Ижтимоий ҳимоя масалаларига бағишланган семинар ўтказилди

Амударё тумани Маданият бўлими биносида ижтимоий ҳимоя ягона реестрига киритилган оилаларга давлат томонидан тақдим этилаётган имтиёзлар, енгилликлар ва турли хилдаги моддий ҳамда ижтимоий ёрдамлар ҳақида батафсил маълумот бериш мақсадида семинар-тренинг ташкил этилди.

Семинарда ушбу мақсадда тузилган республика ишчи гуруҳи аъзолари, Амударё тумани ҳокими ўринбосарлари, тегишли вазирлик ва идораларнинг тумандаги бўлинмалари раҳбарлари, ижтимоий ҳимоя, меҳнат ва аҳоли бандлиги бўлимлари масъуллари, маҳаллаларда фаолият юритаётган ҳоким ёрдамчилари ҳамда ижтимоий ҳимояга муҳтож оилалар вакиллари иштирок этди.

Тадбир давомида ижтимоий ҳимоя ягона реестрига киритилган фуқаролар учун давлат томонидан яратилган имкониятлар батафсил тушунтирилди. Жумладан, кам таъминланган оилаларга бир марталик моддий ёрдам, ойлик нафақалар, болалар учун қўшимча тўловлар, коммунал хизматлар учун субсидиялар, уй-жой шароитларини яхшилашга қаратилган имтиёзлар, таълим ва тиббий хизматлардаги енгилликлар, шунингдек, иш билан таъминлаш ва касб-ҳунар ўргатиш дастурлари ҳақида кенг турда маълумотлар берилди.

Мутахассислар томонидан ҳар бир ёрдам турининг қонунчилик асоси, ундан фойдаланиш шартлари, керакли ҳужжатлар рўйхати, мурожаат қилиш тартиби ва муддатлари аниқ мисоллар билан тушинтириб берилди. Бу маълумотлар аҳоли ўртасида учрайдиган ва мавжуд тизимдан хабардорликнинг етишмаслиги натижасида келиб чиқадиган нотўғри тушунчаларни бартараф этишга хизмат қилади.

Алоҳида таъкидланганидек, ижтимоий ҳимоя тизимининг асосий мақсади – нафақат моддий қийинчиликдаги оилаларга вақтинчалик ёрдам бериш, балки уларнинг ўзини ўзи таъминлаш қобилиятини ошириш, ижтимоий фаоллигини кучайтириш ва камбағалликдан чиқишига доимий йўл яратишдан иборат. Шу боисдан, семинарда фақат мавжуд имтиёзлар ҳақида эмас, балки улардан самарали фойдаланиш, мурожаатларни тўғри расмийлаштириш ҳақида ҳам батафсил маълумотлар берилди.

Тадбирнинг яна бир муҳим қисми маҳаллаларда фаолият юритаётган ҳоким ёрдамчиларининг бу жараёнлардаги иштирокига бағишланди. Ҳоким ёрдамчилари ижтимоий ҳимояга муҳтож оилаларни аниқлаш, уларнинг ҳаётий муаммоларини ўрганиш, рўйхатга киритиш учун ҳужжатларни тайёрлаш ва тегишли идоралар билан ҳамкорликда манзилли ёрдам кўрсатишда асосий куч саналади. Ҳоким ёрдамчиларига реестрга киритиш жараёнларининг янги тартиби, маълумотларнинг тўғрилигини текшириш, аҳоли билан мулоқот қилиш усуллари ва ижтимоий ҳимоя дастурларининг самарадорлигини ошириш бўйича қўшимча кўрсатмалар берилди. Бу йўналишдаги ишларнинг сифати ва шаффофлиги аҳолининг давлатга бўлган ишончини оширишда муҳим аҳамият касб этиши таъкидланди.

Семинар-тренинг давомида иштирокчилар томонидан кўплаб саволлар берилди ва уларга мутахассислар томонидан аниқ, амалий жавоблар қайтарилди. Бу тадбир нафақат маълумот тарқатиш, балки аҳоли ва маҳаллий идоралар ўртасидаги мулоқотни кучайтириш, тизимнинг шаффофлигини таъминлаш ва ижтимоий ҳимоя соҳасидаги ислоҳотларнинг амалий натижаларини кўрсатишга хизмат қилди.

Натижада йиғилиш иштирокчилари давлат томонидан кўрсатилаётган ёрдамлар ҳақида тўлиқроқ тасаввурга эга бўлди. Бу каби тушунтириш ишларининг изчил давом эттирилиши келгусида аҳолининг ижтимоий ҳимоя тизимидан фойдаланиш даражасини ошириб, кам таъминланган оилаларнинг турмуш даражасини янада яхшилашга ҳисса қўшади. Зеро, давлатнинг ижтимоий сиёсатдан асосий мақсади ҳам ҳар бир фуқаронинг фаровонлиги ва адолатли ёрдам тизимининг самарали ишлашини таъминлашдир.