“Долзарб 90 кун” лойиҳасига старт берилди

2025 йил 15 май куни мактабгача ва мактаб таълими соҳаси бўйича ўтказилган видеоселектор йиғилишида муҳтарам Президентимиз ташаббуси билан “Долзарб 90 кун” лойиҳаси йўлга қўйилди. Лойиҳа доирасида республикада 1 июндан 30 августгача мактаб ўқувчилари ва уюшмаган ёшларнинг бўш вақтини мазмунли ўтказиш, уларни соғломлаштириш ва ҳар томонлама ривожлантириш бўйича кенг кўламли ишлар олиб бориш бўйича топшириқлар берилди.

Шундан келиб чиққан ҳолда ёшларнинг ёзги таътил даврини мазмунли ва самарали ташкил этиш, мактабгача таълим муассасаларига болаларни қамраб олишни кенгайтириш, мактаб ўқувчилари бандлигини таъминлаш ва уларнинг ижтимоий фаоллигини оширишга қаратилган чора-тадбирлар белгилаб берилди.

“Долзарб 90 кун” лойиҳаси бўйича Амударё туман Мактабгача ва мактаб таълими бўлими, туман Ёшлар ишлари бўлими, Маданият бўлими ва Ўзбекистон маҳаллалари уюшмаси туман бўлими томонидан ёшлар, айниқса, уюшмаган ёшларнинг бўш вақтларини мазмунли ташкил этишга қаратилган маҳалла даражасидаги тадбирлар режа-жадвали ишлаб чиқилган бўлиб, ушбу дастур доирасида ёшларни жалб қилиш бўйича кенг кўламли ишлар режалаштирилган.

Туманимиздаги 38-сонли умумтаълим мактабида ҳам “Долзарб 90 кун” лойиҳасига старт берилди. Лойиҳанинг очилишида туман ҳокими ўринбосари Нодирбек Камолов, туман Мактабгача ва мактаб таълими бўлими бошлиғи Ялғаш Шомурадов, бўлим масъуллари, туман Ёшлар ишлари бўлими масъуллари ҳамда умумтаълим мактаблари директор ўринбосарлари иштирок этди.

Жараён мобайнида ушбу лойиҳанинг мақсади ва уни амалга оширишда асосий вазифалар хусусида сўз юритилди. Тадбир доирасида 38-сонли мактабда ташкил этилган тўгараклар фаолияти билан танишилди. Ўқувчиларнинг турли йўналишлардаги ижод маҳсуллари намойиш этилди.

Таъкидлаш жоизки, “Долзарб 90 кун” лойиҳаси доирасида ёшлар ўртасида турли спорт тадбирлари, интеллектуал ўйинлар, маданий тадбирлар, давра суҳбатлари, саёҳатлар, мусиқий тадбирлар, акциялар, учрашувлар, тўгарак-машғулотлари, ўтказиш ва ташкил қилиш кўзда тутилган.

Жумладан, лойиҳа доирасида “Қувноқ стартлар”, шахмат-шашка, футбол, волейбол, баскетбол каби спорт тадбирлари, “Компьютер технологияларининг билимдони” танлови, IT саводхонлигини ошириш курслари, “Заковат”, “Мактабимизнинг IT истеъдодлари” каби интеллектуал ўйинлар, “Ёз ўтмоқда соз” шиори остида маданий тадбирлари ўтказилиши белгиланган.

Шунингдек, “Спорт – соғлик гарови”, “Тилга эътибор –элга эътибор”, “Мен ижтимоий тармоқлардан қандай фойдаланаман”, “Рақамли иқтисодиётда ёшларнинг иштироки”, “Оила мактаби” мавзуларида давра суҳбатлари, музейларга, ишлаб чиқариш корхоналарига саёҳатлар, мусиқий тадбирлар, тумандаги шоир, ёзувчилар, ижодкорлар билан учрашувлар ўтказилиши бўйича ҳам аниқ чора-тадбирлар белгилаб олинган.

Лойиҳа доирасида 1 июндан 30 августгача мактаб ўқувчилари ва уюшмаган ёшларнинг бўш вақтини мазмунли ўтказиш, уларни соғломлаштириш ва ҳар томонлама ривожлантириш бўйича кенг кўламли ишлар олиб борилади.

Таъкидлаш жоизки, бугунги кунда ёш авлодни ҳар томонлама етук, билимли, маънавий баркамол ва жисмонан соғлом инсонлар қилиб тарбиялаш жамиятимиз олдида турган энг устувор вазифалардан биридир. Бу жараёнда ёшларнинг бўш вақтини тўғри ва мазмунли ташкил этиш муҳим аҳамият касб этади.

Чарос Арслонова, туман ҳокимлигининг Ахборот хизмати раҳбари.