Хорижий тилларни билиш мажбуриятми ёки имконият?
Бугунги кунда кенг жамоатчилик томонидан жаҳон тилларини, айниқса инглиз тилини, ўрганиш дунё миқёсида ривожланиш имкони сифатида эътироф этилмоқда. Бироқ, хорижий тилни фақат зарурат деб биладиганлар ҳам талайгина. Аслида-чи, қайси нуқтаи назар ҳақиқатга яқин?
Дарҳақиқат, юртимизда хорижий тилларга бўлган талаб ва қизиқиш тобора ортиб бормоқда. Бу фикрнинг тасдиғи сифатида бир қанча далилларни келтириш мумкин. Хусусан, хорижий тилни билиш касбий ривожланиш ва халқаро майдонда эркин мулоқот қилиш учун муҳим омиллардан биридир.
Замонавий дунёда чет тилини билган инсон илмий изланишлар олиб бориш, хорижий университетларга ҳужжат топшириш ва халқаро ташкилотларда ишлаш имкониятига эга бўлади. Шу сабабли ҳам “Тил билган – эл билади” деган нақл бежиз айтилмаган.
Статистик маълумотларда юртимиздаги ёшларнинг аксарияти хорижий университетларга ҳужжат топшираётгани қайд этилган. Бу эса халқаро таълим ва касбий фаолиятда чет тилларининг нақадар муҳимлигини яна бир бор исботлайди.
Масалага бошқа томондан ёндашадиган бўлсак, хорижий тилларни ўрганишга эҳтиёж асосан маълум соҳаларга боғлиқ эканини ҳам инкор этиб бўлмайди. Масалан, IT ва дастурлаш соҳаларида фаолият юритувчи мутахассислардан одатда хорижий тил билиш талаб қилинади. Шунингдек, магистратура ва докторантура босқичларига қабул қилиниш, юқори лавозимларга кўтарилиш учун ҳам чет тилларини ўрганиш заруратга айланмоқда. Статистик маълумотларга қараганда, абитуриентларнинг 60-65 фоизи хорижий тил имтиҳонига мажбурий фан сифатида тайёрланаётган экан.
Хулоса қилиб айтганда, хорижий тил ўрганиш ҳозирги куннинг талаби ва ислоҳотлари тақозо этаётган долзарб масалалардан биридир. Илмий тадқиқот марказларининг маълумотларига кўра, тил ўрганаётганларнинг 85,8 фоиздан ортиғи ўз мақсадларига эришиш учун буни зарурат деб билади. Шундай экан, қайси соҳада ишлашдан қатъи назар, хорижий тилларни ўрганиш нафақат шахсий ривожланиш, балки жамият тараққиётининг ҳам муҳим омили ҳисобланади.
Инобат Одилбоева, 1-сонли мактабнинг она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
