36-сонли мактабда Халқаро хотин-қизлар куни муносабати билан байрам тадбири ўтказилди
Таълим жараёнида ўқувчиларнинг устозларидан олаётган назарий билимлари билан бир қаторда мактабларда ўтказилаётган турли хил маънавий-маърифий тадбирларнинг ҳам ўрни алоҳида. Сабаби, ўқув дарсликларидаги мураккаб мавзулар, уларни ўз вақтида ўзлаштириш, ҳар кунги уй вазифалари ўқувчиларни бироз чарчатиб, маънавий ҳордиқ олишга эҳтиёж уйғотади. Маълум сана ёки байрамлар муносабати билан ўтказиладиган тадбирлар, ундаги бадиий чиқишлар эса, ўқувчиларга байрамона кайфият улашибгина қолмасдан, ёшларнинг жамоат ишларидаги фаоллигини оширади, мактабнинг маънавий-маърифий ҳаётига дахлдорлик туйғусини уйғотади.
Баҳор фасли эса ана шундай гўзал тадбирларни ташкиллаштириш, миллийлигимизни, урф-одатларимизни кенг тарғиб қилиш ва бу жараёнга ўқувчи ёшларни кенг жалб қилишда айни муддаодир. Март ойининг илк кунларида Халқаро хотин-қизлар байрами юртимиз бўйлаб кенг нишонланади. Сана муносабати билан ҳудудлардаги барча таълим масканларида, муассаса ва ташкилотларда турли хил бадиий кечалар, тадбирлар, “Балли қизлар” сингари кўрик-танловлар ўтказилади.
Яқинда Амударё туманидаги 36-сонли мактабда ҳам аёллар байрами кўтаринки руҳда нишонланди. Байрам муносабати билан ташкил қилинган тадбир аввалида мактабнинг инглиз тили фани ўқитувчилари иштирокида “Касбий ривожланиш куни” доирасида йиғилиш ўтказилди. Унда мазкур фан ўқитувчиларининг дарс ўтиш маҳорати таҳлил қилиниб, касбдошлар дарс ўтишнинг янги методлари бўйича ўзаро тажриба алмашдилар.
Сўнгра, “Қизларжонлар” беллашувига навбат берилди. Мазкур тадбир мактабнинг 9-“А” ва 9-“Б” синфлари раҳбарлари Дилнура Бабаниёзова ҳамда Мевагул Қайипназаровалар томонидан ташкил қилинди.
Тадбирни мактаб директорининг маънавий-маърифий ишлар бўйича ўринбосари Сарвар Қутлимуратов кириш сўзи билан очиб берди ҳамда барчани хотин-қизлар байрами, баҳор байрами билан қизғин муборакбод этди.
Шундан сўнг 9-“А” синфнинг “Бойчечак” гуруҳи ва 9-“Б” синф қизларидан таркиб топган “Баҳор” гуруҳи бир қатор шартлар бўйича беллашиш учун даврага таклиф этилди. Ҳар бир гуруҳда олти нафар қиздан, жами 12 нафар қиз маҳорат, эпчиллик, пазандалик бўйича куч синашдилар.
Биринчи шарт “Таништирув” шарти бўлиб, унда қизлар ўзларини таништириб ўтдилар. Иккинчи – “Салат тайёрлаш” шартида қизлар ўзларининг пазандачилигини намоён қилиб, турли хилдаги баҳорий салатлар тайёрладилар. Учинчи шартда ўқувчи қизларнинг стилист сифатида ўз маҳоратларини намойиш қилишди. Яъни, шарт давомида қизларнинг гўзаллик яратиб, соч турмаклашига баҳо берилди. Тўртинчи ва бешинчи шартларда ҳам қизларнинг пазандалик қобилияти, эпчиллиги синовдан ўтказилди. Бунда улар дастлаб чучвара тугишдаги усталигини намоён қилишган бўлса, кейин хамирдан уноши қирқиш бўйича маҳоратларини синовдан ўтказдилар. Тадбир сўнгида қизларнинг меҳнати, ҳаракати одилона баҳоланди ва дуранг натижа қайд этилди.
Шу билан бирга, мактабнинг 6-“А”, 7-“А” синф қизлари тадбирга ўзгача кайфият олиб кириб, байрамона рақсга тушдилар. 4-“Б” синф қизлари эса она ҳақидаги ёд олган шеърларини айтиб бердилар. Тадбир давомида фаол иштирок этган қизларга байрам совғалари топширилди.
Шу куни мактабга ДХХ чегара қўшинларига қарашли ҳарбий қисм ходимлари ҳам ташриф буюриб, мактабнинг “Ёш чегарачи” клуби аъзолари билан учрашув ўтказди. Жараён давомида мактаб директори Ўктам Бидашевга ДХХ чегара қўшинларига қарашли ҳарбий қисм номидан ташаккурнома топширилиб, ўзаро ҳамкорликда олиб борилаётган ишлар эътироф этилди.
Шунингдек, ДХХ чегара қўшинлари қисм командирининг тарбиявий ва мафкуравий ишлари бўйича ўринбосари Миржаҳон Мажидов иштирокида мактабнинг “Ёш чегарачилар” клуби аъзолари билан кўргазмали машғулотлар ҳам ўтказилди.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
