Чойкўллик хотин-қизлар – фаровон ҳаёт ва бунёдкорлик йўлида

Бугунги кунда жамиятимизда хотин-қизларнинг ҳар соҳада фаол иштироки, уларнинг ижтимоий-иқтисодий ҳаётдаги ўрни йилдан-йилга ортиб бормоқда. Ҳудудлар кесимида жойларда аёл-қизлар бандлигини таъминлаш, уларни касб-ҳунарга ўргатиш, тадбиркорликка йўналтириш борасида олиб борилаётган ишлар салмоқли натижалар бермоқда.

Бу борада Амударё туманининг Чойкўл овули ижобий тажрибаларга бой. Бу ерда хотин-қизлар фаолиятини қўллаб-қувватлаш, уларнинг бандлигини таъминлаш йўлида амалга оширилаётган ишлар бошқа ҳудудлар учун ибрат бўла олади.

Овулда фаолият юритаётган хотин-қизлар фаоли Сайлихон Муродбоева ташаббускорлиги билан аёлларни ижтимоий қўллаб-қувватлаш, уларни “Аёллар дафтари”га киритиб, зарур ёрдамлар кўрсатиш тизимли йўлга қўйилган. Натижада кўплаб хотин-қизлар ўзининг оиласига қўшимча даромад олиб кираётган, ўз тадбиркорлигини бошлаган, жамият ҳаётида фаол иштирок этаётган фуқароларга айланишмоқда.

Хусусан, овулда яшовчи Саида Эсенбоева ана шундай илғор аёллардан биридир. У “Аёллар дафтари”га киритилгач, хотин-қизлар фаоли ва мутасаддилар кўмагида касб-ҳунарга ўқитилди, субсидия асосида тикув машинаси билан таъминланди. Шу орқали у ўзининг тикувчилик фаолиятини йўлга қўйди. Ҳозирда эса нафақат ўзига, балки яна 10 нафар хотин-қизга иш ўрни яратган ҳолда, улар билан биргаликда тикилган маҳсулотларини Қозоғистон Республикасига экспорт қилмоқда.

Шунингдек, Ўғилой Мелиева ҳам ўз ташаббусини рўёбга чиқариш учун астойдил ҳаракат қилган аёллардан бири. У маҳалла масъулларининг кўмагида субсидия асосида тикув машинаси олиб, бугунга келиб 4 нафар шогирдни тайёрламоқда. Унинг мақсади – ҳунар орқали ёш авлодни иш билан таъминлаш, тажрибасини улашиш орқали жамиятга фойдали инсон бўлишдир.

Овулда истиқомат қилувчи тажрибали гулчи Бибиробия Усмонова узоқ йиллардан буён фарзандлари ва неваралари билан биргаликда гулчилик билан шуғулланади. У етиштираётган гуллар турфа хилдалиги билан ажралиб туради: хризантема, турк гвоздикаси, адонис, ситус, серен, лилия ва 8 хил турдаги атиргуллар. Бундан ташқари, мевали дарахтлар ниҳоллари, 9 хил узум навини парваришлаб, нафақат овул аҳолисини, балки бутун туман бозорларини ўз маҳсулотлари билан таъминлаб келмоқда. Гулчилик нафақат иқтисодий фойда келтиради, балки атроф-муҳитни ободлаштиради, файз бахш этади.

Бибиробия Усмонованинг меҳнати беқиёс эътирофга сазовор бўлиб, у “Ибратли аёл” кўкрак нишони билан тақдирланди. Бу фақат бир аёлга эмас, балки бир авлодга берилган эътибор дейиш мумкин. Зеро, унинг қизи – Дилрабо Ўразимбетова ҳам онасининг изидан бориб, “Умид учқуни” кўкрак нишони билан тақдирланган. Бу эса оилада қадрланган меҳнат, меҳр ва сабрнинг бевосита самарасидир.

Чойкўллик яна бир фаол аёл – Дилноза Айтимбетова ҳам "Аёллар дафтари" орқали ўз орзусини рўёбга чиқарди. У маҳалла масъуллари ёрдамида паррандачилик учун имтиёзли кредит олиб, паррандачиликни йўлга қўйди. Жорий мавсумда у 4 маротаба жўжалар етиштириб, маҳалладошларига сотди ва мўмай даромад топди. Эндиликда эса бу фаолиятни янада кенгайтириш, паррандачиликни бизнесга айлантириш ниятида. У ҳам ҳозирда бошқа хотин-қизлар учун ҳаётий намунадир.

Чойкўл овулидаги бу каби мисоллар орқали аёлларга берилган эътибор ва кўрсатилган ёрдамлар натижасида қандай катта ижобий ўзгаришларга эришиш мумкинлигини яққол кўрсатади. Ҳар бир хотин-қиз ўз оиласи, маҳалласи ва ниҳоят жамият тараққиётида муҳим рол ўйнайди. Уларнинг ҳаракатига қанот бағишлаш, имконият эшикларини очиш эса жамиятимизнинг бугуни ва эртанги кунига хизмат қилади. Зеро, аёллар қўли билан яратилган меҳнат, тинчлик ва барака олиб келади. Чойкўллик аёллар эса бунинг ёрқин далилидир.

 Чарос Арслонова, туман ҳокимлигининг Ахборот хизмати раҳбари.