Жорий йил 49-сонли ДМТТни 38 нафар тарбияланувчи тамомлади

Мамлакатимизда мактабгача таълим тизимини ривожлантириш, боғчаларга болаларни тўлиқ қамраб олиш учун зарур шароит яратишга алоҳида эътибор қаратилмоқда. Бу бежиз эмас. Чунки ҳар қандай жамиятнинг келажаги болаларга бериладиган таълим ва тарбияга бевосита боғлиқ. Президентимиз ташаббуси билан қабул қилинган давлат дастурлари ва амалга оширилаётган ислоҳотлар айнан шу эзгу мақсадга йўналтирилган.

Қишлоқ ва чекка ҳудудларда ҳам мактабгача таълим масканларини замон талаблари даражасида жиҳозлаш, болаларни қамраб олиш кўламини кенгайтириш, педагогларнинг меҳнатига муносиб шароит яратиш бугунги куннинг долзарб вазифаларидан бирига айланган. Бу борадаги саъй-ҳаракатлар самарасини Амударё туманининг Қангли овулида жойлашган 49-сонли давлат мактабгача таълим ташкилоти мисолида яққол кўриш мумкин.

1978 йилда қурилган мазкур муассаса биноси “Обод маҳалла” дастури доирасида тубдан таъмирланиб, 2025 йилда қайта фойдаланишга топширилди. Бугунги кунда ташкилот биноси мутлақо янги қиёфа касб этган: ҳар бир гуруҳ хонаси шинам ва ёруғ, замонавий талабларга тўлиқ жавоб беради. Болажонларнинг ёш хусусиятларига мос ўйин ва ўқув қуроллари, ахборот технологиялари ва мультимедиа воситалари билан жиҳозланган хоналар уларнинг жисмоний ҳамда ақлий ривожига хизмат қилмоқда.

Ҳозирда асосий бинода 120 нафар бола таълим-тарбия билан қамраб олинган. Шунингдек, ҳудуддаги 67-сонли мактаб қошида ташкил этилган қисқа муддатли гуруҳларда яна 20 нафар бола тарбияланмоқда. Муассасада 29 нафар ходим меҳнат қилмоқда, уларнинг 17 нафари малакали тарбиячи-педагоглардир. Дарс жараёнларида болаларнинг фикрлаш қобилияти, ижодий салоҳияти, нутқи ва ахлоқий тарбиясига алоҳида эътибор қаратилади. Шу билан бирга, мусиқа, спорт, рассомлик, шеърхонлик каби тўгараклар болаларнинг қизиқиш ва қобилиятларини ривожлантиришда муҳим ўрин тутади.

Яқинда болажонларни мактабга кузатиш муносабати билан “Хайр, боғчам – салом, мактаб!” номли адабий-бадиий ва мусиқий чиқишларга бой байрам тадбири ташкил этилди. Жорий йил мазкур мактабгача таълим ташкилотини 38 нафар тарбияланувчи тамомлади.

Тадбирда ташкилот директори Зина Исмоилова, болалар, уларнинг оналари ва бувижонлари иштирок этди. Дастлаб Ўзбекистон ҳамда Қорақалпоғистон Республикаларининг Давлат мадҳиялари янгради. Шундан кейин мактабгача таълим ташкилоти директори Зина Исмоилова тадбирни очди ва барча болажонларнинг келгуси мактаб таълимида аъло баҳоларга ўқишларига тилакдош бўлди.

Тадбир давомида болалар томонидан она Ватан, мактаб ва болалик мавзуларидаги шеърлар ўзбек, рус ва инглиз тилларида ифодали тарзда ёддан ўқилди. Чиқишларда болаларнинг боғчада олган таълим-тарбияси, тарбиячилар меҳнати ўз ифодасини топди. Хорижий тилларда ўқилган шеърлар ва ижро этилган рақсларда болаларнинг кўп қиррали истеъдодлари акс этди.

Миллий ва замонавий рақслар, шўх қўшиқлар садоси остидаги чиқишлар ҳар бир томошабиннинг қалбида илиқ туйғулар уйғотди. Айниқса, болаларнинг оналари иштирокидаги ўйинлар тадбирга янада юқори кайфият улашди.

Тадбир якунида болажонлар сўзга чиқиб, тарбиячилари ҳамда ота-оналарига шеърлар орқали самимий миннатдорлик билдиришди. Шунингдек, чуқур ҳурмат ифодаси сифатида болажонларнинг оналарига гулдаста топшириш жараёни ҳаяжонли лаҳзаларга бой бўлди.

Таълимнинг илк босқичи — мактабгача таълимга қаратилаётган эътибор ёш авлодни баркамол, билимли ва ватанпарвар этиб тарбиялашда муҳим ўрин тутади. Кичкинтойлар учун яратилаётган қулайликлар, уларнинг бахти ва камолига йўналтирилаётган меҳр — бу миллий тараққиётнинг пойдевори ҳисобланади. Таълимга қаратилган бугунги инвестиция — эртанги салоҳиятли ва баркамол жамиятнинг кафолатидир.

Зина Исмоилова, 49-сонли ДМТТ директори.