Аҳоли томорқалари ва ижарага олинган ерлардан самарали фойдаланиш бўйича кўргазмали семинар бўлиб ўтди

Амударё туманидаги маҳаллаларда Ўзбекистон Республикаси Президенти томонидан жорий қилинган янги тизим асосида томорқа ва аҳоли томонидан ижарага олинган ерлардан самарали фойдаланиш, шу орқали оилалар даромадларини ошириш масаласида семинар ташкил этилди.

Семинарда Қорақалпоғистон Республикаси Жўқорғи Кенгесининг Аграр, сув хўжалиги, табиатни муҳофаза қилиш ва экология масалалари қўмитаси раиси Анвар Жуманазаров, Саноат, қурилиш, транспорт ва алоқа масалалари қўмитаси раиси Ислам Сдиқов, туман ҳокими Собир Хўжаметов, тумандаги 49 та овул ва маҳаллалар “еттилик”лари, тижорат банклари масъуллари ҳамда ОАВ вакиллари иштирок этдилар.

Семинар иштирокчилари дастлаб туманнинг Дўрман овулида яшовчи намунали томорқачилар фаолияти билан танишди. Дўрманлик Сардор Абдиримовнинг 5 сотих ер майдонида етиштирилаётган қулупнайидан бу йил илк ҳосил олинмоқда. Сардор Абдиримовнинг деҳқончилик фаолиятини янада ривожлантириш мақсадидаги ташаббуси ҳоким ёрдамчиси томонидан қўллаб-қувватланиб, ўтган йили тадбиркорлик учун 100 млн сўм имтиёзли кредит маблағи ажратилган ва ушбу маблағ эвазига томорқадаги 5 сотих ер майдонига иссиқхона қурилган эди. Айни пайтда оилавий меҳнат натижасида иссиқхонада етиштирилаётган қулупнайлар пишиб, ҳосилга кирган. Қулупнай ҳосилидан эса 150-200 млн сўмгача даромад олиш режалаштирилмоқда.

Шунингдек, деҳқончиликнинг сир-асрорларини ота-боболаридан ўрганиб келган дўрманлик Исломбек Хўжаниязов томорқасидаги 4 сотих ер майдонида ташкил этилган иссиқхонада ҳам турли хил кўчатлар етиштирмоқда. Қолаверса, помидор ва бодринг маҳсулотларидан ҳам яхшигина даромад олинади. 2023 йилда ҳоким ёрдамчисининг қўллаб-қувватлаши билан 27 млн сўм имтиёзли кредит маблағи ҳисобига иссиқхонада етиштирилган кўчатлар ва маҳсулотларни ички бозорларда сотиш йўлга қўйилган. Шу орқали оиланинг 4 нафар аъзосининг бандлиги таъминланган. Ердан ва яратилаётган имкониятлардан самарали фойдаланиш натижасида оиланинг умумий йиллик даромади 90-100 млн сўмни ташкил этмоқда.

Таъкидлаш жоизки, муҳтарам Президентимиз томонидан жорий қилинган янги тизим асосида аҳолининг томорқа ва ижара ерларидан самарали фойдаланиши орқали даромадларини ошириш мақсадида Дўрман овули Олтин сой кўчасида ҳар бири 1 сотихдан бўлган 20 та иссиқхоналар қурилиб, ҳудуд аҳолисининг бандлиги таъминланишига ва даромад олишига замин яратилмоқда.

Семинарда мобайнида нафақат деҳқончилик, балки чорвачилик, паррандачиликни ҳам йўлга қўйган дўрманлик Қудрат Йўлдашевнинг фаолияти билан ҳам яқиндан танишилди. Хонадондаги 20 сотих томорқада етиштирилаётган турли сабзавот маҳсулотларидан йилига икки марта ҳосил олинаётган бўлиб, даромад ҳам яхшигина.

Холимбег овулида яшовчи намунали томорқачи Эркинбой Қўшаев фаолиятини ўрганиш мобайнида кўргазмали семинар иштирокчилари лимон етиштириш бўйича ўзаро билим ва тажриба алмашдилар. Томорқанинг 1 сотих ер майдонида ташкил қилинган иссиқхонада етиштирилаётган лимондан бу йил иккинчи маротаба ҳосил олинмоқда. Шунингдек, лимон кўчатларини кўпайтириш орқали туманнинг бошқа ҳудудларида ҳам ушбу фаолиятни ривожлантириш йўлга қўйилмоқда.

Шу билан бирга, томорқада қулупнай, хурмо мевалари, картошка, пиёз, карам каби турли сабзавотлардан ҳам яхши ҳосил олинади. Эркинбой Қўшаев қуёнчилик, чорвачилик ва паррандачиликни ҳам йўлга қўйган бўлиб, оилавий меҳнат натижасида йиллик даромади 90-100 млн сўмни ташкил этади.

Семинар иштирокчиларининг кейинги манзили Оқ олтин овулида кўчат етиштиришда илғор томорқачилардан бири бўлган Анвар Камолов хонадони бўлди. Семинар иштирокчилари юқори байрамона тайёргарликда кутиб олинди. Миллий таомларимиз, озиқ-овқат маҳсулотлари билан безатилган дастурхон Наврўзнинг тобора яқинлашаётганини яна бир бор эсга солди.

Томорқада ташкил қилинган иссиқхонада турли хил кўчатлар етиштириш йўлга қўйилган бўлиб, 2023 йилда ҳоким ёрдамчисининг кўмаги билан 33 млн сўм имтиёзли кредит маблағи эвазига олинган мототранспорт воситаси орқали етиштирилган кўчатларни ички бозорга олиб бориб сотиш йўлга қўйилган. Шунингдек, буюртма асосида ҳам кўчатлар етиштирилиб, тадбиркор бир йил давомида 60-70 млн сўмгача даромад олмоқда.

Тўлқин овули ҳам деҳқончилик, томорқачилик юқори даражада ривожланган ҳудудлардан бири бўлиб, намунали томорқа ер эгалари ҳам талайгина. Шулардан бири Мансур Мухтаров томорқасда 3 сотих ер майдонида кўчатчилик учун иссиқхона ташкил қилиб, 5-6 нафар ишсиз хотин-қизларнинг бандлигини таъминлаган. Иссиқхонада турли гуллар, сабзавотлар ва полиз экинлари кўчатлари етиштирилиб, овул аҳолисига ҳамда ички бозорда сотиш йўлга қўйилган. Томорқа ҳақиқий даромад манбаи эканлигини билган тадбиркор ўз фаолиятини янада кенгайтиришни режалаштирмоқда.

Тўлқинлик яна бир илғор томорқачи Азимжон Мухтаров эса 7 сотих иссиқхонасида помидор ва бодринг маҳсулотларини етиштириб, 2 маротаба яхши ҳосил ва юқори даромад олиб келмоқда.

Семинар иштирокчилари томорқалар ҳамда ижарага олинган ерларда ташкил этилган ишлар билан танишиш мобайнида ўзлари ҳам ушбу соҳа бўйича қўшимча билим ва тажрибага эга бўлдилар.

Чарос Арслонова, туман ҳокимлигининг Ахборот хизмати раҳбари.