"HAPPY KIDS"да байрам шукуҳи: болажонлар мустақилликни нишонлади
Амударё туманида жойлашган, яқинда ўз фаолиятини бошлаган “HAPPY KIDS” нодавлат мактабгача таълим ташкилотида 27 сентябрь куни унутилмас байрам тадбири бўлиб ўтди. Болажонлар ва мураббийлар “Мустақил Ўзбекистон – 34 ёшда” шиори остида ташкил этилган тантанада жонли ва қувноқ чиқишлар билан иштирок этиб, ҳамманинг қалбига байрам шодиёнасини олиб кирди.
Ташкилот мудираси Шаҳло Искандарова раҳбарлигида ўтказилган ушбу тадбир болаларнинг ижодий қобилиятларини намоён этиш учун ажойиб имконият яратди. Боғчада мавжуд икки гуруҳга бўлинган жажжи тарбияланувчилар куй-қўшиқ ва рақслар билан тадбирга ўзгача файз бағишладилар. Байрам давомида болалар Ватанга бўлган меҳрларини ифода этувчи шеърлар ўқидилар, бу эса катталарнинг ҳам қалбини жунбушга келтирди.
Тадбирнинг энг ёрқин лаҳзаларидан бири қизларнинг машҳур “Барби” қўшиғига моҳирона рақсга тушиши бўлди. Уларнинг шўх ва ширин ҳаракатлари томошабинларнинг олқишларига сабаб бўлди. Ўғил болалар эса каратэ устози Хурсандбек Мадраҳимов бошчилигида ўз маҳоратларини намойиш этишди. Уларнинг бажарган турли мураккаб трюклари, куч ва чаққонлик билан бажарилган ҳаракатлари ота-оналар ва меҳмонларни ҳайратда қолдирди.
Боғча кичкинтойлари ҳам байрамдан четда қолмади. Улар “Жон Ватан” қўшиғига шўх-шодон рақсга тушиб, ўзларининг самимий қувончларини намоён этдилар.
Айтиш жоизки, 2025 йилнинг июнь ойида иш бошлаган "HAPPY KIDS" нодавлат мактабгача таълим ташкилоти қисқа вақт ичида ўз фаолиятини йўлга қўйиб, сифатли таълим ва тарбия беришнинг уддасидан чиқмоқда. Ҳозирда ушбу боғчада 2 ёшдан 7 ёшгача бўлган болажонлар тарбияланмоқда. Ташкилотда болаларнинг ҳар томонлама ривожланиши учун барча шароитлар яратилган.
Боғчада 6 нафар малакали ходим фаолият юритиб, болалар билан алоҳида ёндашув асосида шуғулланади. Таълим дастурига инглиз тили, рус тили, логопед машғулотлари киритилган бўлиб, булар болаларнинг тил кўникмаларини эрта ёшдан шакллантиришга ёрдам беради. Бундан ташқари, жисмоний ривожланишга катта эътибор қаратилиб, ҳафтасига икки марта каратэ ва гимнастика машғулотлари ўтказилади. Бу машғулотлар болаларнинг соғлом ва тетик ўсишида муҳим аҳамият касб этмоқда.
Мустақиллик байрами муносабати билан ўтказилган тадбир болаларнинг нафақат жисмоний ва ижодий ривожланишига хизмат қилди, балки уларнинг қалбида Ватанга муҳаббат, унинг тарихи ва қадриятларига ҳурмат туйғуларини шакллантиришда ҳам муҳим аҳамият касб этди.
Мазкур байрам тадбири “HAPPY KIDS” нодавлат мактабгача таълим ташкилоти жамоаси ва тарбияланувчиларининг биргаликдаги ишларининг амалий натижаси бўлиб, уларнинг ҳамжиҳатлиги ва юксак ташкилотчилигини яна бир бор намоён этди.
Бу каби тадбирлар болалар учун байрамларнинг, айниқса энг улуғ, энг азиз бўлган мустақиллик байрамининг аҳамиятини тушунтириб, уларни жонажон Ватанимизга муҳаббат, она юртга садоқат руҳида, миллий ва умуминсоний қадриятлар асосида тарбиялашда муҳим амалий восита бўлиб хизмат қилади. “HAPPY KIDS” нодавлат мактабгача таълим ташкилоти раҳбарияти келажак авлоднинг ҳар томонлама етук, ватанпарвар ва салоҳиятли инсонлар бўлиб етишиши йўлида барча имкониятларни ишга солган ҳолда самарали меҳнат қилмоқдалар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
