Президент қарорларининг мазмун-моҳияти аҳолига етказилди

Амударё туманида Қорақалпоғистон Республикасини ижтимоий-иқтисодий ривожлантиришга қаратилган Президент қарорларининг мазмун-моҳиятини аҳолига етказиш мақсадида тарғибот учрашуви бўлиб ўтди.

Тадбир Амударё тумани Маданият бўлимида ташкил этилиб, унда туман ҳокими Собир Хўжаметов, ҳоким ўринбосарлари “Маҳалла еттилиги” аъзолари, нуронийлар, кўча бошчилари, фаол ёшлар, хотин-қизлар фаоллари, фермер хўжаликлари раҳбарлари ҳамда тумандаги барча ташкилот ва муассаса раҳбарлари иштирок этдилар.

Учрашувда муҳтарам Президентимиз томонидан яқинда имзоланган Қорақалпоғистон Республикасини ижтимоий-иқтисодий ривожлантиришга доир 322-, 332-, 333-, ва 334-сонли қарорларнинг мазмуни, улар орқали яратилаётган янги имкониятлари, маҳаллий даражада амалга ошириладиган чора-тадбирлар атрофлича муҳокама қилинди.

Тадбирни туман ҳокими Собир Хўжаметов очиб берди. Туман ҳокими ўз сўзида муҳтарам Президентимиз томонидан амалга оширилаётган Қорақалпоғистонни ижтимоий-иқтисодий ривожлантириш йўлидаги туб ислоҳотлар республика аҳолисининг фаровонлигини ошириш, янги иш ўринлари яратиш, инфратузилмани яхшилаш ҳамда ёшлар учун замонавий имкониятлар эшигини очишда муҳим қадам бўлаётганини алоҳида таъкидлади. Туман ҳокимининг биринчи ўринбосари Фахриддин Юсупов ҳар бир қарор мазмун-моҳиятига алоҳида тўхталди.

Хусусан, Ўзбекистон Республикаси Президентининг 2025 йил 31 октябрь кунги “Аҳолини озиқ-овқат маҳсулотлари билан барқарор таъминлашга доир қўшимча чора-тадбирлар тўғрисида”ги 322-сонли қарори Республика аҳолисини асосий турдаги озиқ-овқат маҳсулотлари, хусусан, гўшт, сут, тухум, балиқ, ўсимлик ёғи ва картошка билан кафолатли таъминлаш, чорвачилик хўжаликларининг озуқа базасини тубдан яхшилаш, уларнинг фаолиятини кенгайтириш учун қўшимча шарт-шароитлар яратиш ва нархлар барқарорлигини сақлаш каби устувор мақсадларга хизмат қилиши хусусида сўз юритилди.

Шунингдек, мамлакатимизда инвестиция муҳитини яхшилаш, янги ишлаб чиқариш корхоналарини ташкил этиш ва аҳоли бандлигини оширишда Президентимиз томонидан жорий йилнинг 3 ноябрида қабул қилинган “Қорақалпоғистон Республикасида тузни қайта ишлашни ривожлантиришга қаратилган чора-тадбирлар тўғрисида”ги 333-сонли қарор муҳим аҳамиятга эга.

Қарор асосида “Kungrad Solt Free Zone” номли саноат зонаси ташкил этилади. Дастлаб 50 гектар ерда лойиҳалар амалга оширилади ва кейин заруратга қараб ҳудуд 200 гектаргача кенгайтирилиши мумкин. Бу ерда камида 50 миллион АҚШ доллари миқдорида инвестиция жалб этилади, кейинчалик 200 миллионгача миқдорда инвестиция киритиш режалаштирилган. Инвесторлар учун ер майдонлари, солиқ ва божхона имтиёзлари берилади. “Ягона дарча” тартиби орқали рухсатномаларни олиш соддалаштирилади.

Қолаверса, 2025 йил 3 ноябрь куни имзоланган 332-сонли Президент қарори орқали Қорақалпоғистон Республикаси Хўжайли туманида катта лойиҳа бошланади. Бу лойиҳа ёрдамида ёшлар учун янги иш ўринлари яратиш, уларнинг билим ва кўникмаларини ошириш, ёшларга катта имконият эшиклари очиш мақсад қилинган. Хўжайли туманининг Сомонкўл маҳалласи ҳудудида 152 гектар ерни эгаллаган “Ёшлар ижтимоий-иқтисодий маркази” қурилишига старт берилади. Марказга 2026-2030 йилларда инвестор томонидан 400 млн. доллар инвестиция киритиш орқали марказ худудига IT университети, стартаплар технопарки ва уларни қўллаб-қуватлаш инновацион гуруҳлар, лойиҳа офислари, уй-жойлар, ижтимоий соҳа ҳамда маданий-маърифий объектлар, ёшлар бандлигини таъминлашга қаратилган ишлаб чиқариш корхоналари фаолияти йўлга қўйилади.

Шу билан бирга, 3 ноябрь куни имзоланган яни бир муҳим қарор “Қорақалпоғистон Республикасида хўжаликларнинг озиқ-овқат базасини мустаҳкамлаш ва қишлоқ хўжалигидаги мавжуд ресурслардан самарали фойдаланиш чоралари тўғрисида”ги 334-сонли қарори билан хўжаликларга бир қатор имкониятлар ва имтиёзлар берилди. Хусусан, ҳудуддаги техника ва агрегатлар сонини 2 баравар ошириш орқали хўжаликларнинг ем-хашак базасини мустаҳкамлаш вазифаси белгилаб берилди.

Тадбир якунида мазкур Президент қарорларида белгиланган вазифаларни жойларда самарали амалга ошириш, уларни ҳаётга татбиқ этишда маҳаллалар, жамоатчилик ва масъул ташкилотлар ўртасидаги ҳамкорликни кучайтириш бўйича фикр-мулоҳазалар ва таклифлар билдирилди.

Бундай йиғилишлар аҳолининг давлат сиёсати мазмунини ҳамда амалга оширилаётган ислоҳотларнинг моҳиятини чуқур англаб етишига хизмат қилади.

Чарос Арслонова, туман ҳокимлигининг Ахборот хизмати раҳбари.