Президент соврини учун “Хорижий тилларни ўқитиш бўйича энг яхши мактаб” танлови ўтказилди

Хорижий тилларни ўрганиш ва эркин суҳбатлаша олиш даражасида билиш – замон талаби. Шу сабабли давлатимиз томонидан бугунги кунда хорижий тилларни ўргатиш ва ўқитиш масаласига алоҳида эътибор қаратилиб келинмоқда. Жумладан, умумтаълим мактабларида ўқувчиларнинг хорижий тилларни ўрганишга бўлган иштиёқини ошириш, уларга бу борада сифатли таълим бериш ҳамда ўқувчиларнинг билим даражасини синовдан ўтказиб, муносиб баҳолаш масалаларига ҳам урғу берилмоқда.

Ўзбекистон Республикаси Президентининг “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида”ги Қарори ҳамда Вазирлар Маҳкамасининг “Иқтидорли ўқувчилар ўртасида фан олимпиадаларини ўтказиш тизимини такомиллаштириш ҳамда хорижий тилларни ўқитиш бўйича энг яхши мактабни аниқлаш тизимини жорий этиш тўғрисида” ги Қарори асосида 27 март куни Амударё туманидаги 40-сонли умумий ўрта таълим мактаби биносида “Хорижий тилларни ўқитиш бўйича энг яхши мактаб” танлови ўтказилди.

Президент соврини учун ўтказилган танловда тумандаги 86 та умумий ўрта таълим мактабларининг 7-9-синф ўқувчиларидан иборат 385 нафар ўқувчи ёшлар иштирок этишди.

Танловни туман Мактабгача ва мактаб таълими бўлими бошлиғи Ялғаш Шамуратов кириш сўзи билан очиб бериб, танлов иштирокчиларига омад тилади. Бундан ташқари, танловга Қорақалпоғистон Республикаси Мактабгача ва мактаб таълими вазирлиги бўлим бошлиғи Ҳамидулла Бегдуллаев, туман ихтисослаштирилган мактаби директорининг ўринбосарлари Равшан Халмуратов ва Муяссар Рахматуллаевалар умумий раҳбарлик қилишди. Ҳар бир мактаб жамоасидан инглиз тилига қизиқадиган 5 нафар иштирокчи тест синовларида иштирок этдилар. Тест топшириқлари Фан олимпиадалари маркази томонидан муҳрланган ҳолатда етказиб берилди. Иштирокчиларга тест топшириқлари ва жавоб варақалари тарқатилгач, тестларни ечиш учун 2 соат вақт берилди.

Мазкур тест жараёнлари давомида нафақат ўқувчиларнинг хорижий тил бўйича билимлари синовдан ўтказилади, балки бу жараёнда чет тили ўқитувчиларининг ҳам билим кўрсаткичлари баҳоланади. Танлов ғолиблари Ўзбекистон Республикаси Президентининг соврини билан мукофотланади. Бунда танловнинг туман ва шаҳар босқичида 1-ўринни эгаллаб, ғолибликни қўлга киритган мактабга — 100 миллион сўм, 2-ўрин учун — 75 миллион сўм, 3-ўрин учун — 50 миллион сўм миқдорида мукофот пули берилиши белгиланган.

Тест жараёнлари давомида ўқувчилар ўзларининг бор билим ва салоҳиятини намоён қилишга ҳаракат қилдилар. Жараён якунида ўқувчиларининг тест натижалари бўйича жавоб варақалари йиғиб олинди. Эндиликда улар марказлашган ҳолда, Тошкент шаҳрида, компьютер ёрдамида текширилади ва танлов натижалари 10 кундан кейин эълон қилинади. Танловнинг бу йилги ўзгачалиги – жавоб варақалари ҳакамлар ҳайъати томонидан эмас, балки тўғридан-тўғри компьютер технологияси ёрдамида текширилишида. Албатта, бу баҳолаш жараёнларидаги шаффофликни таъминлайди.

Эслатиб ўтамиз, 2023-2024 ўқув йили “Хорижий тилларни ўқитиш бўйича энг яхши мактаб” танловида 40-мактаб жамоаси 1-ўринни, 32-мактаб 2-ўринни ва 1-мактаб 3-ўринни қўлга киритиб, ўз навбатида тегишли пул мукофотлари билан тақдирланган эди.

Таъкидлаш жоизки, мактаблар ўртасида соғлом рақобат муҳитини шакллантириш, уларда хорижий тилларни ўқитишнинг даражаси ва сифатини оширишни рағбатлантириш, педагог-ўқитувчиларнинг фаоллигини ошириш, ўқитиш сифати бўйича халқаро мезон ва стандартларга мувофиқ юқори кўрсаткичларга эришишга замин яратиш – танловнинг мақсади ҳисобланади.

Ушбу танлов мактабларда хорижий тилларни ўқитиш бўйича амалга оширилаётган чора-тадбирлар натижадорлигини таҳлил қилиш, хорижий тиллар бўйича ўқувчиларга сифатли таълим бераётган, самарали фаолият олиб бораётган ўқитувчиларни аниқлаш ва рағбатлантириш, мактабларда хорижий тилларни ўргатиш бўйича кўрсатилаётган таълим хизматлари сифати ва самарадорлигини ошириш, уларда амалга оширилаётган ишлар ва эришилаётган натижалар тўғрисида кенг жамоатчиликни холис ахборотлар билан таъминлаш, танловда юқори кўрсаткичларни қайд этган мактаблар тажрибасини оммалаштириш каби мақсадларга ҳам хизмат қилади.

Азиза Мадраҳимова