тўғрисида ахборот
Жорий йилнинг 28 июль куни Халқ депутатлари Амударё туман Кенгашининг навбатдаги 22-сессияси бўлиб ўтди. Сессия мажлисига Халқ депутатлари Амударё туман Кенгаши раиси Алишер Йўлдашев раислик қилди.
Сессия аввалида туман ҳокимининг биринчи ўринбосари Фахриддин Юсупов Амударё тумани маҳаллий бюджетининг 2026 йилнинг 1-чорагидаги ижроси бўйича туман ҳокимининг тақдимномаси билан таништирди. Қайд қилинганидек, 2026 йилнинг 1-чораги давомида Амударё тумани маҳаллий бюджетнинг даромадлар режаси жами 32,3 миллиард сўм қилиб белгиланган бўлиб ушбу режа жами 36,9 миллиард сўмга, ортиғи билан бажарилган. Ҳисобот даврида махаллий бюджетдан жами 44,3 миллиард сўмдан ортиқ маблағлар сарфланган.
Шундан кейин 2026 йил 1 январь ҳолатига аниқланган эркин қолдиқ маблағлари ҳисобидан маҳаллий бюджетдан маблағ ажратиш масаласи кўриб чиқилди. Сессия қарори билан жами 42,26 миллион сўм миқдоридаги маблағ белгиланган мақсадлар учун йўналтирилди.
Шундан сўнг, туманда қонун устуворлигини таъминлаш ҳамда маҳаллаларда хавфсиз муҳитни яратиш борасида туман прокурорининг ахбороти тингланди. Ҳисобот даврида қонунлар ижроси юзасидан ўтказилган 79 та назорат тадбирларида 700 дан ортиқ қонун бузилиш ҳолатлари аниқланган ва қўпол қонунбузарликлар юзасидан 22 та жиноят иши қўзғатилган. Шу билан бирга, туман ҳудудида 84 та жиноят содир этилгани, олдини олиш мумкин бўлган жиноятлар 18,6 фоизга ошгани кескин танқид остига олинди.
Маҳаллаларда криминоген вазиятни яхшилаш мақсадида кўча ва савдо марказларига 23 та юзни таниб олувчи камералар ўрнатилган. Ёлғиз кексалар қаровисиз қолмаслиги учун 61 та хонадонга салкам 28 миллион сўмлик “Ташвиш” тугмалари ўрнатилиб, пробация ҳисобида турган 15 нафар маҳкум қайта касбга ўқитилган. Оилавий низоларнинг олдини олиш доирасида хатлов ўтказилиб, 116 та нотинч оиланинг 53 таси яраштирилган.
Сессияда ҳуқуқбузарликларнинг олдини олиш ва уларнинг профилактикаси ҳолати, шунингдек, жамоат хавфсизлиги ҳақидаги масала юзасидан Ички ишлар бўлими бошлиғи ўринбосари, жамоат хавфсизлиги хизмати бошлиғи Шарапат Жолдосбоев ҳисобот берди. Ҳисоботда ҳуқуқбузарлик содир этишга мойил ёки ундан жабрланиш эҳтимоли юқори бўлган 4702 нафар шахслар аниқланиб, махсус электрон ахборот тизимига киритилгани, профилактика инспекторига 1894 нафар, ҳоким ёрдамчисига 667 нафар, хотин қизлар фаолига 722 нафар, ёшлар етакчиларига 543 нафар, ижтимоий ходимга 652 нафар, солиқ инспекторига 224 нафар профилактика объектлари бўйича хулосалар юборилгани қайд қилинди.
Сессияда туманда фавқулодда вазиятларнинг олдини олиш бўйича амалга оширилган ишлар ҳам муҳокама қилинди. Туман Фавқулодда вазиятлар бўлими бошлиғи Зафар Аҳмедов берган маълумотларга кўра, жорий йилнинг 2-чорагида туманда 13 та ёнғин содир бўлиб, умумий зарар миқдори 1,5 миллиард сўмдан ошган. Ёнғин хавфсизлиги қоидаларини бузган шахсларга нисбатан 447 та ҳолатда салкам 361 миллион сўм жарима қўлланилган ва 44 та объектнинг фаолияти вақтинчалик тўхтатилган. Аҳоли хавфсизлигини таъминлаш мақсадида фавқулодда вазиятлардан муҳофаза қилиш ойлиги доирасида маҳалла ва ташкилотларда 129 та семинар ўтказилиб, уларга 1107 нафар фуқаро жалб қилинган.
Сессияда депутатлар томонидан 2026 йилги вегетация даври учун сув олиш лимитлари ва 2026-2027 йилларда кўп квартирали уйлар атрофида қурилиши режалаштирилган инфратузилма объектларининг янги параметрлари тасдиқланди. Бундан ташқари, Кенгаш ваколатига кирувчи бошқа масалалар ҳам муҳокама қилинди ва ҳар бир масала юзасидан Халқ депутатлари туман Кенгашининг тегишли қарорлари қабул қилинди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
