Маҳаллаларда хавфсизликни таъминлаш: замонавий ёндашув ва амалий натижалар

Президентимизнинг шу йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори хавфсизлик соҳасида янги босқични бошлаб берди. Бу муҳим ҳужжат асосида Қорақалпоғистон Республикасида кенг қамровли профилактик ишлар олиб борилмоқда ва жамиятнинг барча қатламларини қамраб олган комплекс тизим яратилмоқда.

Қорақалпоғистон Республикаси қўриқлаш бошқармаси, ҳудудлардаги “Маҳалла еттилик”лари ҳамда ИИБ ходимлари ўртасидаги узвий ҳамкорлик туфайли “Хавфсиз шаҳар” ва “Хавфсиз маҳалла” тамойили асосида “Хавфсиз ва соғлом эл” тезкор профилактик-тарғибот тадбирлари ўтказилмоқда. Бу каби тадбирлар жиноятчилик ва ҳуқуқбузарликларнинг олдини олишда муҳим восита бўлиб, фуқароларнинг тинч-осойишта яшашига замин яратмоқда.

Соҳа мутахассислари томонидан олиб борилаётган тушунтириш-тарғибот ишлари фуқароларнинг хавфсизлик бўйича тушунчаларини оширибгина қолмай, уларни замонавий қўриқлаш воситаларидан фойдаланишга рағбатлантирмоқда. Яқинда Амударё тумани ИИБ ва қўриқлаш бўлими ходимлари томонидан Бойовул маҳалла фуқаролар йиғини ҳамда туман деҳқон бозори атрофида ўтказилган тадбирлар бу борадаги ишларнинг амалдаги ифодаси бўлди.

Тадбир давомида фуқароларга жиноятчилик ва ҳуқуқбузарликларнинг олдини олиш, ўғирлик жиноятларига йўл қўймаслик мақсадида қўриқлаш хизматининг афзалликлари тўғрисида батафсил маълумот берилди. Соҳа ходимлари маҳаллаларда жойлашган кўп қаватли уйларда яшовчи фуқаролар билан алоҳида учрашувлар ўтказиб, уларга замонавий қўриқлаш сигнализация ускуналаридан фойдаланишнинг муҳим жиҳатлари ҳақида тушунтириш ишларини олиб борди. Бу воситалар биринчи навбатда фуқароларнинг хавфсизлиги ва тинчлигини таъминлашда муҳим роль ўйнаши, шунингдек уларнинг мол-мулкини ҳимоя қилишда ишончли восита бўлиб хизмат қилиши таъкидланди.

Бугунги кунда Амударё тумани Қўриқлаш бўлими Техник қўриқлаш маркази томонидан 510 та объект ва 340 та фуқаро уйи ишончли қўриқланиб келинмоқда. Бу кўрсаткичлар туманда хавфсизлик тизимининг пухта ташкил этилганлигидан далолат бериб, аҳолининг бу соҳага бўлган ишончининг амалий исботидир. Ўтказилган тарғибот ишлари давомида жами 54 турдаги хизмат кўрсатувчи объектлар ва 10 дан ортиқ фуқароларнинг яшаш уйлари ҳимояга олинди.

Айтиш жоизки, қўриқлаш тизимида қўлланилаётган замонавий технологиялар фуқароларнинг мол-мулки ва шахсий хавфсизлигини таъминлашда муҳим роль ўйнамоқда. Сигнализация тизимлари, видеокузатув камералари ва бошқа техник воситалар ёрдамида ҳар қандай хавфли вазиятларни олдиндан аниқлаш ва тегишли чораларни кўриш имкони юзага келади. Соҳа мутахассислари таъкидлашича, замонавий қўриқлаш тизимлари нафақат жиноятчиликнинг олдини олишда, балки содир бўлган ҳолатларни тезкор ҳал этишда ҳам катта самара беради. Бу тизимлар 24 соат давомида ишлаб, дарҳол сигнал бериш орқали ва амалий чора қўллашга имкон яратгани сабабли фуқароларга доимий хавфсизлик ҳиссини бағишламоқда.

Туманда хизмат кўрсатаётган тадбиркорлик объектлари ва савдо шохобчаларида замонавий қўриқлаш сигнализация ускуналаридан унумли фойдаланиш бўйича тушунтириш ишлари давом этмоқда. Кўпчилик тадбиркорлар бундай хизматлардан фойдаланиш бўйича ўзларининг ижобий таклифларини билдириб, объектларини соҳа ходимлари томонидан қўриқлашга топширмоқда.

Хавфсизлик масалаларида жамият ва давлат органлари ўртасидаги ҳамкорлик муҳим аҳамият касб этиб, фуқароларнинг фаол иштироки ва давлат органларининг профессионал фаолияти биргаликда юқори натижаларга эришишга имкон беради. “Маҳалла еттилик”лари ва ИИБ ходимларининг биргаликдаги ишлари натижасида ҳудудларда жиноятчилик кўрсаткичлари сезиларли даражада камаймоқда. Қолаверса, бу каби тарғибот ишлари ҳам изчил равишда давом эттирилаётгани келажакда хавфсизлик тизимининг янада мустаҳкамланишига ва барча ҳудудларни қамраб олишга хизмат қилади.

Шуни ҳам таъкидлаш керакки, замонавий дунёда хавфсизлик тизимлари нафақат жиноятчиликнинг олдини олиш воситаси, балки жамиятнинг барқарор ривожланиши учун зарур шарт сифатида қаралмоқда. Бу борада мамлакатимизда аҳолининг ташаббускорлиги ва давлат дастурларининг мақсадли амалга оширилиши муҳим роль ўйнамоқда. Хавфсизлик тизимини мустаҳкамлаш йўлида қўлланилаётган комплекс ёндашув эса келажакда янада кенг қамров касб этиб, юксак натижаларга эришиш имконини беради.