Байрам арафасида фидойи аёлларга эҳтиром кўрсатилди
Оила – жамиятнинг асосий таянчи. Унинг мустаҳкамлиги, фарзандларнинг тўғри тарбияси ва ҳаёт йўлидан адашмаслиги кўп жиҳатдан аёлларнинг матонати, сабр-тоқати ва меҳнатига боғлиқ. Ҳар бир оилада ўз ҳаётини умр йўлдоши ва фарзандларига бағишлаган, уларга мададкор бўлган аёллар бор. Айниқса, ҳарбий хизматчи ёки уруш қатнашчисининг турмуш ўртоғи бўлиш – алоҳида сабр, жасорат ва фидойилик талаб этади.
Шу боис, 8 март – Халқаро хотин-қизлар куни муносабати билан Ўзбекистон жангчи-фахрий ва ногиронлари Бирлашмаси томонидан Афғон уруши қатнашчиларининг оила аъзолари тақдирланди. Бу эътироф – уларнинг оиласи ва жамиятга қилган беқиёс хизматига берилган юксак баҳодир.
Афғон уруши қатнашчиси Мақсад Каримовнинг турмуш ўртоғи Дилбар Саидова умр йўлдошига ҳамиша садоқат ва матонат билан елкадош бўлиб келган. Оиланинг мустаҳкамлиги ва фарзандларнинг тўғри тарбияси бевосита она машаққати ва фидойилиги билан боғлиқ. Шунинг учун унинг “Вафо ва садоқати учун” кўкрак нишони билан тақдирланиши – нафақат турмуш ўртоғига, балки оилага ва жамиятга бўлган чексиз фидокорлигининг эътирофидир.
1982 йилда Мақсад Каримов билан оила қурган Дилбар Саидова рус тили филологияси бўйича таҳсил олган ва кўп йиллар давомида 7-сонли мактабда ёшларга билим берди. Оиласи учун мустаҳкам таянч бўлиш билан бирга, илм-маърифат йўлида ҳам хизмат қилди. Бугун фидойи она 4 нафар фарзандни ватанпарвар ва фойдали инсонлар қилиб вояга етказган, 10 нафар набиранинг меҳрибон бувисидир.
Мақсад Каримовнинг келини, 32-сонли мактаб ўқитувчиси Назокат Қодирова эса “Ёшларни ҳарбий ватанпарварлик руҳида тарбиялаш учун” медали билан тақдирланди. У 2009 йилдан буён она тили ва адабиёт фани ўқитувчиси сифатида ёш авлодга таълим-тарбия бериб келмоқда.
Бундай фидойи аёлларнинг эътироф этилиши – жамиятда оиланинг ўрни ва аҳамиятига берилган юксак баҳодир. Улар нафақат оила мустаҳкамлигини таъминлайди, балки ёш авлод тарбияси, маърифат тараққиёти ва миллий қадриятларнинг авлоддан-авлодга ўтишига беқиёс ҳисса қўшади. Ана шундай аёлларнинг меҳнати ва садоқати муносиб қадрланган жамият эса мустаҳкам пойдеворга эга бўлади.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
