Қорақалпоғистонлик талабалар учун Японияда ишлаш имконияти ҳақида маълумот берилди
Қорақалпоғистон қишлоқ хўжалиги ва агротехнологиялар институтининг халқаро алоқаларни фаоллаштириш йўлидаги саъй-ҳаракатлари ўз амалий самарасини бермоқда. Яқинда институтга Япониянинг қишлоқ хўжалиги соҳасидаги етакчи компанияси – “Green Leaf” вакиллари хизмат сафари билан ташриф буюрдилар. Ташрифнинг асосий мақсади – институт битирувчиларига халқаро меҳнат бозорига йўл очиш ва ўзаро инновацион ҳамкорликни мустаҳкамлашдан иборатдир.
Делегация аъзолари, яъни “Green Leaf” компанияси президенти Саваура Шожи бошчилигидаги компания ходимларини институт ректори Бердияр Жоллибеков, OISCA–Uzbekistan офиси менежери Тимур Буранбаев ҳамда институтда волонтёр сифатида тажриба орттираётган япониялик ёшлар кутиб олдилар.
Институт раҳбарияти билан бўлиб ўтган давра суҳбатидан сўнг, компания президенти Саваура Шожи битирувчи ва битириш арафасидаги талабалар билан учрашди. Сўзга чиққан компания Президенти ўз компаниясининг фаолияти, қишлоқ хўжалиги соҳасидаги илғор, инновацион ёндашувлари ҳақида батафсил маълумот бериб, ёшларни Японияда ишлаш имкониятлари билан таништирди ҳамда компания институт битирувчиларини ишга жойлаштиришга тайёрлигини билдирди.
Мазкур таклиф талаба-ёшлар томонидан катта қизиқиш билан қабул қилинди. Улар суҳбат давомида иш шароитлари, маош, талаб этиладиган тил ва касбий малака даражалари ҳақида саволлар беришди ва компания раҳбаридан батафсил жавоблар олишди. Бундай тўғридан-тўғри мулоқотлар ёшларнинг глобал меҳнат бозори талабларини аниқ тушунишларига ёрдам беради.
Ташриф давомида меҳмонлар институтнинг ёшлар масалалари бўйича биринчи проректори Муҳамммедали Даулетмуратов ҳамроҳлигида ўқув ва замонавий лаборатория хоналари билан танишишди. Япониялик мутахассислар бу ерда олиб борилаётган илмий тадқиқотлар ва эришилаётган натижаларга юқори баҳо бердилар.
Шунингдек, Саваура Шожи институтда ташкил этилган япон тили курсларида таҳсил олаётган талабалар билан ҳам учрашди. У талабалар билан самимий суҳбатлашиб, "Green Leaf" компанияси томонидан ишлаб чиқарилаётган қишлоқ хўжалиги маҳсулотлари ҳақида маълумот берди ҳамда келгусида ўзаро ҳамкорликни тил ўрганиш орқали янада ривожлантириш таклифини билдирди.
Шу ўринда айтиш жоизки, қишлоқ хўжалиги йўналишида таҳсил олаётган талабаларнинг чет элда ишлаши уларнинг билим ва тажрибасини бойитишда муҳим аҳамиятга эга. Бу орқали талабалар замонавий агротехнологиялар, инновацион усуллар ва механизация жараёнлари билан танишадилар. Чет элдаги амaлиёт уларга дунё стандартларига мос иш услубини ўрганиш, тил билимини ошириш ва маданий кўламини кенгайтириш имконини беради. Қайтиб келгач, талабалар ўрганган тажрибаларини маҳаллий қишлоқ хўжалигида қўллаб, унинг ривожига муносиб ҳисса қўшадилар. Шу тариқа, чет эл тажрибаси ёш мутахассисларни малакали ва рақобатбардош кадр сифатида шакллантиради.
Айниқса, Японияда қишлоқ хўжалигини ривожлантиришга катта эътибор қаратаётган давлатлардан бири саналади. Мамлакатда ер ресурслари чекланган бўлса-да, юқори самарадорликни таъминлаш учун илғор технологиялардан фойдаланилади. Замонавий дронлар, автоматлаштирилган техника ва сунъий интеллект ёрдамида маҳсулот етиштириш ва ҳосилдорлигини ошириш тизими йўлга қўйилган бўлиб, суғориш ва ҳосил йиғиш жараёнлари қўл меҳнатисиз амалга оширилади. Япон ҳукумати фермерларга субсидиялар, имтиёзли кредитлар ва инновацион лойиҳалар учун грантлар ажратади. Шунингдек, органик маҳсулотлар етиштириш ва экспорт салоҳиятини оширишга алоҳида эътибор берилади. Натижада, Япония озиқ-овқат хавфсизлигини таъминлаб, қишлоқ хўжалигини барқарор ривожлантириш йўлида муваффақиятга эришмоқда.
Бу каби ташрифлар Қорақалпоғистонлик ёш мутахассислар учун глобал меҳнат бозорига чиқиш эшикларини очиб, уларнинг касбий малакасини оширишга хизмат қилади. Институт ва “Green Leaf” ўртасидаги ҳамкорликнинг мустаҳкамланиши минтақа аграр соҳасига Япониянинг илғор, экологик тоза инновациялари кириб келишига ҳам мустаҳкам замин яратади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
