Таълим сифати ва юксак натижалар уйғунлиги: 18-сонли мактаб фаолияти ҳақида
Мамлакатимизда амалга оширилаётган кенг кўламли ислоҳотларнинг туб моҳиятида таълим тизимини ривожлантириш, ёш авлодга замонавий билим ва тарбия бериш, уларни ватанпарварлик руҳида камол топтиришдек эзгу мақсадлар мужассам. Зеро, Янги Ўзбекистоннинг пойдевори билимли, салоҳиятли ва ҳар томонлама баркамол ёшлар томонидан бунёд этилади.
Республикамизнинг барча ҳудудларида бўлгани каби Амударё туманида ҳам ёшларнинг сифатли таълим олиши учун барча зарур шароитлар яратилмоқда. Туман Мактабгача ва мактаб таълими бўлимига қарашли, Жайҳун овули ҳудудида жойлашган 18-сонли умумий ўрта таълим мактаби ҳам ана шундай илғор таълим даргоҳларидан биридир.
1990 йилда ўз фаолиятини бошлаган ва ўтган йиллар давомида минглаб ўғил-қизларга ҳаёт йўлланмасини берган ушбу мактаб бугунги кунда ҳам замон талабларига тўлиқ жавоб берадиган, моддий-техник базаси мустаҳкам ва юқори илмий салоҳиятга эга зиё маскани сифатида фаолият юритиб келмоқда.
Таълим муассасасининг ютуқлари, аввало, унда фаолият юритаётган жамоанинг аҳиллиги ва педагогларнинг касбий маҳорати билан белгиланади. Айни пайтда мактабда жами 70 нафар ходим меҳнат қилаётган бўлса, уларнинг 50 нафарини ўз касбига содиқ, фидойи педагоглар ташкил этади.
Устозлар жамоасининг сифат таркибига назар ташлайдиган бўлсак, бу ерда тажриба ва ёшлик шижоати уйғунлашганини кўриш мумкин. Хусусан, педагогларнинг 9 нафари олий тоифали, 17 нафари эса биринчи тоифали ўқитувчилар эканлиги таълим жараёнининг юқори савияда ташкил этиш имкониятидан далолат беради. Бундан ташқари, сўнгги йилларда ўқитувчиларнинг ўз устида ишлаши, халқаро ва миллий даражадаги сертификатларни қўлга киритиши бўйича ҳам мактабда ибратли ишлар йўлга қўйилган. Ҳозирги кунда жамоанинг 11 нафар аъзоси нуфузли халқаро ва миллий сертификатларга эга бўлиб, бу кўрсаткич таълим сифатининг янада юксалишига хизмат қилмоқда. Айнан шундай изланувчанлик ва касбий маҳорат эвазига мактабнинг педагог кадрлар салоҳияти Амударё туманидаги таълим муассасалари ўртасида юқори ўринларда туради.
Малакали педагогларнинг саъй-ҳаракатлари натижасида мактаб ўқувчилари фан олимпиадалари ва спорт мусобақаларида салмоқли ютуқларни қўлга киритиб келмоқдалар. Илмга чанқоқ ёшлар нафақат туман, балки республика миқёсида ҳам ўз билим ва иқтидорларини намойиш этишмоқда. Хусусан, мактабнинг иқтидорли ўқувчиларидан бири Севинчой Каримова она тили ва адабиёт фани бўйича эришган натижалари билан тенгдошларига ўрнак бўлаётган бўлса, Сожида Бозорбоева география фанидан ўзининг чуқур билимини намоён этиб келмоқда. Шунингдек, яна бир фаол ўқувчи Озодбек Ражапов спортнинг ақл гимнастикаси ҳисобланган шашка тури бўйича республика босқичида юқори натижаларни қайд этиб, мактаб шарафини муносиб ҳимоя қилди. Бу каби ютуқлар замирида устозларнинг тинимсиз меҳнати ва ўқувчиларнинг ўз олдига қўйган юксак мақсадлари сари дадил интилиши мужассам.
Таълим даргоҳида ўқувчиларнинг бўш вақтларини мазмунли ташкил этиш, уларни касб-ҳунарга йўналтириш ва истеъдодларини рўёбга чиқариш мақсадида турли фан тўгараклари ҳам мунтазам фаолият юритмоқда. Дарсдан ташқари машғулотларда ўқувчилар ўзлари қизиққан фанлар бўйича қўшимча билим олиш билан бирга, ижодий қобилиятларини ҳам ривожлантирмоқдалар.
Хулоса қилиб айтганда, Жайҳун овулидаги 18-сонли умумий ўрта таълим мактаби бугунги кунда чинакам маърифат ўчоғига айланган. Бу ерда таълим ва тарбия уйғунлиги таъминланиб, билимли, иқтидорли ва дунёқараши кенг бўлган баркамол авлодни вояга етказиш йўлида мактаб жамоаси томонидан изчил ва тизимли ишлар амалга оширилмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
