Аҳоли фаровонлиги йўлида муҳим қадам: Амударёда газ таъминоти яхшиланмоқда

Сўнгги йилларда юртимизда аҳоли турмуш шароитларини яхшилаш, хонадонларни барқарор иссиқлик, электр энергияси ва ичимлик суви билан таъминлаш борасида изчил ва манзилли ишлар амалга оширилмоқда. Бу борадаги амалий саъй-ҳаракатлар Амударё туманида ҳам ўзининг яққол самарасини бермоқда.

Хусусан, туманда табиий газ таъминотини яхшилаш, мавжуд инфратузилмани замон талабларига мослаштириш мақсадида кенг кўламли реконструкция ишлари олиб борилмоқда. Амударё тумани ҳудудидан ўтувчи юқори босимли магистраль газ тармоқларини янгилаш орқали аҳолининг кундалик эҳтиёжларини қондириш, газ босимини меъёрлаштириш ва узлуксиз таъминотни йўлга қўйиш устувор вазифа этиб белгиланган.

Бугунги кунда тумандаги Тўлқин, Тошёп, Бўстон овул ва маҳаллалари ҳудудларидан ўтувчи юқори босимли магистраль газ қувурлари босқичма-босқич реконструкция қилинмоқда. Ушбу ҳудудларда қарийб 9,5 километрга яқин табиий газ қувурларини янгилаш ва янги тармоқлар тортиш ишлари “Урганчтрансгаз” унитар корхонаси ходимлари томонидан юқори масъулият ва фидойилик билан амалга оширилмоқда.

Айни пайтда реконструкция ишлари якунланиш арафасида бўлиб, бу эса яқин фурсатларда минглаб хонадонларда газ таъминотининг янада барқарорлашишига хизмат қилади. Мазкур лойиҳа нафақат техник жиҳатдан муҳим, балки аҳоли фаровонлигини ошириш, қиш мавсумида қулай шароит яратиш йўлидаги муҳим қадамдир.

Шу муносабат билан, аҳолининг табиий газ билан боғлиқ эҳтиёжларини қондириш йўлида жонбозлик билан меҳнат қилаётган ишчи-ходимларга туман ҳокимлиги томонидан байрамлар арафасида миннатдорчилик тариқасида тадбир ташкил этилди. “Diamond” ресторанида ёзилган дастурхон атрофида фидокор меҳнаткашлар жам бўлишди.

Тадбирда Амударё тумани ҳокими ўринбосарлари Баҳодир Эрназаров ҳамда Нодирбек Камоловлар иштирок этиб, газ таъминоти тизимини яхшилаш йўлидаги меҳнатлари учун мутахассисларга самимий миннатдорлик билдирдилар. Уларнинг таъкидлашича, аҳоли манфаатига қаратилган бундай ташаббуслар бундан буён ҳам изчил давом эттирилади.

Тадбир давомида ўз меҳнати ва масъулияти билан алоҳида ажралиб турган бир гуруҳ ишчи-ходимлар қимматбаҳо совғалар билан тақдирланди. Бу эса меҳнаткашларга бўлган эътибор ва эътирофнинг ёрқин ифодасига айланди.

Байрамона тадбирга туман Маданият бўлими хонандалари томонидан ижро этилган куй-қўшиқлар янада файз бағишлаб, иштирокчиларга кўтаринки кайфият улашди. Самимий муҳитда ўтган учрашув меҳнат жамоасига янги куч ва илҳом бахш этди.

Аҳоли фаровонлигини ошириш, инфратузилмани ривожлантириш ва ҳаёт сифатини яхшилашга қаратилган бундай эзгу ташаббуслар Амударё туманида амалга оширилаётган ислоҳотларнинг амалий натижаси бўлиб, келгусида ҳам изчил давом этишига ишонч уйғотади.

Чарос Арслонова, туман ҳокимлигининг Ахборот хизмати раҳбари.